Ethigathano pamahupilo

0
251

 

Omashongo ngoka ga taalela aantu yetu nena,ogo okwaana iilonga, oluhepo, ondjala nokwaathike pamwe pamahupilo. Eyamukulo komashongo ngaka olyo omahupilo taga kokelele go ishewe otaga hili aapunguli naalandi molwashoka ogena ethigathano po lili nawa, go otaga wilikwa kaaniilonga yi itula mo miilonga ethimbo alihe.

Onkene epangelo noshikondo shoongeshefa osha tegelelwa okutungapo onkalo ya pumbiwa mekoko tali tsikile lyopankalathano no pamahupilo.

Pethimbo lyetulo miilonga lyondungethaneko yoHarambee, epangelo ota li kwatele komeho omalunduluko taga lalakanene okuhuepopeka omahupilo goshilongo opo ga kale taga vulu okuthigathana po niilongo iikwawo muuyuni. Opo tu adhe omuthika nguka gwethigathano po lili nawa pamahupilo otatu longele kumwe noshikondo shopaumwene moku kandulapo iinima mbyoka tayi imbi oshilongo shi kale nomuthika omwaanawa gwethigathano po  muuyuni.

Mombepo yaHarambee, tse otwa ngongapo nale elandulathano lyethigathano lyomumvo 2020 melongelokumwe noshikondo shopaumwene. Elandulathano ndika olya tothamo iitopolwa yasimana mbyoka ya pumbwa okulundululwa, oshoka oyili oshitopolwa shoku etapo ekoko momahupilo tali endelele, lya gama koohepele lyo ishewe otali kalelele.

Iiyimbi yimwe mbyoka ya thikama mondjila yethigathano ewanawa lyomahupilo gaNamibia oya kwatela mo, ongundu yaaniilonga inaaya dheuka nawa, uudhigu okumona oshimaliwa shokulongitha, ompango yaaniilonga yuudha omangambeko, okulonga pwaana eitulemo; uulingilingi osho wo epangelo itaa li longo nawa ngaashi sha tegelelwa. Oshikwa wo okwaa kalapo kehala limwe mpoka tapa adhika iinima ayihe ya pumbiwa komupunguli .Ondjila yoku shangitha ongeshefa moNamibia onde natango, oshoka iipumbiwa oyindji mbyoka omwi indili e na okugwanitha po, sigo oompaka yo ishewe ohayi kwata ethimbo ele okumanitha.Egandjo lyoomapitikilo gaamboka ya hala okuya ya longe olya huepopala okuza tuu sho Oshikondo shIikwagumbo sha etapo omalunduluko. Ihe nando ongeyi omulandu omupe ngoka gwa etwapo tagu pula aanangeshefa okuza koSouth Africa ya kale taya indile oopermeta dhiilonga ngele taye ya okulonga muka, nguka otagu nayipike elunduluko ndyoka lya adhika opo lye etwapo.

Natango oshidhigu kaanangeshefa aashona noyopokati okupewa omikuli okuza komahangano gopambaanga osho wo okumona omahala gena iipumbiwa yopamuni mpoka taya dhike oongeshefa dhawo moondoolopa dha yooloka.

.Omalunduluko inaaga tengenekwa momilandu nomoompango dhoondoolopa oga ulikwa kaanangeshefa ongo gamwe gomiiyimbi yokungeshefa moNamibia.

Opo tu soshimpwiyu kutya oshitopolwa shethigathanopo ewanawa momahupilo otashi yi komeho otuna okukwashilipaleka kutya omautho nomilandu ndhoka dhilipo itadhi ngambeke noku shunitha monima ethigathano po ndika ndele ndhika nadhi kale tadhi humitha komeho ethigathano po pamahupilo moshilongo.

Onkene otuna okukala nondjila ya tulwa mumwe kombinga yoshitopolwa kehe shondungethaneko ndjika opo owala omalalakano getu ga vule okuninga goshili.Otwa pumbwa okukatuka oonkatu dha kola mokutala noku soshimpwiyu kutya iilalakanenwa yondungethaneko ndjika oya tulwa miilonga noku manithwa.

Otashi nyanyudha okumona kutya omalutu omagandji yakulo ogendji otaga longo nawa nuuthemba wokukala nomaliko owa gamenwa,osho wo opena i iyukithilo mbyoka tayi kwashilipaleke kutya kapena ngoka ta thindilwa kongudhi oshoka moshilongo omuna oohofa dhi ithikamena.

Shika oshetu pa omukanka omwaanawa hoka tatu tungile..

Pahapu dhoWorld Economic Forum oshowo Ombaanga Yuuyuni iiyimbi yimwe ya guma omuthika gwetu gwethigathanopo momahupilo oyo okulonga kwa nkundipala, okwaana eitulemo miilonga noshowo aaniilonga oyendji inaaya dheulilwa iilonga nawa.

Okulonga nawa no nuudhiginini otaku vulu okukolekwa uuna twa nkondopeka iiputudhilo yelongo osho wo twa longitha owino yuuteknologi.

Ombinga yonkalamwenyo ndjoka ya guma nayi oshigwana ngaashi elongitho nayi lyiikolitha niingangamithi ohayi nkundipike okulonga nawa kwaaniilonga.Oluhepo ndoka halu holoka lwafa ondjala nuuthigona oyo iinima yimwe mbyoka tayi gwedhako konkalo yiilonga ya nkundipala momahala ga yooloka moshilongo

Omalalakano gaHarambee niizemo ye kombinga yethigathano.

Iizemo mbyoka ya tegelelwa kombinga yethigathano momahupilo oyo okuhwepopeka omuthika gwetu gwethigathano po ngoka nena guli ponomola ontine noku gu yambula po okuya pombanda nokukondjela ehala lyotango ongo oshilongo shomahupilo itoo ga pewa nando okulye okuya pomumvo 2020, pashiyelekitho sho

World Economic Forum Competitiveness Index osho wo shoka shOmbaanga Yuuyuni shoka hashi ulike nkene oshipu oku tameka ongeshefa moshilongo shontumba[World Bank’s Ease of Doing Business Indicators]”.

Omathaneko noonkatu tadhi katukwa okwaadha shika, okuninga Namibia oshilongo shina ethigathano pamahupilo nawa muAfrika okuya momumvo 2020 otuna okutulapo Ompango yokuhumitha komeho omapungulo moNamibia. Shika otashi ningwa moku sa oshimpwiyu kutya Ontotwaveta ndjika oya pitithwa moParliamende, osho  wo kutya omilandu,oompango niihili yaapunguli oya nyanyangidhwa nokutseyithwa momvula yotango yetulo miilonga lyondungethaneko yoHarambee.

Oshikalimo shoveta ndjika otashi kwatelemo  iinima mbyoka tayi hili aapunguli, egameno lyaapunguli, eikalekelo lyiikondo moka aapunguli taya tula iimaliwa yawo osho wo okutomona iikondo mbyoka ya simana koshigwana.

Omahupilo otaga ningwa geli nawa pathigathano sho tatu tula miilonga omathaneko gondjila yokupungula yomumvo 2010.Omathaneko ngoka tatu ka tula miilonga pautho lyondjila ndjika.Okulundulula eshangitho lyoongeshefa osho wo eliko lyopandunge.Pahakololo lyOmbaanga yUuyuni kombinga yUunangeshefa, Namibia okuli pondondo 164 miilongo 189 ngele tashiya pomukalo omupu okutameka ongeshefa mu ye.

Otatu ka longa neendelelo okutala kutya oveta yi na sha nuunangeshefa oshowo eliko lyopandunge oya pitithwa koParliamende  omanga Septemba inaa shangwa nuumvo. Otatu soshimpwiyu kutya olutu oluwiliki lwoongeshefa nuuyamba wopandunge olwa dhikwapo luudha okuya mu Desemba nuumvo. Oshowo otatu longo noku hwepopeka omukalo gwoku shangitha oongeshefa opo gu kale omupu.Olutu lwoongeshefa neliko lyopandunge otali kala oshitopolwa shomayakulo ngaka.

Pethimbo Harambee ta tulwa miilonga otatu ka soshimpwiyu kutya aaniilonga ya pyokoka oya pewa uunongo miilonga yawo tashi pitile mokudheulilwa iilonga. Otatu ka pupaleka wo ondjila ndjoka hayi landulwa uuna omugandji gwiilonga a hala oku etamo aaniilonga aanawino moshilongo.Oshikondo shIikwameni Niiyelo yoKoongamba otashi ka longa shika moku zimina mbala omaindilo gaaniilonga mboka yena omaithano gapumba opo ye ye ya longe moshilongo.Okulonga neendelelo huka otaku tegelelwa ku kale kwa ya miilonga oku uka pehulilo lyomwedhi nguka.Mombepo yaHarambee okwa tokolwa opo mEwilikongundu Lyokutaambelamo aantu mu kale wo omukalelipo gwoshikondo shopaumwene. Ewilikongundu ndika olyo hali konakona omaindilo goovisa dhiilonga.

Otatu ka soshimpwiyu kutya Ompango yokulanda Iipumbiwa yoshigwana nokupewa iipumbiwa okuza koshikondo shopaumwene oya opalekwa , naashika otashi fala medhikopo lyoongeshefa ooshona nodhopokati dhili omilongo ndatu okutameka omumvo omutiyali gwetulo miilonga lyaHarambee.

Opo tu shonopeke ompumbwe yomahala gokudhika oongeshefa miilando otatu ka longekidha noku tula omayakulo gopandoolopa momahala omathele gane nomulongo nagatano , tashi tameke momumvo gwotango gwaHarambee.Omahala guunene wohekta omulongo nantano otaga opalekwa moVenduka nomahala goohekta omathele gane otaga opalekwa mOmbaye.

Eopaleko lyomahala ngaashi ndika otali ka ningwa wo miitopolwa yilwe moka oshikondo shopaumwene shina oonkondo.Mombepo yoHarambee, evi omalelo giitopolwa no giilando otaga indilwa geli gandje kaanangeshefa kondando oshona nenge inaa ya pulwa okufuta nando osha.

Kombinga yeshangitho lyomaliko otatu ka soshimpwiyu kutya olutu olushangi lwomaliko oluna aanawino ya pyokoka mokushanga omaliko  opo ethimbo lyokushangitha omaliko ngoka lyaakale we ele unene ngaashi hashi ningwa pethimbo ndika.Ngashingeyi ohashi kwata omasiku 52 okushangitha etungo. Otatu ka longa opo ethimbo ndika li shonopekwe okuya pomasiku 25 okuya pomumvo omutine gwaHarambee.

Okuhuepopeka omuthika nongushu yelongo otatu ka tala kutya ondondo yepito yaalongwa moGrade 10 noGrade 12 oya ya pombanda noku kala piitsa 24 osho wo omilongo 30 moongundu ndhika.Yo osimbole yokupita Oshiingilisa  tayi yeluthwa okuza pu E nenge poopelesenda omilongo ntano okuya poopelesenda 60 momumvo omutiyali gwaHarambee. Otatu ka soshimpwiyu wo kutya iiputudhilo yetu yopombanda oya opaleka omithika dhayo opo yi kale yili nawa noyili meni lyonomola ontimilongo ndatu momusholondondo gwiiputudhilo iithemba moAfrika.

Otatu ka tulapo ondjambi pashimaliwa okukumika iiputudhilo yopombanda ya Namibia mbyoka tayi ka longa opo yi kale meni lyiiputudhilo omilongo ndatu mbyoka oyo hayi longo nawa menenevi Afrika, mbyoka ya tulwa momusholondondo hagu ithanwa

Africa Universities ranking Index.

Otatu dhikepo endiki lyokulonga nawa momvo omutiyali gwaHarambee .Ndika otali ka wilika noku tala iilonga nelongo nawa lyaaniilonga aaNamibia  oshowo okugandja omathaneko nkene iilonga tayi vulu okulongwa nawa pomuthika gwopombanda. Oonkundathana poompito dhuuthwa pokati kepangelo noshikondo shopaumwene odho oshipatululo shesindano ngele tashiya poku etapo oompito dhiilonga oshowo okukokeka omahupilo.Onkene mombepo yaHarambee otatu dhikepo  oonkundathana dhepangelo noshikondo shopaumwene ndhoka tadhi kala noku tothamo iikundathanwa noku yi monena omayamukulo gomondjila.Etsakaneno ndika otali kala hali ningwa lwaali momvula kohi yuunashipundi wOmuperesidente, lyo otali kalwa kOominista dhoKabinete  naakalelipo yoshitopolwa shuunangeshefa.

Ongundu ogandjimayele pamahupilo yOmuperesidente otayi ka ovololwa niilyo yayo otayi ka ulikwa kOmutse gwoshilongo okuza maanawino yomegumbo taya kwathelwa komunawino a simana tazi pondje.Ndjika otayi ka dhikwa po momumvo gwotango gwa Harambee.

 

LEAVE A REPLY

Please enter your comment!
Please enter your name here