Oshinakugwanitwa osha lye okutseyithila mboka ya valwa noHIV

0
181

Oshili ngashinegyi ngele Namibia itaya ningi posha, oshilongo ota shi ka shuna monima ngele tashiya kekondjitho lyombuto yoHIV/AIDS, unene ngaa shoka aantu yena eipulo kutya olye naanaa ena oshinakugwanithwa okulombwela uunona mboka nokuli uli ngashingeyi aagundjuka kutya oya valwa nombuto.

Oshoka natango oshi li tashi kumitha kutya opuna natango aagundjuka yeli moshigwana ya valwa nombuto, yena sigo opoomvula 25, ihe kaye shishi kutya oye na ombuto, nonando oyeli kepango.

Momwedhi gwaziko miikundaneki omwali muna ehokololo tali zitha omahwilili moka omukadhona gwoomvula omulongo 18 ta hokolola kutya okwali ashike a lombwelwa kumwayinakadhona komeho gomumati gwe kutya aniwa ye okuna ombuto nomiti ndhoka ha nu odho mbuto yoHIV, ano eeAnti Retroviral.

Shika okwa ti oshali she mu uvitha nayi oshoka aniwa okwa kala a putudhwa kuhe ngoka asa, ashike nando a ehama ethimbo ele, ina lombwelwa kutya okwasa koshike.

Iinima yoludhi nduka, ngaashi naana shoka shomugundjuka nguka oi li mo oyindji moshigwana ngashingeyi. Olundji aavali nenge aatekuli yaanona mboka ya valwa ye na ombuto, ohaya kala ya nyengwa okulombwela aanona mboka kutya oye na ombuto, nonando yeli kepango ethimbo ele. Ishewe aanona mbaka oha ya yi woo kiipangelo hoka haya ka pewa omiti, ihe natango mbela aapangi nenge aalongi yuundjolowele ihaya popi kutya omiti ndhoka taya gandja odha shike, nonando aanona mboka paife nayo aakuluntu.

Epulo olili mpaka kutya olye naanaa ena oshinakugwanithwa oku lombwela aanona mbaka kutya oye na ombuto, na ethimbo olini lyo opala opo ya lombwelwe?

Eyipulo ndika olya tukuka oshoka, aanona yopaife oha ya koko mbala na oha yi ilongo omilalo poomvula ooshona. Ano ohaya tameke okuya momilalo omanga yeli aashona, naashika osha nika oshiponga, ngele oya yi momilalo naanona ooyakwao mboka yena nenge kaaye na ombuto. Shoka tashi etitha aanona inaa ya valwa nombuto ya kwatwe koHIV pepipi eshona, nonando kaya li ya valwa nombuto.

Onkene osha simana noonkondo opo oshilongo shi konge omukalo nokutameka oku tseyithila aanona mboka ya valwa nombuto onkalo yuundjolowele wawo yene, opo ya gamene ooyakwao mboka kaa ye na ombuto, na opo woo nayo yene ya vule oku kaleka po oonkalamwenyo dhawo, yo ya hungwe omwenyo.

Ihe kakele kaagundjuka mboka ya valwa nombuto, opuna woo aantu mboka ya kwatwa kombuto sho ya koka nota ya lumbu nombuto ashike natango kaye uvite ko oshinakugwanithwa shoka yena nokaye na uukwawo wanankali oku yaalela aanona, unene tuu uukadhona mboka haya yi nayo miihulo.

Okugadja ombuto komuntu omukweni omanga ushishi oshinima sha puka noonkondo na oshatalika oko onga uulingilingi moshikondo shuuyuki shaNamibia.

Ngashingeyi Namibia okwa tseyitha omwaalu guli pombanda gwaagundjuka mboka taya lumbu nombuto. Oshilongo oku pitila muuministeli wuundjolowele wa tseyitha kutya ngashingeyi moshilongo omuna oombuto dhopaali yimwe oondjoka yili kepango omanga onkwawo oondjoka ompe inayi mona nale epango.

Osha simana opo elombwelathano kombinga yomukithi li simanekwe opo aantu ya kale yena uushili ya lombwelathane mpoka ya thikama opo tu yande etaandelo lyomukithe lyaaye komeho.

Osha simana woo opo oomeme yeli momategelelo ya simaneke okuya koshipangelo mbala opo ya ka konaakonwe yo ya pewe omiti dhoku keelela ombuto okuya kokanona oku zilila mumeme.

Pethimbo ndika oshikondo shuundjolowele shiipyakidhila noshikonga shekenko, aalumentu aaNamibia naya kale yeshishi kutya oye na oshinakugwanithwa okukelela etaandelo lyombuto tashi pitile mekenko lyaalumentu. Ano aalumentu aaNamibia natu yeni tuka kenkwe.

LEAVE A REPLY

Please enter your comment!
Please enter your name here