Sheefeni a kumika oshiwana shili konaakonife oHIV

0
324
Immanuel Sheefeni eli na Kansela woshikandjohoololwa sha!Nami#nus Jan Scholtz, pombelewa yoshikandjohoololwa. 

 

Lüderitz – Omuungaungi  nomupukululi wovanhu ovo vena ombuto yo HIV/AIDS moNamibia Immanuel Sheefeni, okwa tameke noshikonga shoku udifako, nokupukululula , oshoyo okuyandja omayele kovanhu ovo vena ombuto yo HIV/AIDS.

Sheefeni ota tumbula kutya oshikonga shokupukulula ovanhu kombinga yomukifi wo HIV/AIDS okweshi hovela momafiku 2 Mai neudo nokwa faneka taka kala a pukulula ovanhu moitukulwa aishe ili 14 moshilongo, omo ta ka xuuninwa noku yandja omapukululo moshitopolwa sha Khomas,  mo 30  Novemba 2016.

Pefimbo ali elipyakidila noku pukulula ovanhu moshikandjohoololwa sha !Nami#nus mEtivali loshivike eshi, Sheefeni okwa kufileka Kundana, kombinga yo lweendo laye. Okwa tumbula kutya okwa tameka noshikonga shoku udifako oshiwana kombinga yomukifi wo HIV/AIDS, a hovela moHardap noikandjo hoololwa aishe ilimo.

Oshivike eshi okuli moshitopolwa oshitivali palandulafano laye  moshitopolwa sha //Karas no kwafaneka opo a pukulule noku udifako ovakalimo vomoikandjohoololwa aishe moshitopolwa, opo adule okuya koshitopolwa osho tashi landulako sha Otjozondjupa.

Etumwalaka olo ena moshiwana, olo okutwa ovanhu omukumo opo veke li konaakonife, ye ta kumike yoo ovanhu ovo vena ombuto veli tulemo mokunwa omhiti davo pefimbo, noku landula omalombwelo aeshe oo tava pewa kovahakuli.

Sheefeni okwa tumbula kutya molweendo laye ota ende yoo tatu omukumo noku kumaida ovanyasha moshilongo  ovo inava kwatwa kombuto yo HIV, veli humbate nawa, opo ombuto iheva kwate.

Sheefeni okwa tumbula kutya okwa mbilipalelwa fiyo opapa kombinga yoshikonga osho elipyakidila nasho, ota ti nande sha li shemu djuupalela petameko, okwa tumbula kutya oshe kemu pupalela eshi akufa etokolo opo a longele kumwe nooKansela voikandjohoololwa.

Ohoni oyo, ili eshongo linene, a didilika okuhovela eshi a tameka noshikonga eshi. “ Eshongo linene olo nda didilika olo ohoni, oyo unene tai dana onghandangala, ovanhu otavafi ohoni okuya veke li konaakonife, Nongeenge nee ova ningi elao ndele  tave likonaakonifa, natango tuu ohoni yokuya va ka tambule omhiti nayo ohai va kwata. Ohoni oyo ngoo natango ta yi imbi ovanhu ovo vakwatwa kombuto , va shiivifile ovapambele nookaume kavo opo vadule okumona omavatelo ngaashi ame ndeshininga.” Sheefeni osho ayelifa.

Sheefeni okwa tumbula kutya,okukala una ombuto yo HIV/AIDS ndele ouna ohoni, ino manguluka okukatala omhiti doye noku dinwa pefimbo, oshoyo okushiivifila ovapambele, nookaume koye, oshina owii muhapu. Osho nee Sheefeni a tokola aende noshilongo ashishe yee a yandje omapukululo noku udifako oshiwana opo shi li amene komukifi wo HIV/AIDS.

Sheefeni okwa holola nghee eudite etumba komapukululo oo ta yandje moshiwana kutya otaa kwafa, osho ta tumbula kutya osha kolekwa keengodi odo tadi mu landula okudja kwaavo a pukulula okudja nghene ahovela pehovelo la Mai 2016.

“Eshi osho shi li elalakano lange, eenghundafana nomapukululo kombinga yomukifi woHIV/AIDS dikale po omafimbo nomafimbo, ndele ku ha teelelwe ashike efiku lo AIDS mounyuni, opo ovanhu tava ningi oikonga yomapukululo!” Sheefeni osho ayelifa.

Sheefeni okuna etumwalaka eli yukifa kovayandji voilonga, opo vakale nokumangulula ovanailonga vavo ngeenge tava pulwa va pewe omapukululo oludi eli, oo Sheefeni a tumbula kutya ohaakwata ashike ominhute 40 lwaapo.

“Omapukululo kombinga yomukifi wo HIV/AIDS, otaa kwafele pakupukulula nokuyandja omayele kovanailonga velikonaakonife, naavo tave ke lihanga vamonika ombuto yo HIV vadule okukwafelwa opo va dule okukala veli moundjolowele, va dule okulonga oilonga yavo nondjungu!” Sheefeni osho a tumbula.

Etumwalaka la Sheefeni koshiwana olo eli kutya , oshiwana ina shihepifa nande eedjo depangelo, ovanhu na va talelepo omandiki oundjolowele opo ve ke likonaakonife, va shiive opo va fikama. Ou weke lihanga ino monika ombuto, to li kwata nawa, naau taka monika ombuto to kongo omakwafo udule okukwafelwa.

Sheefeni okuna eiindilo koshiwana, shi hulifepo oku tongola ovanhu ovo vena ombuto yo HIV/AIDS, opo ashike ovanhu ovo vena ombuto tava dulu okumanguluka nokunwa omiti davo vehena ohonhi yasha.

 

 

 

 

 

LEAVE A REPLY

Please enter your comment!
Please enter your name here