TUYENI KOLUPALE LA TUYENI: Omunambelewa, a holapo omukongi woilonga.

0
356

VaNamibia, efimbo limwe ngeenge andi popi nanye pamishangwa ngaashi ngaha, oshili ohandi kala ndaeta onghenda osheshi oshilongo shetu opo ashike sha mono emanguluko. Ashike vakwetu ava vadalwa pamwe nemanguluko monena ota vati, otwa manguluka momido domafele da pita molwaashi inava mona eshi sha ningwa po.

Okakadona keedula 23 kedina Menesia yaKalola, oka li taka kongo oilonga peembelewa dimwe mondinga ndinga yoshilandopangelo. Efiku olo Menesia okwa enda peembelewa dihapu moshilando ta kongo oilonga, ashike onghumwe yakula nonghenda oyali apa kutya peembelewa apeshe apa apita, okwa hanga pa tulikwa ombapila komuvelo yashangwa mOshiingilisha nomOshimbulu nde nomOshiwambo taku ti, ‘kapena oilonga!’.

Elao nee mbela ilo omupya waMenesia, omanga ashike ina kwatwa komhepo yokushuna koKatutura okwa hanga po ombelewa imwe oyo natango komuvelo ya shangwa naana ngaashi dikwao nokutya kapena oilonga, omanga ashike omona waKalola ta lesha, okwa mona omunambelewa umwe womulumenhu temu talele mekende, okwa tameka okumu lapa euye kuye.

Omunambelewa Shiyelekeni ya Hamauta, okwa tameka ta pula Menesia eshi afika puye ta ti, oto kongo shike nowa hala shike pomuvelo opo? Menesia ta nyamukula ta ti ohandi kongo oilonga. Mr, Shiyelekeni okwa pula a lulika oshipala ta ti kushi okulesha nande aayee? Kuwete kutya opa shangwa taku ti kapena oilonga ilo kuna omesho?

Nonande Shiyelekeni a lombwela Menesia kutya kapena oilonga, okwe mu lombwela a kale omutumba koshipundi shimwe shi li mombelewa ya ye. Shiyelekeni okwa tameka ta pula natango ta tale nawa Menesia nde ta ti, owa ti oto kongo oilonga? Kakadona okwa nyamukula meendelelo molwaashi oteli pula mutu kutya nena owo ku ninga ngo elao nde ta ti, eheno Mr oshili ohandi kongo oilonga.
Mr okwa yamo vali ta nyamukala Menesia ta ti, pombelewa yetu kapena oilonga, ashike ame ohandi nyengwa kunye oukadona molwaashi omuhole ashike okukwafelwa nde nye kamu hole okukwafela vakweni.

Menesiya okwa nyamukula omunambelewa ou ta ti, tatekulu she ngeno ohatu kwafele ngo ovanhu ndele ne molwaashi she katuna eshi tuna na opo hatu kongo oilonga omunhu ngeenge owa mono oilonga shili oto dulu ngo okushakena namukweni ndele to mu landelemo.

Mr okwa tameka ta pukapuka komutwe nde ta pula Menesia ta ti, oinima ihapu ihapu to dulu oku yandja owa mona po ashike oku landelwamo, osho oshinima ngo shimwe ndishi wete wani, to popi ashike wafa okaana kashona ove owa kula ngo una eendunge ounyuni ne opo paife owa tembuka po ovanhu ihava longo vali ngaho ngeenge owa hala ndiku pe oilonga, shapo ongeenge hatu popi nde naame to vatelenge ngaashi handi ku vatele.

Omona waKalola ye alulilwa ne nokoufyoona waye okwa tameka ta tale pedu molwaashi ka kwali naana eudite kutya omunambelewa ou okwa hala okweetapo shike, okwa pula omunambelewa natango ta ti, Mr paife ame ohandi ku vatele shike ame oshili kandina sha nomokandjato kange omu okwali ashike ndaenda nee dola 7 ndedi landapo nale oukuki kOshingela oku nda pita oshili tate wange.
Mr okwa pula Menesia ta hale oku handuka nde ta ti, mani hano ove owa dja naana oshilongo eshi peni? Namibia la manguluka nale nale ndele ove natango onghe ngo uli konima yefiya, walye hano to kala ino mona oilonga nena omunhu we eshi okupopiwa naave oshikulunhu.

Menesia natango okwa dimbuluka meendelelo kutya eshi kwali adja kOwambo okwa li adjako nokadini kombike kovanhu ka ina  koka 5 lita kwa li ye ya okulandifwa okwe li pula ne kutya molwaashi omunambelewa ou okwali ngo ta monika a kasha na pamwe ota dulu nande okumu denga okati keenyala kokanepe kombike una ngeenge ombike yameme waye yapwapo molwaashi natango okuli ashike mekutu.

Menesia okwa tameka ta manemo omesho ta tale mu Shiyelekeni nde ta ti, ahowe tatekulu oshili ino ningange ngaaho molwaashi oshili naame mutu ohaidulu ngo oku kuvatela una ngeenge ombike yameme ei ndadja nayo kOwambo oya landwapo oshili ngeenge omwa shaala okanepe kamwe otaka ningi koye tate wange.

Mr Shiyelekeni okwa lombwela Menesia nde ta ti, ame onde ku lombwela kutya oshili ngeenge owa pengepo ohaidulu okukupa oilonga ndele nongeenge ino hala, to kala ino mona oilonga nye mu ka tende eengongo deni noonyokokulu keeWambo deni kwi.
Menesia okwa dimbuluka meendelelo kutya omunambelewa ou  mboli okwa hala okutila omeya monduda okwe mu pula nde ta ti, tate omunambelewa ngaho owa hala vali okutya ngaipi mboli? Eshi wa hala ndi ku pepo sha hala okutya ovanhu aveshe ava va kutwa omu ovekupapo ilo aame ashike wa hala okunyikifa oulai tate wange? Paife eshi wa hala ndiku pepo okaambani ei oyo ye ilo ove omuwiliki ashike ye namwene wokaambani eshi tekeya ta ti nadi mu pepo vali tashi ti osho hamu yandje oilonga momukalo wa xwiyaukila ngaho?

Ame elalakano lange eshi handeende ohandi kongo oilonga ndele kandililepo okupapo ovashamane vovanhu ava handi hange meembelewa, naashi ne wa hala ndiku pepo omukulukadi woye owe mu lombwela nale molwaashi ove oto monika ngo kutya owafa ngo wa hombola?

Menesia osho kwali ta pula Shiyelekeni ngaho a handuka ita dulu noku mu tala, ashike Shiyelekeni natango okwa twikilako nde temu lombwele ta ti, oshili mboli omukulu wonale ou ati ou waxuwa etoko nande vava oshili ngo, ondi shi liwetele ne kwoove wa hala okudja pomaadi ino djenga osho to kala ngaho.

Menesia osho a itavelepo omunambelewa ou keenghono dae mwakwatelwa okaheka koovenevene molwaashi okwe mu lombwela ta ti ngeenge okwa ningi waye ote mu pe nopoosha yoilonga yopombada molwaashi okwa ningapo waye.

Konima yefimbo Menesia eshi a tameka oilonga okwa tulwa naana pondondo yopombada osho nokuli kwali sha kumwifa novanailonga ava va hangika ponhele opo molwaashi kave shi naana kutya omunhu okweenda ngaipi aninge noforomana yavo omanga ota kuti ngo kutya okwafa ngo ehena omikanda doulongelwe da wanapo.

Teelela ne Menesia anyikifwe oulai komunambelewa ou ye ngeno okwa fa ngo a kotoka nawa, konima yefimbo Menesia okwa ningapo oufimba womunambelewa ou,nefiku limwe okwa ningila Shiyelekeni oka sms taka ti, Mr Shiyelekeni ou shi ngo kutya mboli mbela ondafa ngo ndi he liwete nawa mbela oudano wadja ne pondje wa, oinima mbela weitila omeva ne shiveli wa.

Mr Shiyelekeni okwa alula osms ya Menesia eishanga yanyika eendaka doumbalabali tai ti, hei tala ngeenge kuli wete nawa kufa eshipili opo ulimone nawa, wo ngeenge ototi oudano owadja pondje ava kwali tava dana pondje ovo vaninga ondwi opo ukale we heliwete nawa yo oinima ngeenge ototi oya tikila omeva inda uki inyaneke ino ningilako vali e sms doye kongodi yange da shangwa mOshiwambo tadipopi oulai oku to mangifa nge nokuli nokomukulukadi wange ame onda hombola nge ku shishi.

Meme! ngeenge mboli ovanhu ava tava ka mona oilonga neepoosha dili pombada moshilongo ovava tava kapapo ovayandji voilonga, epulo olili ne apa kutya she ne ava twehena eshi shokupapo ova yandji voilonga ilo inatu hala ngo okuvapapo tashi ti ondjodi yoku mona oilonga moshilongo shetu inatu itwa vali mboli oshili vakwetu.

Menesia osho ne aka mona okaana aka komunambelewa ou, ashike Mr Shiyelekeni okwa nukila pomutenya kutya ye edimo kalishi laye noshitivali okwa lombwela Menesiya ta ti, ngeenge wa hala ngo utulwe modolongo yaalushe udika ngo komukulukadi wange to popi nde kupa omapunda uta, ngaashi ngo ha longele koshikondo sheedolongo nale.

Paife eshi hatu popi ngaha, Menesia okwa mona ne nawa oilonga, ashike okwa dala okaana kehena xe molwaashi okwa tila oku ukilila omunambelewa tate Shiyelekeni kutya oye mwene wepunda okwa ti wa otatulwa moipandeko nokeemwiya dashinana dahomata molwaashi mboli ohai momilele novashamane vahombola.

Va Namibia, epulo olo ne eli, oshike shaetifa opo Menesia adale okaana kehena xe? Oulayi wae pamwe noluhepo molwaashi okwa li ta kongo oilonga? Ilo eendunge da Shiyelekeni edi da nyika oumbalabali nokuya momilele novakongi voilonga osho he shiningi ngaashi naana mbishi a tela eemhuku moshimbale shoufila womahangu? Nyamukuleni utale vaNamibia opo tu mone omapuko kutya naimboli okukwetelwe komesho koolye.

JOHN YA TUYENI
MRTUYENI76@GMAILA
CELL 0812988549

LEAVE A REPLY

Please enter your comment!
Please enter your name here