A hepeke nokutidha omukadhi naanona megumbo

0
265

 

OSHAAKONDWA –“Oshilwadhi shika, okwa tsu ndje nombele molwaashoka nda kutha ekanuwa mepya e te li. Mpaka okwa tete ndje nekatana. Mpaka okwa dhenge ndje noshitenda. Ombole ndjika onda dhengwa komukiintu omudiayakoni gwongeleka yaELCIN ngoka eli kuume ke… Oha yalula oonyama ngele tadhi tulwa mombiga. Ina tu ethelwa okulya omatanga mepya nenge omakunde, nande otse hatu ga longo, oye hega tona noku ga tula mombiga. Iha landa sha megumbo. Ngele okwa landa omboloto ohe yi tula pomitse poshigwilo she etiilile, itape ko nande okanona…”

Ngoka ogo omatumbulo komukiintu Rauha Hainghumbi ngoka ngashingeyi a tidhwa megumbo komusaane Kleopas Amutenya nonande oye eli tunga, nokuli paife a dhengela okabashu moshana.

Hainghumbi ngoka eli omukalimo gomOshaakondwa mOlukonda, okwali a holola oku uva nayi molwa omathindilo kongudhi ngoka tati ota ningilwa komusamane gwe oshowo kopolisi, tati nonande a kala nokukambadhala kopolisi okwa hulile muunyengi oshoka iha mono eyamukulo lyemu opalela.

Hainghumbi okwa holola kutya oya hokana na Amutenya ngoka mo2001, no yena uunona uyali mondjokana yawo. “Sho twa hokana otwa kala ngaa nawa ashike uule womvula yimwe. Omahepeko oga tameke mo2002 sho tate Kilijo nookume ke yaakiintu yatatu ya ponokele ndje. Okuza mpka okwa kala ha dhengendje, ta tetendje noombele nongele owa tala olutu lwandje oluna iiposho nda fikwa nonomagadhi omapyu, okwa kala handi mu tulile mo oprotection order kopolisi opo ando a kalendje kokule ashike oheya owala kena siku i iyuthile kudho,” Hainghumbi tati.

Molwaashoka anuwa oyali yena egumbo kOlukonga manga opo ya hokana, oshinima shika shomahepeko sho shageye okwali a tameke okutunga egumbo lye mOshaakondwa mono eli sigo onena, nomusamane okwali emu landulileko etaya kala ngaa megumbo lyawo moka siku nawa siku nayi.

Omukulukadhi nguka ta tsikileko tati okwa ka kanitha owala omukumo molwaashi iha mono ekwatho kopolisi nenge a yeko nokwa kala owala i idhidhimikila omahepeko ge oomvula adhihe ndhoka, Omusamane oye tuu nguka otaku hokololwa ali a tembukamo megumbo ta kala owala he yamo ta tutu mo iinima ngele omukulukadhi ayi kiilonga.

“Momasiku 30 Apiilili okwali a thigipo egumbo twaashi mpoka ayi noka galuka mo14 May, ngame onda adhika ndaya kohango kOkahao, onda haluka owala te dhengelwa ongodhi anuwa okopolisi nda holekapo anuwa oopela dhe niikutu ye ndeyi fikapo ashike shono ka shina uushili. Omaandaha goshiwike shika ondali nda dhengwa pomutima sho yali yeya pamwe nopolisi opo anuwa ndi zemo megumbo ndi ka konge mpa tandi kala, ye a vule a tembukile anuwa megumbo oshoka ita vulu oku kalamo ndilimo,” Hainghumbi tati.

Ta gwedha po kutya megumbo oonyenyeta dhowala ngele e yamo ye iha eta mosha anuwa. Ta holola kutya egumbo oye mwene eli tunga. Ota pula epangelo li mu popile moshinima shika, tati ita vulu a thigepo egumbo lye.

Yamwe yomaapopepi mboka yali ya kundathaniwa naye oya holola kutya omusamane oye tuu ngoka okwa kala ha hepeke omukulukadhi nuunona, teya kuthile omakaatana ye ta popi iidhilikwatya nuunona wu uviteko.  Nolundji omukulukadhi okwa kala ha ka konga omakwatho puushiinda ngele taya hepekwa ngaaka.

“Onkalamwenyo yandje naanona woo yandje otuli muutilwe molwaashoka okwa tameka ishewe te tu ningile omatilithi, onda konga ehala lyandje mpoka handi kala naanona ashike ngele ndayi kiilonga oheya ishewe ta ningile uunona omatilitho, tati anuwa okwa hala natango pehala mpoka twa tidhwapo ihe kandishi kutya omolwashike, otuli muudhigu no tatu pula opo tu popilwe moshinima shika,” Hainghumbi ta ti.

Momushangwa ngoka gwaza kompangu yomOndangwa otagu yelitha aahokanathani mbaka ya ka holoke kompangu momasiku 17 Juni nuumwo go omahokololo gawo ga ka pulakenwe. Omukuluntu gopolisi mOshana Rauha Amwele okwati oshinima shika osha thikamo momakutse, noyi itsakidhila nasho yo ya tale kutya omukundu ngoka taye gu kandulapo ngiini, omolwa omahepekathano momagumbo ngoka gi indjipala.

Sho a pulwa, Amutenya okwa lombwele Kundana anuwa omukadhi okwe mu tidha mo megumbo oshoka okwe mu ningi iinima oyindji noonkondo.

Ta ti okwa lombwelwa kaanona kutya omukadhi okwa fika po iikutu ye, na okwa hole ke po oopela dha. Ta ti wo omukadhi okwa eta okalima megumbo hoka ewete kutya osha fa sha nika uulodhi.

“Ashike ku na lela uuthemba wokupulandje omapulo ngoka. Ngele owa hala okuuva nawa ila kohofa u pule ndje mohofa. Epeko lyandje okolili,” osho Hainghumbi a yamukula omutoolinkundana.

Mwene gwomukunda Oshaakondwa Karel (Kaali) Kalenga okwa hokolola kutya omahepeko ngoka taga ningilwa omukulukadhi Hainghumbi komusamane oga thika momakutsi ge, sho omukulukadhi a kala nokuya oku konga egameno kegumbo lyamwene gwomukunda.

“Meme ngoka okweya kungame iikando ine sigo ihamano lwaampoka, nolwiikando ine sigo itano onda tumine Kilijo andola eye kungame opo tu popye tse tuuve kutya uudhigu oguli naanaa peni ihe ine shi ninga nande olumwe. Molwaashoka ihe ya, otu wete owala kutya oye ena epuko,” Kalenga tati.

Abuse3 Abused2 Abused-neo

LEAVE A REPLY

Please enter your comment!
Please enter your name here