Ingwe pomuthika gwopombanda …Iimbondi na Isaacs ya pewa omatemba omape

0
220
Eli moshikogo oshitimugoyi a nyanyukwa nomoshipala, Kapitiya gwoTigers  Abes Iimbondi. 

 

WINDHOEK – Oklaba yetanga lyokoompadhi onkulunkulu moNamibia Tigers Football Club oya shangulula ondjokonona muudhano wosoka sho enyakwa lyoliha ya Namibia nuumvo lya li lya          simaneke aadhani mboka ya longo nawa, lye shi ningi momukalo gwesimaneko enene.

Tigers oya li noshiithanene shegandjo lyomapole poshinyanga shiigongi sha Roman Katolika mondingandinga yoshilandopangelo Olyomakaya gapiti. Oh! Oshali oshiithanene itaashi pewathanwa.

Okuza sho ya kala momuzizimba nomunzile gwaakondjithi yawo muudhano wetanga lyokoompadhi yoo African Stars, Black Africa, Blue Waters, Orlando Pirates nopomathimbo ngaka omumwayinamati muudhano Tura Magic konyala uule womimvo omilongo ndatu,– Ingwe hugunina okwa papudhukamo moomposi moka a ningi omasiku.

Oshiithanene shika osha li sha longekidhwa nawa kutya ngaaka omuntu oto dhiladhila shika osha li tashi hala okupitapo pokudhana nawa kwosipana ndjika yaza moshitopolwa sha Donkerhoek moKatutura kaVenduka–omalongekidho oga ulike kutya Ingwe okwa tula omuthika guudhano we poshikolo sho pu ule.

Alfred Clayton, Omuwiliki gwiilonga mehangano lyoProfile Investments,ndyoka olyo hali kwashilipaleke okudhana kwa Tigers okwa kumitha oyendji mboka ya li aayenda poshiithanene shika sho a tseyitha kutya oklaba oya tokola opo yi gwedheleko komapandulo ngoka taga pewa yamwe yomaataambi yago.

Okapitiya omunwethimo gwoTigers ye ishewe omutaambi gomapapa gambalipalekwa goMTC Premiership, Abes Iimbondi okwa li omutaambi omunene ongulohi ndjoka. Omudhani gwomokati hatulamo ookoola moku dhanena ospana yopashigwana, nguka okwa hogololwa ongo omudhani kaakunawe gwomumvo guudhano, nokwa pewa oshipandi shooN$5,000 koomuma.

“Otwa tokola opo tu gwedheleko komwaalu nguka gooN$5 000 nooN$20 000 nomwaalu aguhe kumwe otagu kala ooN$25 000. Omwaalu nguka sho gwa fa ando toti ina gu gwana, oklaba oya tokola ishewe oku pa Iimbondi ehauto epe lyoludhi lwo Polo,” Clayton osho a tseyitha mokati koondigolo oshowo ehakelo lyomake.

Oshindji osha li tashi ya natango sho kwa hololwa kutya omudheuli gwospana ndjika ngoka a sindana omakopi ngaka iikando oyindji,Brian “Oubaas” Isaacs omwanamati gwomudhani nale goTigers a tseyika nawa Ferdinand“Buti Ferre” Akwenye, ota ka pewa omagano okumunyanyudha kakele koodola 5 000 ndhoka a adhika a pewa nale okupitila mepandulo lyomunashipundi gospana.

Isaacs, ngoka a kala ha longitha oshihauto shiilonga shosipana ndjika etemba lyuuyamba nondilo yoshiNdowishi limwe lyomwaangoka ga dhenga mbanda uuna tali matuka kopate ehauto lyezimo lyooBMW, okwa ti wa nali kale lye sigo aluhe.

Omupopi a simana poshiithanene shika okwa li, Alex Shimuafeni, omuyambidhidhi gwo Tigers omunene nomuputudhwa gwomo Donkerhoek moka a kala ti ilongo noku yama owino kaanamadhina moklaba ngaashi Uushona Hiskia, Alele Kapule, nakusa Teenage Iiyambo oshowo omukwati mokoola omulumentu gothika noshipapa sholutu Dax Andjamba, okwa shongo ospana yi holele noku tsikila niilonga yuudhano uuwanawa wonuumvo.

Tigers okwa sindana oliha  yoMTC Premiership nuumvo momukalo inaa gu ningwamo nale mondjokonona yuudhano  wetanga lyokoompadhi  eshi ningi e na ko natango omaudhano gatatu muudhano mbuka.

Shimuafeni okwa kala omukomeho nomunandjungu miilonga yoku kwatha nombepo ye yiilonga yohole oya kolekwa noku yambulwapo  koshinakugwanithwa she ongo  Omunashipundi nomutotipo gwoDonkerhoek Social Club, ehangano lyokugandja omakwatho kwaamboka ya pumbwa omakwatho.

Elalakano lyongundu ndjika olyo okuyambulapo  onkalo yaakokele, aanona ye li moluhepo oshowo oshigwana shoka shi li mompumbwe shomolukanda lwaDonkerhoek, mwa kwatelwa wo kapitiya nale gwospana ndjika Ndapewa “Bricks” Hangula.

Nguka okuli mokatemba sha landula oshiponga oshiwinayi shohauto moka a li.

Moshiithanene omwa li  aaholi yo Tigers osho wo aanambelewa naanamadhina  yospana ndjika mokati kawo tamu tumbulwa, Onesmus Shikongo Akwenye, Oubaas “Siwelele’ Mokwena, Sii Nampa Pescha, Demu Hipondoka, Hilifa Mbako, Escher Luanda, Dolly Nashandih, Irene Kurtz, Maggy Mbako, Commissar Olsen Kahiriri osho wo nee oohashike sha lye mongonga yaahumi moshilando.

 

LEAVE A REPLY

Please enter your comment!
Please enter your name here