Omeya gokohi yevi mOhangwena onzo ontiyali yaNamibia

0
339
Omeya taga zi mominino pethimbo BRG a li ta mboola iilambo yokulola oonkondo dhomeya ngoka geli kohi yevi moshitopolwa shaHangwena.

“Oshilongo osha pumbwa okukala nonzo ontiyali yomeya. Nguka ogo omukalo hagu longithwa muuyuni. Ngele opwa ningwa sha konzo yotango nena opena onzo onkwawo ndjoka tayi longithwa”

Ngaka omadhiladhilo osho wo omayele gOmuwiliki gOpoloyeka ya Ndowishi moshiputudhilo shedhina Institute for Geoscience and Natural Resources, Marting Quinger.

Quinger okwa popi ndhika moonkundathana na Kundana kombinga yokulongitha omeya ngoka geli moonzo dhomeya kohi yevi moshitopolwa shaHangwena.

Oshiputudhilo she shuunongononi wokohi yevi osha tile oshitopolwa shika oshina omeya omatoye kohi yevi ogendji ngoka taga vulu okukutha iitopolwa ayihe yokuumbangalantu enota uule womimvo odhindji.

Okwi itaala kutya ngele oholomende oya gandja oshimaliwa shokulanda iilongitho tuu ominino okufala omeya ngaka komahala gamwe nokiitopolwa yilwe moshilongo okuza kOhangwena nena oshilongo otashi vulu okukala nonzo yomeya ontiyali.

Quinger okwa ti ehangano lye pamwe naNamWater nOshikondo shUunamapya oyi ipyakidhila okungongapo omathaneko opo ngaka ye ga tumine koKabinete opo ya vule okumona oshimaliwa  okutulapo ominino ndhoka tadhi enditha omeya okuga fala kiitopolwa yimwe yokolundume. Okwa tengenekwa kutya oshitopolwa shokolundume oshi na konyala etata lyaakalimo ayehe moshilongo.

Nonando Quinger ina popya kutya ominino okuenditha omeya ngaka okuza mevi  moka geli  otaku kutha po oshimaliwa shithike peni, Kundana okwa uvu kutya  konyala oomiliona omilongo ntano otadhi ka pumbiwa okutunga ominino ndhoka okuza poonzo dhomeya mOhangwena okuga fala kiitopolwa yilwe muumbangalantu

Quinger ina koleka omwaalu ngoka nokwa ti NamWater oye ena okutengeneka kutya iimaliwa yi thike peni tayi ka pumbiwa moshinima shika.Okwa  ti omakonakono gawo oga ulike kutya oonzo dhomeya ndhoka ohadhi iyudhitha aluhe oshoka omeya ohaga ende okuza moAngola. Shoka inaashi tothwamo nawa ooshoka ashike kutya oku vivila komeya moonzo uuna mwa kuthwa gamwe ohashi kwata ethimbo lithike peni. Opo shika shi tseyike opena okufulwa omithima dhomboola ku talike kutya omeya ngoka geli mudho oge thike peni. Omumbooli gwomithima ndhika mbali okwa monika nale.

Pethimbo ndika ondoolopa yEenhana naakalimo yomOmundaungilo oha ya nu omeya taga zi moonzo ndhika dhokohi yevi.Okulongitha omeya ngaka koshigwana shika shomEenhana nOmundaungilo oshi li oshitopolwa shomakonakono okulola kutya oonzo ndhika ohadhi vivile ethimbo lithike peni konima sho omeya ga tekwa mo moomboola. Naashika otashi ka gandja uuyelele wa gwana okumona kutya oonzo ndhika otadhi kala ethimbo lithike peni.

Pethimbo oonzo ndhika dha monikile omumvo okwa kundanekelwe kutya uunene wadho otawu vulu okukandulapo enota lyoshigwana shokuumbangalantu konyala uule womimvo 400. Ihe Quinger okwa ti shika kashili mondjila.

“ Omuntu ito vulu okugandja ethimbo kutya onzo ndjoka otayi kala sigo uunake, shoka tandi vulu okupopya ooshoka kutya ompumbwe  nelongitho lyomeya muummbangalantu omumvo 2011 olya li alihe kumwe lyuuwindji wookubikemeta oomiliona 12 komumvo.Otashi vulika ompumbwe yomeya ndjika ya ya pombanda ngashingeyi okuyeleka nomumvo 2011. Omeya ngoka hatu longitha otwa kala aluhe hatu ga mono okuza koCalueque. Onkene ngele oonzo otadhi vivile nookubikemeta oomilliona hetatu nena ndjika otashi ti onzo ombwaanawa yomeya muumbangalantu.”

Quinger okwa gwedhapo kutya sigo oompaka inaya  tseya kutya omeya ge thike peni haga vivile moonzo ndhoka, otashi vulika ogendji nenge  omashona.

Onzo yomeya omatoye gokohi yevi ndjika oya kwata oshitopolwa shoombinekilometa ethele limwe okuza kOndobe oku uka kOkongo.

aquifer-2

 

LEAVE A REPLY

Please enter your comment!
Please enter your name here