Oshiluli sha fikile oohema dhe kolutu

0
1068
Josephina Wilhelm a lala nomutekulu gwe mepya pompile yawo pomukunda Epukunoyana.

ONGWEDIVA-Omukulupe gwomimvo dhi vule omilongo hamano gwomEpukunoyana moshikandjohogololo Ondangwa yokUushayi moshitopolwa shaShana okuli muudhigu sho ta mono iihuna koshiluli shoka tashi hanagula po egumbo lye nomulilo, noku ya dhenga.

Oshinima oshikumithi shoka sha ningilwa omukulupe nguka osho omulilo gwa fikile oohema dhe kolutu lwe. Omukiintu nguka okwali andola ta falwa kohipangelo, a zinda nayi komutse sho a dhengwa koshululi. Omupya omunene, mokatemba hoka a li ta falwa nako omwa ndwafuka omulilo e tau fike po iikute ye thiluthilu omanga yili kolutu.

Josephina Wilhelm gwomimvo 63 okwa kala momukunda ngoka konyala, omimvo dha pita pomilongo ndatu, eya mo momukunda moka sho a hokanwa mo.

Oshiwike shayi oyali ya ponokelwa kombepo tayi ya dhenge nondhimbo noshowo nomamanya kolutu omanga inaayi tomeka egumbo omulilo.

Wilhelm noyana ngashingeyi ohaya kala omutumba mepya moka ya ningi omasiku taaya lala oshoka egumbo lye olya fikwa po thiluthilu na ita vulu oku edhililwa oshoka sho ngaa ta ti kutya ota pewa omulalo go omulilo ogwe mu landula noombepo osho wo dha landulako tadhi mu dhenge.

Ngashingeyi ota ku hokololwa kutya Wilhelm okuli koyana kEndola hoka eli ta ti po hwepo konzindo ndjoka ena sho anuwa adhengwa nayi nomamanya molutu nomoshipala.

Okwa hokololwa wo kutya oshinima shika kaashi shiwike osha li sheya adha momumvo 2014 omanga omusamane gwe ali eno mwenyo no sha li she ya dhenga nayi noonkondo. Okwa ya pamwe nomutekulu gwe ngoka a kala naye megumbo ena omimvo 13 ali mondondo onti 5 posikola yopuushinda.

Ngashingeyi aniwa kEndola hoka yeli oku dhengwa okwa shonopala ihe oko ngaa eli taya itumbu oombole ndhoka ya dhengwa.

“Ngame kandishi kutya shika oshikwashike tashi tu monitha iihuna ngaaka. Omanga omusamane gwandje nonkelo yandje yena omwenyo osha li sha teta ndje nekatana moshipala moka ndali nde ehama. Ihe ngashingeyi natango osha galuka tashi fikepo egumbo ndika alihe,” Wilhelm ati ngaaka.

Wilhelm okwa ti oshikando shotango yali  ya tunukilwa koshinima shoka oyali ya ithana mo oongeleka opo dhi ya galikanene na oshali sha hulupo ngashingeyi okwa ti kutya osha geya noonkondo adhihe nosha halakanitha po egumbo alihe thiluthilu inaa pu hupa nande osha. Mwakwatelwa nomambo gosikola gomutekulu gwe.

Konima sho egumbo ndika lya pi oya kala taya lala mepya pokatalashe hoka yali ya pewa kaashiinda omanga inaya tameka okupya iikutu kolutu.

Ihe pethimbo ndika ohaya lala kokathaila kEndola oshoka aantu oya tila okuya pa omulalo oshoka oshinima ohashi ya landula nonando ina shiya landulilako kEndola.

 

LEAVE A REPLY

Please enter your comment!
Please enter your name here