A pulwa a fute iikombo yaantu

0
404
Yimwe yomiikombo yomusamane Andreas Tobias mbyoka ya tokoka omagulu molwashoka oya li ya mangwa noondhalate noku edhililwa moshigunda konima yoku yonagula epya lyomukulukadhi Helena Abed.

 

 

UUKETE – Omukalimo gomomukunda Uukete moshikandjohogololo Onayena okwali a pulwa opo a fute iikombo yaantu mbyono ali a manga noondhalate na yimwe oyali ya lopotwa ya kanitha omagulu.

Naku tamanekelwa oshinima shika Helena Abed okwa pewa egeelo lyokufuta oshimaliwa shithike poN$9,800 kaandja mwene gomukunda gwawo omanga omwedhi nguka inaagu ya pehulilo.

Okufutithwa nguka okwa zi miihokolola mbyoka ya ningililwe maandja Kleopas Indongo mwene gomukunda Uuyoka konima sho omutamanekwa a li inaa vulika keuthano kiihokolola kaandja mwene gomukunda gwawo Uukete.

Iihokolola mbika oya li yi na okuningwa kuyele nuumvo sha landula sho omutamanekwa a li anuwa a edhilile iikombo mbyoka moshigunda she noku yi manga noondhalate sigo yimwe ya tokoka omagulu.

Oshikwawo iihokolola ina yi vula oku ningwa pethimbo ndyoka iikombo ya li ya ehamekwa molwashoka ndyoka olya li lyomagongo, onkene mbika oya li ya undulilwa kethimbo lyokalo kathika pehulilo.

Sho omagongo ga kuka mwene gwomukunda Uukete, Tomas Shituku okwa li a ithana iihokolola, nomolwaasho ngoka ta ku tiwa oye ali a tete iikombo yaantu ka li iiyutha kompangu iihokolola oyali ya ndopa.

Tatekulu Shituku okwati iihokolola mbyoka oyali yu undulilwa komeho opo yi ka pulakenwe kaandja mwene gwomukunda Uuyoka, Kleopas Indongo.Mbika oya liko pehulilo lyomwedhi gwaziko, naanamukunda oyendji oyali ya holoka yo ya pulakene.

Abed ngoka taku tiwa okwa longo iikulumuna mbyoka okwali a tokolelwa opo a fute oshimaliwa shooN$9 800.00, omolwa iikombo yaantu mbyoka a ehameka nokulemaneka. Omutamanekwa otaku hokololwa anuwa a dhini wo oveta yopamuthigululwakalo sho a kala ta yamukula oohapu haadho.

Okwa pulwa opo a fute oshimaliwa shoka manga Juni inaa thika pehulilo, ye a kale eyi thikitha kegumbo lya mwene gwomukunda.

Tatekulu Andreas Tobias mwene gwiikombo mbyoka okwa ti oku uvithwa nayi ku naku manga iikombo ye, nokwa uvithwa unene nayi sho a kala teya tuku, ye teya ula anuwa omalaka omawinayi.

Nonande ali a pulwa ku  mwene gwiikombo a gandje ombili okwa kala owala anuwa a tsikila noku popya nayi, naasho ya yi kaamwene gwomukunda okwa kala ta popi ngaashi a hala. Mwene gwomukunda Uukete tatekulu Shituku okwa indile aakwashigwana ya simaneke iimuna ya yakwawo, yo ya yande okuningila iimuna yaantu omiyonena.

“Ngele owa mono kutya iimuna yaandja ngandi oya yona epya lyoye kambadhala wu monathane nooyene yiimuna mbyoka, nenge wu tseyithile mwene gwomukunda, oshoka oku ehameka iimuna yaantu noku tuka ooyene ka shina shoka tashi etapo, kakele kuutondwe pokati kaantu, natu iyutheni koompango dhelelo lyopamuthigululwakalo tse tudhi kalekepo ngaashi shu uthwa,” Shituku ta ti.

Ta tsikileko tati oshinima shika oshiyemateka unene omuntu wa li niimuna yoye ashike ngaashingeyi otayi ende owala tayi shongola, yo itayi vulu noku adha we komahala hoka hayi napele, ohayi kala owala meni lyenkolo. Ta pula woo aaniimuna ya takamithe iimuna yawo, yo kaa yi ka yonagule omapya niilikolomwa yaantu.

 

PAY-3-(2) PAY-3-(1)

LEAVE A REPLY

Please enter your comment!
Please enter your name here