Uunshitwe nawu kalekwe po

0
309

 

UUYOKA – Mwene gwomukunda Uuyoka moshikandjohogololo Onayena, Kleopas Indongo okwa pula aakwashigwana opo ya gamenene po uunshitwe, yo ye wu kaleke po ngaashi shuuthwa.

Mwene gwomukunda ndhika okwe dhi popi sho a li a kundathanwa naye shalandula omahokololo gaamboka taya tete omiti nokumbugaleka iiheke. Oyendji yomaakwashigwana oya kala taya nyenyeta aantu taya zi koombinga noombinga taya tete omiti yo taya ende uusiku opo ya tute omiti ndhoka.

“Oshinima shino shaantu taya tete oshiheke osha londa unene pombanda koombinga ngaashi Okankolo, yo taya ka landitha kuuninginino hoka, otashi yemateke noonkondo oshoka oshilongo otashi mbugalekwa unene. Yo aantu mboka taya tete omiti ka yena oombapila ngaashi hashi ningwa aluhe kutya omuntu ngele okwa hala omiti ohayi koomwene gwomukunda nenge komukalelipo gomukunda gontumba ye ta pewa ombapila yepitikilo opo aye moshiheke moka,”  Indongo ta ti.

Tatekulu Indongo ta ti aakalimo yomomidhingoloko ndhoka kaya uvite ombili sho oshilongo tashi mbugalekwa, sho oshinima shika osho tashi eta nomvula yi kale itaayi lokowe nawa. Okwa ti aanambelewa yUunamapya oyi ilongekidha okukwata nokupandeka mboka taya ka adhika taya tete omiti yo kaayena oombapila.

Tagwedhapo kutya poombelewa dhUunamapya pOnayena opuna omiti dha kwatwa, sho yamwe mboka yaa hole oveta nelandulathano ya tete omiti nokudhi tu ta uusiku no yali ya kwatwa oshoka anuwa inaya enda ondjila ndjoka hayi endwa uuna omuntu a hala a ka tete omiti dhe.

Okwa pula mboka ya hala okuteta omiti ya kale haya pula omapitikilo, yo taya tala mpoka opo puuwanawa nokuteta ihe haku mbugaleka ngaashi tashi ningwa pethimbo ndika. Ta gwedhapo kutya uunshitwe owa pumbwa oku gamenenwapo naangoka te ki itsuwa ta mbugaleke ota ka katukilwa onkatu yomeendelelo.

“Ongomukalelipo  gwelelo lyopamuthigululwakalo otandi indile aakwashigwana oshowo mboka taya mbugaleke ya hulithepo oshinima shika, wo uunshitwe tawu kala wa gamenwa, elelo otali ka katuka onkatu yomeendelelo opo mboka taya yono oveta ya mangwe,” Ta gwedhapo ngaaka.

Yamwe yomaakwashigwana oya holola oku uva nayi kwawo omolwa embugaleko ndika lili unene pombanda muuzilo moka. Taya gwedhapo kutya aantu mboka ohaya ende omausiku taya ka landitha iikuni oshowo omiti nonande ka yena oombaapila ndhoka ta dhi yape epitikilo opo yaye moshiheke ya ka tete omiti ndhoka dhu uthwa.

Oya pula ooyene yomikunda ya katuke onkatu opo ku yandwe embugaleko, taya popi kutya oya hala okukalekapo iihwa , yo ya kale woo yena ominzile momidhingoloko dhawo, dho omiti dhimwe dhi ya pe iipalutha, yo ya kale taya mono omvula ya gwana.

 

 

 

LEAVE A REPLY

Please enter your comment!
Please enter your name here