Endapo nawa Meme Hilma Hilda Nangula Amaambo

0
850

Omupangi ke ithano omuyakuli moshigwana i itulamo ,omupopi omwaanawa nomuuvithi goohapu dha tsa , omwanakadhona, omumwamemekadhona, omukadhi, nakuku ke ko wee. Omukiintu gwomongundu yaasimani ngoka a sile oshigwana ashihe shokuumbangalantu oshimpwiyu nohole osho wo Aaniipa moka a valelwa nokwa kala omimvo omilongo hamano nantano  okwa thigipo onkalamwenyo yuuyuni mbuka nombili mesiku eti 22 Juni 2016 konima yuuwehame wokathimbo.

Aaniipa oya joina aatondoki nkugo yomaludhi agehe mboka ya tondoka onkugo noku lila omolwe zepo lya Meme Hilma Hilda Nangula Amaambo. Ayehe oya lili taa takuma taya ti, “ongudhi yomugolo twa li twe egamena ya teka po, omukwathi nomuyakuli gwetu a yi”, Osho shili shoka osho a li .Mboka uumbangi woshili.Aanegumbo lye oye li momadhiladhilo getu, momeho goshigwana, otwa kanitha omuntu gwondhilo ya simana, ndele ku yaandjawo yo oya kanitha omuholike, omwayinakadhona, yina na yinakulu ngoka a yakula oshigwana nawa nokwa ulike omukumo gwaashi ku yelekwa moku shi kwatha ngaaka.

Eso olye tu yugu onkungulu yezimo nameme ihaa tila sha, omugandjimalombwelo , na leitenanda ndjai megongalo lyetu, “Yina yaayehe” ngaashi hi ithanwa nedhina Meme Nangula Amaambo, omukiintu gwopompito kehe.  Omutihetatu mokati kaavalwa omulongo ya valelwa megumbo lya kuku Aina Aluhe nyOmundohotola Leonard Nangolo Auala Omubisofi gotango omuvalelwamo  mongelki yEvangeli paLutheri yomOwambo-Kavango (ELOK) ngaashi ya tseyika pethimbo ndiyaka. Okwa li omukulukadhi gwomusamane gwe Omuprofessori Fillemon Amaambo, ondohotola ya tseyika nawa, ngoka ya longo pamwe monaasalesa yaNandjokwe konyala omimvo omilongo ne. Ya kala ya mwena ihe oya longo nawa meyakulo lyegongalo lyawo oshowo lyoshipangelo.

Okwa li yina yopanyama ya Sindano, Meke, Nelago, Hafeni na Koneka mboka ya li ye na okutopola ohole ye  noshigwana ashihe.Meme Nangula okwa kala aluhe nethimbo okukala naadhinwa no naa mboka inaa yeluka momudhingoloko gwe.

Eithano lyuupangi okwe li longo konyala omimvo omilongo ne.Okwa longo oshilonga she ongo omuvali kaa yakulwa ye. Okwa kala omupangi sho a landula oku aludha paumwene, mongelki, momahangano noshowo mekwatathano te shi ningi noku nomutono gu uvitike oshowo nelalakano. Meme Nangula, okwa humbata olamba ya Florence Nightingale yuupangi nuuyakuli woshigwana no sho wo okwa kala omuhumbati nyeka gwelongo nomutungilo guukwaLutheri, mboka he Bisofi Auala uuvithile a landula noku wu kalelapo.

Epipi ndyoka nda kalelapo naandyoka lya landula lyandje kalya li na ompito okutseya Bisofi Auala ihe otali vulu okumona noku tseya nkene nguka a li omuwiliki omunene tali shi  monene momwana Meme Nangula. Pathano ye okwa fa okopi yahe nokwa ulike omutalelo gwe mokukala kwe akuhe, miilonga, meuvitho osho wo meyakulo lyoshigwana. “Oshili, ontanga onkunwa ka yi shi omugwa”.

Sho nda nyola shika onda hogolola iitya yandje nuukeka oshoka inandi hala okugandja esimano enene komuntu ha hulupo nenge oku tya ando Meme Nangula okwa li omuyuuki. Ngashi ashike tse atuhe, na ye okwa li ena omapuko ge ngoka ge mu ningi omuntu, ngaashi kwa ti wa omuntu iha yela nge yi. Kalunga okwe mu longitha meyakulo lya yalwe, sho osho tatu mu lili nokutakuma ,oshoka atuhe otu uvite eso olye tu yugu omukwathi nomuyakuli gwetu  pethimbo ndyoka tse twali twe mu pumbwa unene.Eeno okwa li shili omagano ga tumwa ku Kalunga.  Oshi li mondjila nena nomomasiku tageya okupandula onkalamwenyo ya longithwa miilonga yakulo noku zimina kutya eitaalo  olyo lye mu koleke noku mu kumika moshilonga shoka. Shoka nda hala ayehe mboka ye mu shi yadhimbulukwe, onkalamwenyo ye yeyakulo yi na uukwatya wopaKriste wohole, we igandjo, woku gandja, wontalanteni, wesilohenda neifupipiko.  Meme Nangula okwa mwenya onkalamwenyo  yaa shi ku yelekwa, iitula meyakulo lyoshigwana nolyaantu mboka ya li nelago okutsakanena naye.Okwa li kuume kaayehe aanene naashona shi thike pamwe. Okwa li omugandji mayele nomu inekelwa ku nakusa meme. Paumwene okwa li omutonateli gwandje nomulongi gwandje monkalamwenyo. Ngaashi ashike yina, ye okwa yakula omusamane gwe miilonga ya fa ihaa yi zimbuka. Ngaashi he ye, okwa kala paantu ye nongelka ye  noku uvitha oohapu dhomwenyo.Omukumo gwe okusindana noku ya komeho mu kehe shoka a longo osho omukumo gwepipi lyetu. Meme Nangula okwa li nota kala aluhe  oshiholelwa oshiwanawa shomukumo nuukwatya. Ota kala noku dhimbulukiwa miilonga ye yonkalamwenyo okuyakula oshigwana she, ezimo lye nongelki ye. Egongalo lyaNiipa otali ka yuulukwa  ewiliko lye , okugandja omathaneko kwe, okulongekidha iinyangadhalwa kwe noku kondjela eitaalo lye. Ezimo lyAawa yaNdonga  momumbwalangandjo osho wo Ombala yaNamungundo meukililo oya kanitha omuyakuli ngoka a yakula Omukwaniilwa nOmunyekadhi nesimaneko enene.Otashi ka kutha omimvo odhindji oku mona omuntu ena uukwatya tau adha we monkalo kehe. Uukwatya we oshili owa pumba.

Sho oyendji taya gongala megongalo lyaNiipa ya tegelela Bishop Episcope Emeritus gwa ELCIN Omundohotola Kleopas Hafeni Dumeni a thikame koshuuvithilo noku popya oohapu ndhoka tadhi  thindikile omuntu nguka tu uvite etumba konkalo ye, ondi shishi kutya ota ka endulula  iitya mbyoka a longithile meuvitho lye pefumviko lyomutetekeli gwe Bishop Dr Leonard Nangolo Auala mesiku 10 Desemba 1983 megongalo olyo tuu ndyoka sho a tile, “otwa gongala mpaka okusimaneka nokutanga Omuwa, ngoka a pele ELOK omagano omawanawa. Inatu mu landa nando ona sha. Ethimbo ndyoka twe mu pelwe olya gwana. Otatu pandula Kalunga sho emu kwatha mekondjo lye okukala Omukriste nomeitaalo lyopaKriste moka a sile. Otwa gongala mpaka tu imbe eimbilo lyesimaneko oshoka ye okwa yi a ka thigulule omwenyo gwaaluhe.”Omatumbulo ngaka oga opala wo okutumbulilwa Meme Nangula. Okwa li omagano omawanawa nokwa kala meitaalo sigo opehulilo.

Otatu dhimbulukwa Meme Nangula ongo oshungo yoonkondo, omuntu ehole aantu polwe mwene oshowo omuwiliki omwaanawa. Otatu pandula molwekalepo lye, tatu pandula molwewiliko lye nomagalikano ge gaana ezimbuko. Okwe tu thigile uuyamba uunene. Enwethemo lye moshigwana olyuudhilila nolyaaluhe, ngaashi ashike lyomusamane gwe nolyaakuluntu ye. Eshongo olili koyana kutya ondjila yini taya hogolola, ngele oondjoka yaakuluntu yawo nenge otaya landula oonkalamwenyo dhawo yene ngaashi ya hala . Onkalamwenyo oyo olweendo lyo ekondjo otali tsikile. Ongo omuKriste lela  ye okwa ulike omukumo nonando okwa li muuwehame. Iitya ya Johnson Oatman Jr. Meimbilo lya nyanyangidhilwe mo 1897 ota li hokolola onkalamwneyo ya ka lwa nawa, ngaashi a indile ndje ndi li mu imbile iitya yalyo tayi landula. “when upon life’s billows you are tempest-tossed, when you are discouraged, thinking all is lost, count your many blessings name them one by one. And it will surprise you what the Lord has done! So, amid the conflict whether great or small, do not be discouraged, God is over all; count your many blessings, angels will attend. Help and comfort give you to journey’s end”. 

Lwa hugunina sho tatu langeke Meme Nangula a vululukwe, otu shishi momitima dhetu kutya ye ota tsikile oku adhima. Ota kala aluhe. Tse otwa pandula shili. Ngaashi ye a kala pomasiku ge ga hugunina uudha ombili, eudhililo osho wo etegameno nomukumo ngaashi sha nyolwa membo lyAafilipi 2:15. Olweendo lwomwiitaali nguka olwe mu fala  kombanda yeningino lyetango nongaashi etendo lyongula yomegulu, otandi dhiladhila pahapu dha John Bunyan, kutya “omankuma oga hikwa  handiyaka” Sigo tatu ka monathana ishewe!

LEAVE A REPLY

Please enter your comment!
Please enter your name here