Kagola ota uvitha mOnayena oku tameka nena

0
388

 

OMULONDO – Omusita gwegongalo Omulondo okwa lundululwa mo konima yoku longa megongalo ndyoka omimvo dhi vule omulongo na sha.

Elundululo lya Selma Ngeendina Kagola ndika olya ningwa pamautho gelelo ngerki yaELCINN ngoka taga utha kutya ndika olina oshinakugwanithwa shoku langeka osho wo okulundulula aasita momagongalo.

Omusita nguka a longo megongalo lili kohi yOshitayi ngerki shaMandongo ina falwa kokule kelundululo ndika, ihe okwa falwa ashike konyala oshinano shookilometa ngele odhindji omilongo mbali muuninginino wOmulondo.

Omusita Kagola okwa pewa oshinakugwanithwa shoku litha oonzi dhaKalunga megongalo yina yOmulondo, ano Onayena moka ta tameke iilonga yakulo ye mesiku lyotango lyomwedhi nguka.

Ontonkolwa yelelongerki ndjoka ya pitile omasiku ga ziko oyali ya ulike kutya aasita mOmandongo otaya lundululwa, yo ya tameke okulongela komagongalo gamwe ngono natango geli owala moshitayi shoka.

Oyendji komagongalo ga yooloka moshitayi oyali ya laleke aasita yawo Osoondaha ya piti. Egongalo Omulondo ndyono lya kala tali wilikwa komusita Selma Ngeendina Kagola, nalyo olya li lya longekidha oshituthilaleko shomusita ngoka a kala ta wilike egongalo ndyoka uule woomvula omulongo nambali.

Pethimbo ndika  okuza sho egongalo Omulondo lya totwapo olya wilikwa kaasita yatatu (3), Omusita Kagola okwali a langekwa mo 2004. Meme Helena Nampala ngono ali a popi pelaleko lyomusita okwa yelitha kutya oya kala megongalo lyawo nombili, nomusita okwa kala ta yakula iimpungulonga ya yoolokathana, “ Okwa uvitha ohapu yomwenyo, ta shasha , ta koleke ye ta hokanitha woo, okwa longa oshilongatumo ngaashi ali eshi ganena, okwetu yakula ngaashi shu uthwa, naasho tatu mu laleke ka tuna oomwenyo dha lindimana oshoka natango oku tuli popepi,” Mee Nampala ta ti.

Ta ti osha kala oshiwanawa okulonga pamwe nomusita Kagola, oshoka anuwa oha longo nomukumo, ye kena okakololo keeshi megongalo alihe, ta hokololwa ha kwatha mboka ya pumbwa omayambidhidho noku gandja omayakulo mpoka sha pumbiwa.

Egongalo Omulondo mewiliko lyOmusita Kagola oli ipyakidhila noku tunga ongelki ompe, molwashoka ndjoka yilipo ngashingeyi oya ninga oshona okuhumbata aayakulwa yegongalo ndyoka.

Aakwanegongalo oyali ya gongala momwaalu omunene opo ya laleke omusita gwawo ngono a lundululwa opo a ka longele kegongalo Onayena , nokwa tegelelwa a ka tameke iilonga Etitano ndika.

Aakwanegongalo oya halele meme Kagola oonkondo ,omukumo nelago opo a ka tsikile oshilongatumo she kegongalo Onayena  hono a lundululilwa. Oye mu pula a ka yakule omuntu kehe ngaashi eshi ya ningile pethimbo ta yakula Omulondo.Omusita Kagola okwa adha wo Aanayena yiipyakidhila okutunga wo ongelki ompe noyopashinanena oshoka ndjoka yongashingeyi nayo oya tameka okuthinana.

“Otwa pandula mwaayihe weyi tu ningile , tsikila oshilongatumo nombili,shikukutu molweendothimbo wu li kevi inekela Omuwa aluhe noku izizima to ti Aishe handi pondola ngomwiimbi gweyimbilo 335:1-3, tangi sho twa kaleni oomvula 12,” ya pandula ngaaka.

Nonande hashi kala oshidhigu ngele aantu ya adhika yi igililathana, omusita Kagola okwali a hokolola kutya megongalo Omulondo oya kala mo nombili, no inapu kala nande uudhigu washa. Okwa ti ota kala ta talelepo aakwanegongalo poompito dha yooloka, oshoka sho a kala megongalo okwa kala afa eli megumbo. Ye okwa panga uukuume naantu yomapipi agehe. Omusita Aluhe Nahango oye ta kala ta yakula egongalo Omulondo okutameka metitano ndika.

 

LEAVE A REPLY

Please enter your comment!
Please enter your name here