Omwenyo womunhu ouna ngoo vali ongushu?

0
194

 

She likolelela komavalulo oshiwana hano osensesa yomo 2014, ehangano loNamibia Statistic Agency ola li la holola kutya ovaNamibia otava fi unene ina va kula.

Omavalulo oo okwa li a ulika kutya ovanhu veli pokati keedula 15 no 59 mo 2014, omo amuke ova file veli 1 857, omafyo oipundjamenye. Oyeetifi yomafyo oo okwali oiponga, omadipao nomalimangeleko. Okwali kwa didilikwa yoo kutya ovaNamibia vahapu iha va kulu tava kondo pepipi leedula 52.

Ouyelele ou ta udi fa nai nota u halula, ota u ulike yoo kutya vahapu tava fi moiponga, momadipao nomalimangeleko ovovo veli mokati kounyasha lela, ngeno veli mefimbo lokulonga nokuyambula po oshilongo noku kwafela eefamili davo.

Ovanhu veli pokati keedula 25 fiyo 39 mo 2014 ovo va file moiponga ovali 421, veli 272 ove li dipaa naveli 158 ovali va dipawa. Omuvalulu munene munene womafyo okwa li yoo wa etwa komikifi. Omo 2014 amuke. Ngeenge nee omavalulo omo2014 otaa ulike ngaho, mbela ovanyasha vangapi oshilongo sha kanifa okudja mo 2010 fiyo onena?

Oiponga ihapu nomafyo oipundja menye tae linyenge moNamibia nomounyuni wopaife otaa eta omalimbililo lomalipulo ngeenge omwenyo womunhu ou na ngoo vali ongushu, ile pamwe eemwenyo dovanhu paife oda fa ashike deedi noufelepuka.

Onghalo yopaife yomwenyo womunhu ta u kana efiku nefiku otai eta opo nokuli efyo lomunhu lihakale vali oshinima ita shi halula. Ovanhu paife kave na kona sha vali neemwenyo davo vene nodoovakwao.

Shotete ngeenge otwa tale koiponga oyo ta i holoka meepate detu, ihapu yomuyo okwali ta i dulu okukeelelwa ndele shaashi omolwa onghalo yokuhena ko nasha ile yokudilaadila nokukala nolune lomwenyo womunhu, ovo tava dulu oku yanda oiponga oyo iha ve shi ningi shaashi mbela kave na kona sha.

Oto hange omunhu ta shingi ta, piti momarobota ewete lela kutya omatilyana ndele omunhu ota piti mo ashike. Omunhu oto li pula nee kutya ngeenge nee pamwe kena ko nasha nomwenyo waye mwene, oku udite ngaipi eshi a tula moshiponga eemwenyo daavo a humbata moshihauto shaye,  daavo veli moituwa ili komesho, konima nomomunghulo waye, novaendi vokolupadi.

Ovanhu tava shingi omafele va fa va twifa omhata.

U tale nee  kovaendi vokolupadi, unene tuu ovanyasha, ovanhu ota va ende ashike veli komingenge dopate. Voo kave shi kutya ngeenge omushingi ta kendabala oku henuka oshiponga mopate, luhapu, oha henukile ashike komunghulo wopate. Sha hala okutya omushingi ita dulu oku keelela oshiponga ta henukile mokati kopate omo mu yadi oituwa ikwao.

Ashike oto hange ashike omunhu ta ende popepi nopate, ile nokuli mopate mwoovene, vati ina hala eenghaku daye di twime.

Omunhu oto li pula nee kutya naku enda mopate ou oku wete ongushu yonghaku yaye i dule yomwenyo waye. Ovanhu paife ota ve li humbata va fa vena po eemwenyo ditivali kombada yedu da teelela diye ponhele ngeenge va kanifa edi vena paife.

Kakele koiponga yoituwa, oyo tai talikila mefano limwe nomadipao a nghinangenda, omadipao nekufolomunhu omwenyo meyukililo okwa duka neenghono. Omadipao taa ningwa kovanyasha, tave a ningile ovanyasha va kwao ile tave a ningile ovakulunhu.

Shamha to tale ponakudiwa yopopepi, peedula do 1970 no 1980, ovo ve ya nale ova kala hava hokolola nghee efyo lomunyasha la li hali halula noha li udikila kokule shaashi omafyo ovanyasha nale okwa li a pumba neenghono.

Nonande omafyo oo ha etwa komikifi inaa tongololwa mosensesa yomo2014 kutya o elipipo, ovanyasha vamwe otave li dipaa nomalodu. Elongifo nai lomalodu oule wefimbo oha li eta ounghundi uhe shi ashike womomadilaadilo ashike nokolutu yoo. Nokuli omikifi dihapu oha di handulwa komalodu osho hashi endelelifa efyo, ponhele yeveluko.

Onghalo yomafyo ovanyasha ota i shunifa exumokomesho loshilongo pedu, naNamibia okwa pumbwa oku ninga po sha sha kwata moiti, opo ashike omafo oo taa dulu oku keelelwa.

Eshi ota shi ningwa ngeenge okwa tamekwa nokuningwa omaxwaxwameko a kwata moiti, taaningilwa keenhele doilonga, nounona ova pumbwa okulongwa ongushu yomwenyo omanga va shona lela, sha pumbwa okuningilwa keefikola nomomaumbo.

LEAVE A REPLY

Please enter your comment!
Please enter your name here