PLAN etanga lyaakwiita aa iyambi: Omutungilo gwoPLAN gwa tsikilwa

0
327

 

Kohi yewiliko lyaHailwa Nujoma okwa li aakwiita yomayovi gomilongo nookommanda odhindji dhomudho dhali ashike dha tseyika nomadhina gadho gomiita. Ngoka a, landula Nujoma mewiliko lyopakwiita okwa li Amushanga Gwegameno. Mokukalapo kwoPLAN,olutu nduka olwa wilikwa kooamushanga yegameno yaali. Amushanga gwotango okwa li Peter Nanyemba[1965-1983]. Nguka okwa sile moshiponga shoshihatuo moLubango  moAngola mesiku lyotango 1 Apilili 1983 lwokomatango potundi 16h30.Hailwa Nanyemba okwa li ena omupevi gwe Hailwa nakusa Kapelwa Kabadjani, nguka oye a ka kuthako uu amushanga wokulipo okuza peso lya Nanyemba sigo omumvo 1986 sho Hailwa Peter Mweshihange oye u ulikwa pambelewa oye Amushanga Gwegameno  ta wilike PLAN okuza mu Januali 1986 sigo 1989. Aawiliki mbaka yatatu oya longa oshindji mekoko lyoPLAN osho wo moku kongela omatanga gaakwiita iikondjitho ya gwana.Nakusa hailwa Mweshihange oye wo a li Ominista yotango yEgameno  moNamibia ya manguluka.

Ngaashi nda popi petameko manga PLAN inaa dhikwapo opwa li SWALA okwaako kotango kopakwiita kwoSWAPO, huka okwa li ha ku kommandwa ku hailwa Tobias Hainyeko ya longo pamwe na hailwa Petrus Hambiya ongo amushanga gwopakwiita ta kwathelwa ku Titus Mwailepeni, ye hailwa Erasmus Kokaulu Nganyone okwa li omuhwahwameki gwopapolitika moSWALA.

Aawiliki yopakwiita mbaka oya landulwa kaagandji yomalombwelo yomatanga.Okommanda yotango yetanga lyaakwiita moSWAPO okwa li nakusa hailwa Tobias Hainyeko omukwiita ofule ye ihaa tila sha, ngoka a kommanda SWALA pethimbo edhigu okuza omumvo 1964-1967. Hailwa Hainyeko okwa sile koongamba dha Zambia na Namibia momasiku 18 Mai 1967.  Anuwa a sile miilonga yuukwiita omanga ta londo mokawato komulonga gwa Zambwezi, konima yoku gandjwapo komulongithwa gwa South Africa gwedhina Leonard Phillemon Shuuya Castro.

Hailwa Hainyeko okwa landulwa kependa lyiita yemanguluko, nakusa Leitenanda Ndjai, Jerobeam Dimo Hamaambo. Hailwa Hamaambo okwa kutha ko oshilonga shuukommanda mbala konima yeso lya Hainyeko. Okwa kala mewiliko lyetanga osigo epangelo lyuukoloni moNamibia olya thiminikwa  okushaina ehulithopo lyomaumbathano mo 1989.Hamaambo oye a li omukuluntu gwotango gwetanga lyegameno lyaNamibia okuza 1990 sigo 8 Septemba 2002, sho a mana oondjenda dhe mepipi lyomimvo 70.

Kommanda Hamaambo okwa li ena aapeha yaali Jonas Haiduwa ngoka a si mu4 Mai 1978 moKassinga moAngola na Solomon Dumeni “Jesus” Hawala.Leitenanda Ndjai Solomon Dumeni Hawala oye a longo tango ongo okommanda yotango yaakwiita moNamibia okwa ka yelwa noku ninga oye omukuluntu gwomatanga agehe gegameno a landula Leitenanda Ndjai Hamaambo okuza 2002-2008.Hawala okwa ka landulwa miilonga mbyoka ku hailwa Martin Shalli 2009-2010.

PLAN okwa li wo ena Kommissara gwopapolitika ponkatu yopombanda. Mboka ya longa miilonga mbika omwa kwatelwa Erasmus  Kokaulu Nganyone, Greenwell Matongo [ngoka a sile metopo lyomboma  muumbugantu waAngola mesiku 14 Juli 1979.Nabot Helao Nafidi “Camilo”ngoka a sile metotopo lyomboma moAngola mesiku 18 Septemba 1981. Ookommisara yalwe oya li Ndali Kamati, Fillemon Malima, Lumumba na Frans H Kapofi.

Kohi yookommanda ndhika okwa li aawiliki aakuluntu yomalutu gopakwiita osho wo oongundu dhopakwiita ngaashi  Omukuluntu gwostaffa,omukuluntu gwiilonga, omukuluntu guundaadhi,omukuluntu gwiilonga yomonanguwi,omukuluntu gwoku keelela okundaadhwa, omukuluntu gwoondjembo oonene, guunamiti,guuinginia nosho tuu.

Mbaka oyo oohaila yamwe mboka ya li ya wilike iimpungu  yimwe mbika.

Omukuluntu gwaawiliki moPLAN;: Hailwa Charles Namoloh ‘Ho Chi Minh.”

Omukuluntu wiliki goPLAN miilonga yomalugodhi: Hailwa Martin Shalli.

Omuwiliki goPLAN miilonga yUundaadhi: Hailwa Isaak Pondo Shikongo na Philipus Hainana[Shikoka].

Aawiliki yIilonga yomonanguwi: James Auala na Sunherib[Sunnyboy]Amwaalwa.

Aawiliki yoPLAN okukondjitha Iilonga yomonanguwi ya yalwe: Hailwa Israel Patrick Iyambo [Lungada na Uuno Shaanika Kanana. ]

Omukuluntu gwoPLAN poondjembo oonene; Hailwa Kristoph Kala, Shoongeleni Halwoodi Ndeimana taya kwathelwa ku Raonga Andima.

Aakuluntuwiliki yUuinginia moPLAN; Hailwa Nande Shafombabi na Martin Nashandi.

Aawiliki  yegameno  lyomombepo; Hailwa Andrew Intamba[Bongi] na Batromeus Shomeya.

Aawiliki yomainyengitho/nomalongekidho;Hailwa Isaak Kapuleko na Peter Nambundunga “Cosmos”.

Omuwiliki gUundjolowele nUunamiti: Hailwa Elobby Amundaba, Nicky Iyambo na Kalumbi Shangula mbaka oya longo pomuthika  gwegameno nando yo oya longo moku panga aakwiita mboka ye ehamekwa naamboka ya haluthwa, unene ye shi longele pendiki lyuunamiti lya Peter Nanyemba osho wo pomandiki galwe guunamiti  miitopolwa yomalugodhi moAngola.

Aawiliki yomakawatathano , hailwa Augustus H Nghaamwa McNamara, Philipus Niipele na Erkki Nghimtina.

Aawiliki yoonzo dhopantu: hailwa Patrick Mwinga na Lukas P Hangula “Fogu-m’ngungundlovo”.

Aawiliki ayehe mbaka oya li haya longo okuza poombelelwa oonene hoka haku gandjwa omalombwelo, okuza hoka oko ya kala haya gandja omalombwelo koongundu dhawo koombelewa dhomawiliko miitopolwa , moobattaliona, oobrigade osho wo ookamba dhilwe dhaakwiita nomahala gopakwiita moAngola noZambia. Aawiliki yamwe mbaka oya li iilyo yEwiliko lyopakwiita lyoPLAN, na yalwe oya li ashike iilyo  yaa niilonga moPLAN.Omadhina goohailwa yamwe otashi vulika ga dhimbiwa mo shika inashi ningilwa owina.

Oohailwa mbaka oya li mewilikongundu lyuukwiita moPLAN

Sam Shafiishuna Nujoma Okommanda Onkuluntu yoPLAN ,nOmunashipundi  gwEwilikongundu lyuukwiita.

Peter Mweshihange :Amushanga gwEgamen nOmupevinashipundi shEwilikongundu lyuukwiita.

Jerobeam  Dimo Hamaambo: Kommanda yetanga lyaakwiita yoPLAN.

Solomon Dumeni “Jesus”Hawala :Kommanda yopevi yetanga lyaakwiita yoPLAN.

Charles Namoloh “Ho Chi Minh” :Omukuluntu gwaawiliki yomatanga moPLAN.

Martin Shalli ‘M’ shinda wa Shalli: Omukuluntu melongekidho lyiipumbiwa nAmushanga gwEwilikongundu lyuukwiita.

Ndeimana Halwoodi lwa Ndeimana :Omukuluntu goondjembo oonene moPLAN.

Peter Nambundunga  “Cosmos” ;Omukuluntu gwomaenditho/ nomalongekidho  moPLAN.

Sunherib “Sunnyboy” Shikololo” Amwaalwa ;Omukuluntu gwIilonga yomonanguwi moPLAN.

Uuno Shaanika Kanana: Omukuluntu  gwIilonga yokukondjitha Iilonga yomonanguwi ya yalwe,Olutu lworevolusie lwoSWAPO.

Eliaser Haulyondjaba “Hailonga” Okommanda onkuluntu moPLAN.

Elobby Amundaba : Omayakulo gUunamiti moPLAN.

Ookommanda adhihe  dhiitopolwa odha li iilyo yEwilikongundu ndika molwiinakugwanithwa yadho yokukommanda omatanga taga  longele miitopolwa yadho.

Otashi vulika pena oohailwa yamwe mboka ya yakula mEwilikongundu lyuukwiita lyoPLAN ndele omadhina gawo inaga holoka momusholondondo nguka , otandi gandja ishewe ombili kutya shoka inashi ningilwa owina. Osha zi ashike mpoka sho omunyoli gwembo ndika inaa tseya kutya mbaka oya li iilyo  ishewe kapena gumwe ngoka a holokele oku gandja uuyelele mbuka omanga embo ndika inaali nyanyangidhwa.Oshikwawo shina okundhindhilikwa ooshika kutya  omadhina ngaka ogaa mboka ya li iilyo mongundu ndjoka sigo opo mvo 1989 nenge lwaa mpoka.

Oombelewa oonene dhoku kommanda odha longo ongo ehala enene lyoku gandjela omalombwelo. Pehala mpoka opo pwa tungilwa omathaneko agehe gopandunge gopaukwiita osho wo nkene iita yi na oku hingwa omanga omathaneko ngaka noondunge ndhoka inaadhi ka tulwa miilonga koongundu dha yooloka dhaakwiita. Nonando PLAN okwa li etanga lyaakwiita yoguerrilla, ndika olya li li na oombelewa oonene tadhi kalele moka omo mwa kala tamu zi omalombwelo nkene iita yi na okuhingwa osigo oosho omatanga gomukolonyeki ga homona oombelewa ndhoka mo 1987 ndele nee moshiponokela moka aakwiita yomutondi  na yina yokatongotongo okwa kanithile mo oshindji kutya aakwiita nenge iikondjitho.

Oombelewa ndhika odha li pOshixuxwa nokonima odha tembukile pOshilumbaba moshitopolwa sha Cunene moAngola.Omutondi okwa homona oombelewa ndhoka pOshilumbaba mu Juni 1980. Pethimbo lyoshiponokela shoka oombelewa odha li dhili kohi yekommando lya hailwa Philip Nambuli Alweendo. Ontanda ndjika oya ka tembudhwapo mpoka noku falwa kiitopolwa yilwe sho iita yekondjelomanguluko ya pupyala unene.

Sha faathana naashika PLAN okwa li a dhike omahala goku gandjela omalombwelo moshitopolwa kehe mwa li oongundu dhopakwiita, ngaashi obrigade, battalion noodetachments.

LEAVE A REPLY

Please enter your comment!
Please enter your name here