Vamwe va efa okunwa eeARV mOshana

0
296

ONGWEDIVA –Ovanhu vamwe mOshana it ava nu vali omiti davo deeARV melandulalafano.

Ouyelele ou owa yandjwa kuGavana waShana Clemens Kashuupulwa, otau ti omishangwa mOshipangelo shaShakati ota di holola umwe womouyelele ta u udifa nai shaashi pena ovanhu vamwe veli kepango loHIV, hava pewa eepela doARV ashike ova efa poi le iha va nu omiti davo ngaashi shi na oku kala.

Kashuupulwa ouyelele ou okwe u yandja omanga a li ta popifa oshiwana shomoshitukulwa shaye, nokuyandja oshipopiwa shaye shokodula pombelewa yoshitukulwa shaShana mOshakati.

Kashuupulwa ta ti oshinima eshi ota shi udifa nai neenghono nota shi piyaaneeke ekondjifo lomukifi woHIV moshitukulwa.

Ngoloneya ta ti nonande ongaha, omuvalu waavo veli kepango loARV mOshana owa londa okudja povanhu 20 821 eedula mbali daya nopaife ouli povanhu 24 384 muMai  2016. Movanhu omo omwa kwatelwa ounona veli 2 135, veli koshi yeedula 15.

Eshi tashi hafifa neenghono osheshi etandavelo lombuto okudja kuina nokui yadja kokaana ina ka dalwa la shonopala okuya peepelesenda 0.5 moneudo, okudja peepelesenda nhatu modula 2013.

Omishangwa dimwe oda holola nghee vamwe vomounona va dalwa nombuto yoHIV moshilongo tava tandaveleke ombuto moku he shiisha shaashi ovakulunhu vavo va anya opo ovana va lombwelwe kutya ove na ombuto.

Ota ku hokololwa kutya vamwe vomounona ovo ova kula nova tameka nokuli oku ya moixulo ashike kave shishi kutya ove na ombuto, nonande otava nu omiti.

Ovalongi voundjolowele otava holola kutya ovakulunhu vamwe ohava lombwele ashike ovana kutya nava nwe omiti shaashi ohava vele omutima ile ovena ohonde ili pedu, osho hashi eta ounona ovo inaa va lombwelwa vaha kale va kotokela oku amena ookaume kavo kopamilele.

Ouyelele oo tau hafifa nota u holola efindano mekondjifo lo HIV/AIDS osheshi etandavelo lombuto yoHIV mOshana la shuna pedu okudja peepelesenda 34 modula 1998 no leya peepelesenda 16.9 modula 2016.

“Epangelo, oku pitila mOuministeli wOuhaku ole li tula mo okukondjifa ombuto yoHIV/AIDS paku yandja omakwafo ngee oilongomwa ile ovanhu. Onghee ouministeli owa kala weli tula mo okulonga ovanhu momikalo da yooloka nghene vena oku shunifa poshi noku yele ka mo ombuto yo HIV/AIDS moshilongo,” Kashuupulwa ta yelifa.

LEAVE A REPLY

Please enter your comment!
Please enter your name here