Aapangi ya laleke kuume kawo miilonga

0
590
Omundohotola Amaambo pamwe nOmundohotola Solly Amadhila ya kuutumba mongelka yaNiipa pethimbo lyoshituthi fumviko sha Nakusa Hilma Nangula Amaambo Etitano lya yi.

 

 

ONIIPA – Engathithi lyaapangi mOnandjokwe oshowo moshilongo ashihe olyali lya gongala pongeleka pOniipa opo li laleke kuume kalyo ngoka lyali hali longo pamwe nalyo.

Nakusa Meme Hilma Nangula Amaambo ngoka a manene oondjenda dhe momasiku 22 Juni nuumvo okwa fumvikilwe Etitano lya ziko okuziilila megongalo lyaELCIN mOniipa.

Meme Amaambo ngoka ali omupangi keithano oye omukulukadhi gwoMundohotola a tseyika nawa nOmuprofessori gUunamiti moUnivesiti yaNamibia, Fillemon Amaambo.

Aapopi ya yooloka oye mu hokolola ali e hole aantu yomapipi agehe, nokuna esiloshimpwiyu nakehe. Aapangi mboka ya longo pamwe naye oyemu tumbaleke omolwa iilonga ye mbyoka a longa moshigwana.

Esiku ndyoka aapangi oyali ya zala omizalo dhawo dhuupangi pethimbo sho taya thindikile kuume kawo a ka vululukwe nombili.

“Otatu lili kuume ketu, omugandji mayele gwetu ngoka he tu kumagidha aluhe miilonga yetu, ashike nando tatu lili otatu pandula Kalunga sho etu pele kuume ketu ngoka etu longa oshindji muye otwa tekamo iinima oyindji, nonkene wo tuna okwi ihumbatela omuntu kehe,” Taya popi ngaaka.

Oyendji ota ye mu tanga omolwa oshilonga yakulo shoka a longo moshigwana oshowo megongalo Oniipa. Taya popi kutya Mee Amaambo oye onani ya sile kondjoko molwaasho okwa kala ta kondjo nonande eli muuwehame we opo a kwashilipaleke kutya aantu ayehe oyena ombili.

Ngoka ali a popi peha lyaavalwa Koneka Amaambo okwa hokolola yina  ati okwe ya longa iilonga kehe mbyoka omuntu ena okulonga. “ Otatu pandula Kalunga sho ali etu pa oshuma shetu oshaanawa,Meme kali ehole onyalo okwetu putudhila iilonga naaluhe okwa kala hetu lombwele opo tu kale hatu popi oshili tse tu kale tuna etilokalunga ndyoka lili olyo ekota lyuunongo auhe,” Koneka ta ti.

Ta gwedhapo kutya oha tekula ayehe sha faathana  noku hole aantu ayehe, ta ti nonande yina eya thigipo itaye mu dhimbwa moonkalamwenyo dhawo oshoka okweya pa uuthiga mboka itaawu hulupo. Aavalwa taya popi kutya yina okwa manako olweendo lwe lwonkalamwenyo nokwa ka tegelela ongula yependuko.

Meme Amaambo okwa kala wo omuyakuli mOmbala yaNdonga nokwa tseyika nawa ongomukadhona gwaMbala.

Poshituthi fumviko opwa li oshigwana oshindji sha za koombinga noombinga nomiimpungulonga ya yoolokathana, mwa kwatelwa nOmuperesindente nale Hifikepunye Pohamba nOmukulukadhi gwe Penehupifo Pohamba ngoka eli Omupangi keithano.

Nakusa Hilma okwa thigiko omusamane gwe, oyana,aatekulu oshowo aamwayina.

 

 

 

LEAVE A REPLY

Please enter your comment!
Please enter your name here