Baby Warriors ya dhenge moZebra

0
201

Lobatse, Botswana – Okoola ndjoka Godwin Awaseb a thangele mo mokoola yospana yopashigwana yaBotswana yaadhani yokohi yomimvo 17 oya kwashilipaleke kutya Namibia otayi kedhingoloko lya landulako muudhano wokupita opo ospana ndjika yi ka kuthe ombinga  methigathano lyo CAF/AFCON lyaadhani yokohi yomimvo 17.

Ospana yo Baby Warriors oya piti oku ya kedhingoloko etiyali lyuudhano woCAF yaadhani kohi yomimvo 17 methigathano lyo AFCON sho ya dhengemo ospana ya Botswana nookoola mbali dha tulwa kumwe momaudhano geli gaali.

Muudhano wolweetho lwotango Namibia okwa li a tulamo okoola yimwe  omanga Botswana inaa tula mo sha. Medhingoloko lya landulako moBotswana ospana yoZebra oya tulamo ookoola mbali megumbo ye Namibia ta tula mo okoola yimwe. Oospana ndhika onkene odhi ithigi othika pandjele yookoola kehe yimwe ookoola mbali.

Ndele shoka Namibia  okwa tula mo okoola kiilongo ndjika oya yalulwa yi na oonkondo okuyeleka  nookoola mbali dha Botswana edhi tulile mo adhihe maandjawo.

Muudhano mbuka Botswana okwa li a kambadhala okudhenga Namibia, nokwa ka tulamo ookoola mbali, ihe Namibia okwa tokola okugamena okoola ye yimwe sigo oosho uudhano wa hulu inaa tulilwa mo okoola ontitatu nonando Botswana okwa kala ta dhana nokuponokela Namibia pwaana ezimbuko.

Uudhano osho wa kala ngaaka sigo wa thiki pehulilo Botswana ena mbali mokoola yimwe, ndele ookoola dhe kadha li dhina omwago oku mu fala kedhingoloko ndyoka lya landula ko. Namibia onkene oye a sindana po uudhano mboka  pamautho gokoola ya thangelwa mo komagumbo.

Ngashingeyi Namibia okwa tegelela oku ka tsakanena na Congo Brazzaville medhingoloko lya landulako mondjila yawo okuya kethigathano ndika lyaadhani  yokohi yomimvo 17 mboka tawu ka ningilwa mo Madagascar 2017.

Muudhano mbuka omudheuli gwoBaby Warriors Timo Tjongarero okwa li a kuthamo Lleyton Goliath noku etamo Shipanga , ta eta mo Mbakondja Tjahikika,na Alex Kuutondokwa pehala lya Godwin Eiseb na Kapitia gospana Dawid Morgan jr.

“Otwa nyanyukilwa iilonga yaamati mwa kwatelwa niizemo. Kasha li oshipu opo aamati mbaka ya gamene okoola yawo sigo uudhano otawu pu. Ihe aamati oya li ya tokola oku kandeka iiponokela ya Botswana sigo opehulilo, otwa mona iizemo mbyoka oyo twali twa hala. Ngashingeyi otatu ilongekidhile uudhano wedhingoloko lya landulako.

Tjongarero okwa ti uudhano woCOSAFA waadhani yokohi yomimvo 17 mboka tawu ka ningilwa mo Mauritius nuumvo otau ka pa aadhani mbaka ompito opo ya ilongekidhile omaudhano galwe gopaigwana  osho wo oku ya longekidha ya kale ya ndjanga yo itaa ya vulwa unene.

Ewiliko lyoCOSAFA nenge Council of Southern Africa Football Associations (COSAFA) olya tseyitha oongundu moka ethigtahano ndika tali ka ningwa, Namibia okuli mongundu ya A pamwe na Mauritius,  Seychelles na South Africa.

Enyakwa lyuudhano mbuka Zambia olili mongundu yaB pamwe na Malawi, Madagascar na Mozambique.Ndhika odho oongundu dhuudhano mboka tawu ka dhanwa uule womasiku omulongo okutameka momasiku 22 gomwedhi nguka.

Oospana mbali pombanda mongundu kehe odho tadhi yi  kedhingoloko lyosemi sho omusindani gwa B  ta ka dhana na nospana ontiyali mu A. Ye omusindani gwa A ta ka palamena omutiyali mongundu ya B,

LEAVE A REPLY

Please enter your comment!
Please enter your name here