Hulithiipo okutokelwa puundingosho

0
421
Kansela Sackey Nangula ngoka a indile ooyene yoondingosho opo ya kale haya pata oondunda dhawo pethimbo lyu uthwa koveta.

 

OMUNTELE – Omolwa iiningwanima yomalugodhi mbyoka hayi ka hulila momadhipagathano  moshikandjohogololo Omuntele, Kansela okwa kumagidha aakwashigwana opo ya yande iimbuluma mbyoka.

Sakeus Nangula oshiwike shika okwa tseyitha neyemea kutya moshikandjohogololo shaandjawo omwi itililwa unene kombepo tayi yonagula nokuhanagula oshigwana.

“Esiku nesiku otatu kundana aantu ya dhipagathana nenge ya kondja moshikandjohogololo shetu, niiningwanima ayihe mbika ohayi ningwa unene ethimbo lyokwatoka lela no hayi ningilwa owala pehala lyomanwino, oshinima shika oshe ehameka ndje noonkondo nonda hala shi hulithwepo,” Kansela Nangula ta ti.

Ta ti omolwa iiningwanima mbyoka yomadhipagathano ya ningwa pehulilo lyoshiwike sha ziko oshigwana otashi lili no shi li moluhodhi omolwa omaso gaamati yaali ya dhipagelwa pomahala ga yoolokathana.

Kansela ta ti ayehe mboka oya dhipagwa sha ziilile moontamanana. Gumwe a tetwa nekaatana eta sile pehala lyoshiponga na gumwe a tsuwa anuwa nombele etaka hulitha lwanima.

Kansela Nangula ota indile ooyene yomikunda opo ya kale yena oveta nompango ya yaga kegonga opo kwaa kale nande okandingosho ka patuluka ngele oowili dhokupata odha adha, “otatu kanitha omwaalu gwaantu oyendji taya dhipagwa no taya tsuwa noomwele otandi dhiladhila opo ku totwepo okomitiye ndjoka tayi kala tayi tonatele puundunda womanwino, tayi tulapo elandulathano noku kwashilipaleka woo kutya oondunda oha pata pethimbo ndyoka lyu uthwa,”Ta gwedhapo ngaaka.

Okwa tiwo kutya okomitiye ndjoka otayi ka kwathela moku kondjitha iimbuluma kehe, sho otashi ka gandja ompito ku kehe ngoka teki iyadha ena uupyakadhi a kale ando a tseyithila okomitiye ndjoka wo tawu kandulwapo manga uushona wo inaawu ka eta iinima oyindji, wo tawu kandulwapo pambili.

Okwa indile aanamukunda ya kale yena ombili  ya lopote mbala uuna ya mona omainyengo taga limbilike pomahala mpoka haya shingile oshowo pomidhingoloko dhawo. Okwa kumagidha aakuluntu momagumbo opo ya kumagidhe aagundjuka momagumbo kutya opuna omikalo odhindji ndhoka hadhi longithwa okuyanda omadhipago, noya tseye kutya monkalamwenyo omuna omashongo ashike ohaga vulu okuyandwa.

Kansela ta uvaneke ta ka longekidha omutumba gomeendelelo nooyene yomikunda , opolisi oshowo ooyene yuundingosho moshikandjohogololo, yo ya tale kutya taya kandulapo omukundu ngoka ngiini.

Dho ooveta ndhoka dhilipo no ihaadhi gwanithwa koshigwana dhi tulwe miilonga,Okwa ulike kutya opena oondunda dhimwe dhaana uuthemba mboka tawu dhi pitike okulonga noku landitha pomahala mpoka.
 

 

LEAVE A REPLY

Please enter your comment!
Please enter your name here