Oshiwana nashi fimaneke oSORA

0
182

Omwedi waJuni naJuli owa kala nokulongifwa kovaleli, omitwe doitukulwa hano oongoloneya voitukulwa, oku yandja etumwalaka lelelo lopashitukulwa lokomudo.

Oshuufanene hashiningwa koogavena sha shivika nedina loshitakumi onga oState of the Region Address (SORA) oshi li sha fimana neenghono. Ashike nande ongaha oshiwana shetu osha fa kashi udite ko naana efinamo lasho.

Ovaleli vopaitukulwa nande hava kala noku ifana oshiwana moikundaneki unene tuu moradio, oho hanga ovanhu va nininini tava i vaka pwilikine oSORA. Ashike ngeenge owa pwiikine moraadio, unene tuu Ewi la manguluka olo hali kala koNBC koRadio yOshiwambo nomeeSMS odo hadi kala moifo, oto mono kutya omwaalu munene woshiwana ouna enota opo wuude kutya exumokomesho moitukulwa  ota li ende ngahelipi.

Shiwana, koSORA oko ookansela hava popi osho tashi linyenge moikandjohoololwa. Gavena konima oha yandje omushangwahokololo woshitukulwa mwa kwatelwa eepoloyeka odo da dilaadilwa, odo da longwa noda hanga efikilo naasho sha pumbwa oku ningwa, na oshina okuningwa ngahelipi nonaini.

Pamwe eembelewa doogavena nado oda pumbwa ngaho okulonga noudiinini ngeenge tashi ya kokuudifa ko oshiwana efimano loSORA. Oshiholelwa shiwa osheshi sha ningilwe kOshitukulwa shaMusati osho neudo shali sha tula oSORA yasho moradio, opo keshe umwe a pwilikine.

Eshi oshali oshinima shiwa neenghono, shaashi naau ina dula okufika ko koombelewa yoRegional Council okwa li ena omhito okupwilikina koSORA yoshitukulwa shaMusati.

Oshinima shimwe vali, Omusati owa kala lela nelitule mo okushivifila oshiwana, kombinga yoshuufanene eshi, noku shi shiva yoo omanga kuna omafiku. Eshi osha pa omhito oshiwana opo shi lilongekidile oSORA yasho, naau nee ina fika, oku na okukala eudite kutya oSORA oya fimana shaashi oya kala noukutuwa omufindo kelelo loregina moradio.

Kakele nee kokuya moradio, ovaleli vopaitukulwa ova pumbwa va kufe onghatu imwe vali ya wedwa opo va kwashilipaleke kutya etumwalaka loSORA ola fika komwaalu munene moshiwana.

Apa itatu popile oukwamuhoko, ashike okwa pumbwa ngaho okutalika kutya omwaalu munene moRegiona yonhumba ohau popi elaka lilipi po. Hano, naku longifwe Oshiingilisa, ashike okwa pumbwa ngoo oSORA opo i fatululwe momalaka oo haapopiwa unene moregiona yonhumba.

Nghaashi, ngeno oSORA yomoKunene oyo ya ningwa oshivike eshi, ngeenge ngeno otai fatululwa vali momalaka, ngaashi Otjiherero noshiDamara, shaashi aa oo omalaka haalongifwa unene moKunene. Moo mOshana, Omusati, noOhangwena, tai tulwa ngaho kOshiwambo omanga mOshikoto, tai fatululwa mOshiwambo noshiDamara noshiAfrikaans. Tashi twikile ngaho kOtjozondjupa nOmaheke, oitukulwa ivali yaKavango shaZambezi nosho tuu.

Oto hange oshiwana tashii momhepo nokeefacebook tashi pula exumokomesho keenhele davo mboli oshinima osho tashi pulwa oshili ashike momilandu depangelo, momafaneko eli popepi pepi, ashike shaashi oSORA ina i udikiwa ko ovanhu ota va i momhepo nokupula.

Okupwiikina koSORA otashi pe yoo oshiwana ewi okupula ovaleli ngeenge va dopa okuwanifa po osho va popya moSORA yomudo wa pita.

Kakele koSORA omalelo opaitukulwa okwa pumbwa yoo oku eta po omhito, nghee ili oya nuninwa ashike okupwiikina koshiwana hano okukufa ko omapulo nomawedelepo oshiwana, shaashi pomhito yoSORA, oshiwana iha shi kala shina omhito yokupopya novaleli. Luhapu ngeenge ovakwashiwana tava nyenyeta ookansela ohava kala tava ti ovanhu nava fike keembelewa, nava twale omanyeyeto avo keembelewa. Eheno shili eshi oshiwa, ashike oshafimana okukufa efiku la nuninwa okupwilikina oshiwana ngaashi naanaa haku kufwa efiku la nuninwa okulombwela nokupwilikinwa koshiwana.

LEAVE A REPLY

Please enter your comment!
Please enter your name here