TUYENI KOLUPALE LA TUYENI: Oye a ti natu hombole, vati eliko opo liye mumwe.

0
522

Oshili, vaNamibia ka mu hole tai popiwa,yo ne nghe ya kala ohai dipaifa ovanhu, efimbo limwe ohandi kala handi popi ndafa nda londa koifidi, nondaka yange ohai udika moNamibia alishe. OvaNamibia vamwe ohava kala tave lipula ta vati napamwe YA TUYENI okwa lile nande oinima yovanhu hano, molwaashi oha kala ta popi naai ina tumwa.
Vamwe ondi udite otamu ka kala moluhepo molwaashi ondi li po ku mu fiyapo, ashike inai fika okufya natango, vamwe otamu ka kala muna enota lo ku uda osho kwali handi mu lombwele, nye vamwe tamu ka tya ne iha twikileko ne vali vakwetu, ashike efimbo ola ya ne molwaashi kapena eshi shi hena exulilo naame onai ka xulifepo ngo okupopya nanye pamishangwa.

Omwedi ou ohai ka wanifa oule wodula andi popi nova Namibia pamishangwa, eshi ne handi lipula ngeno okwali ndina nande okakambe kange meumbo ko ka deulwa, ndele handi tameke okukadeula eemwedi 12 ndele itaka deuka oshili onda teelela vali shike no ta ka ningi vali shike meumbo lange.

Ina pa pita unene efimbo lile odula yadjako eshi kwali nda ingida ovakainhu ovaNamibia onye hamu pitifako eehango opo mu li monene omhito yokuhombolwa, ashike efimbo kwali handi popi kutya oshinima shi li ngaha oshanyika oshiponga kovakainhu, vamwe omwe ke lipula  mutu kutya, YA TUYENI, mboli okuna ondumbo nashe mutu ina hala tu hombole.

Manga ashike ina ndi ya mokati kehokololo eli, onda hala okulombwela ovalumenhu ovaNamibia amushe mu, pwilikine nawa, novalumenhu ava hamu itavele ovakainhu ovo muli navo ovo tave mu lombwele eehango, nanye oshili omwapuka molwaashi ngaho inamu hombola ndele nye omwa hombolwa, oshili, oshili osho ohandi shi popi, nande omwakufa omipini ndele tamu uya mu kongenge na pamwe onde mu twa komaxuli vaholike.

Eshi ohai shi ningi konima yo ku uda ehokololo la udifa nge nai. Ehokololo eli olo mumati adengela nge eli mo Windhoek, ta pula vati ndi mu pe omayele molwaashi okwa kondjifilwa mohombo komufuko waye, opo emu hombolepo, ashike eshi hatupopi ngaha ovanhu ava  vavali eshi veli meumbo, eenghambe dili koshana tadi deulwa xwepo vali. Sha hala hano okutya ombili nelandulafano ngheengo vei li xulile efiku vatulwa kumwe, onghenda shili.

Ehokololo lomumati nonande litilifa lafa oinima tai di kwinya, pauxupi olili ngaha.
Tate JOHN YA TUYENI, ame omulumenhu weedula dopokati, ashike ondili moupyakadi ndafa ndili moheli yokombada yedu, oufiku nomutenya ohandi nangala haikwena nohandi lipula kutya mbela oshike nda ningila ngaha?

Onda shakenene nomufuko wange moVenduka omu ndili paife ngaha, mo 27Juli 2015,ndele momafiku 18,Augste 2015 efimbo ashike ina li ninga nomwedi umwe wapitapo ye okwa kondjifa nge opo tu ka tulwe kumwe kuMengeshitalata wa Katutura moVenduka.

Ame ne, lopokati opo tate YA TUYENI, onda ka kanifa oilonga konima eshi twa tulwa kumwe, ashike ohandi dimbuluka nawa eshi kwa li ta lombwele nge ta ti natu ka hombole, ndele okwali nde mu lombwela kutya itashi shiva ndi longe ngaho fimbo ovakulunhu vange kOwambo ve he shishi, ta lombwele nge kutya naye ina lombwela ovakulunhu vaye, ndele okwa lombwela ashike oo kaume kae.

YA TUYENI, eshi handi popi ngaha katuna ombili nomukainhu wange, nonande oye a kondjifa nge tu hombole, konima eshi nda kanifa oilonga okwa tameka hadi koilonga omaufiku osho nokuli inandi shi mona nale, ndele ngeenge onde mu pula kutya okwa li peni, efimbo limwe ota nyamukula nge kutya, nai ka pule otuwa ei ye mu helulila peumbo kutya okwa li peni.

Nale ngeenge tai koilonga okwali ha djala olinga yae komunwe, ndele ne  konima ngo eshi nda kanifa oilonga, keshe fiku paife ngeenge tai koilonga oringa yae ohai tulwa mokandjato, okwali hatu nangala kombete  imwe atushe monduda yetu,ashike paife okwa landela nge okatalashe kutya vati naikale hai nangala pedu, eshi handi mu pula kutya omolwa shike, vati efimbo limwe ye ke hole omapiyaano, ame noxo nai dimbulukwe kutya noikumbafa ohaikoshwa.

Omolwa oku hauda kwange elaka lOshiingilisha, ngeenge okwa dengelwa ongodi oufiku, ohava tameke tava popi mOshiingilisha molwaashi okwa koneka kutya ame ihandi shi udu,ashike onda koneke po oshitya osho ehole oku popya ngeenge a dengelwa ohandi kala ndi udite po oshitya osho hashi ti, ya hani wange ya hani wange! efimbo limwe peumbo ohailwapo oufiku kotuwa yo BMW, ashike ngeenge okwa aluka ndele handi mu pula kutya okwa ile peni, ota nyamukula nge kutya, o BMW ino imona hapo yali ofika poshivelo opo oshike ino ipulila, ilo a tye sha nge vati okukofa kai shi oilonga yange oyo.

Tate YA TUYENI, ame oshili omulumenhu handi mono o oixuna, ashike paife ohandi li pula kutya ondafa aame mwene ndeshi li kongela, efiku limwe okweyapo nomushamane mukwetu ndele tava kala omutumba  mosheti tava tale otv, ye ota lombwele nge kutya vati omushamane ohava longo  naye nandi ye ndi ke va tulilepo oikulya molwaashi ye okwa loloka.

Tate YA TUYENI, ame ohaimono oixuna komukulukadi ou, eshi vamana okulya nomushamane oo ovaya monduda yetu omu hatu nangala okwa lombwela nge vati ame nandi kale manga mosheti haitale otv, ye otaka pukululwa manga komushamane monduda oshinima vati hashi mu nyenge shili kokombiuta molwaashi mondunda omu hatu nangala okunamo okombiuta, omo ne va kala omo po opaidila mbela ta pukululwa

Mo otamu mbulukuta mbela otava kondjifa ne oshinima eshi ta longwa.
Oikutu yomukulukadi wange konima ashike eshi nda kanifa oilonga aame haandi kosho, ndele nounima vaye vopeembelewa da Ngwediva aame handi va kosho, ngeenge okwa hange inai teleka oha kala ta pulange omapulo kutya hano ame oilonga yange meumbo omu oya shike.

Oshikando shimwe otwa ile kOwambo ndele ina hala tu ye keumbo letu otwa ka ninga omafiku keumbo lavo, ame vati aame ngo nda hombola, efimbo limwe tate YA TUYENI, naame oshili ohandi kala ngo nda hala ouvalelo wovakulunhu, ashike paife ngaha opapita eemwedi 8 inaa telekela nge oikulya yovakulunhu, oshili ohandi mono oixuna  vakwetu.

Paife mumati wange eshi toti nandi ku pe omayele okombinga ya shike, shotete ove owa  puka, omulumenhu wa holwa ndele to itavele nde to hombolwa noxo, molwaashi mehokololo loye otamu ulike naana kutya omukainhu woye oye a dana onghadangala yokweetapo ohombo yeni osho shapuka nale monghalo na ihashi ningwa.

Oshitivali omukainhu ou ku mushi nawa, omwa ninga ashike naye omafiku 28 ove oto lombwelwa ohombo ove otoitavele, ovashamane ovo heya navo meeumbo omo, ovaye vakulu kulu, ove paife shi kunukifa mo omwenyo opo uka hombole meendelelo, eliko ne eli wauda takuti otalii mumwe, eliko talii mumwe eli tali tongwa otaku ti naave oto ka shaama nowishi melambo.
Oupyakadi  woye ou, oshili kandiwete tau mono exulilo, molwaashi ove omulumenhu we he hole okutala nawa, opo ukufe onghatu yoku hombola, onghe ngeenge to telekifwa noku nangekwa pedu pokatalashe ino uda nai, oshayela nale kutya nounima vovanhu vokeembelewa daNgwediva ouna okuvafila oshisho opo vakale va yela, eehombo osho dili ngaho.

Mumati wange ouna kondja ashike ne mu pa loye, molwaashi naashi wa ka hombola owa hekwa taku ti ino lombwela ovakulunhu voye, osho osha ningilwa owina opo ukale to kwewa eeshikele ove ku na ou toka lopotela, ove noxo owapuka molwaashi ovakulunhu voye oveli ngo kOwambo va teelela omulumenhu wa ka longa mboli kwinya ouliko vali wa hombola.
Efimbo limwe novalumenhu omwa pwilwapo efimbo komaliko, nghee ngo to hombola omunhu osheshi tati eliko otalii mumwe, na p amwe okwa hombolelwe nale nande oku mu kweni ndele ye te ka tatula opo ne pakale eliko ngaho, ove oove ne tokalapo vati molwaashi wa ninga shike?

Ame ne kaume wani, ka ndiwete ndina eshi handi ku wedelepo molwaashi oto ka tya ndaya pokati kohombo yeni osho, osho to ka tonga efiku to ka telekelwa ouvalelo wovakulunhu ngaashi ngo we shi lixula nale ngaho, shapo ohai ti ashike ngeenge ohombo yeni ouwete kutya oyanyaya keonga unene, shapo kufa okatalashe koye ndele to kala hoka nangala peembelewa daMengestalata poKatutura opo, opo ngo pa dilila nohombo yeni noxo napamwe to mono po ekwafo.

JOHN YA TUYENI
MRTUYENI76@GMAILA
CELL 0812988549

 

 

 

 

 

LEAVE A REPLY

Please enter your comment!
Please enter your name here