Ekengho olafimana …ashike inaku tiwa nai kawe nomulondi…

0
253

 

Oshikonga shi li po shekengho lovalumenhu osho tashi ningwa kOuministeli wOuhaku moshilongo ashishe osha fimana neenghono mokulwifa etandavelo lombuto nomukifi woHIV/AIDS.

Ashike nande ongaha opena vahapu ovo ve udite ko ekengho pombambo nota va pukifa oshiwana.

Opena vamwe tava lombwele oshiwana kutya ekengho kali na sha nekondjifo loHIV, voo vamwe otava ti ngeenge owa kenghwa kuna efiku ukwatwe kombuto yoHIV/AIDS.

Ashike eengudu edi mbali kadi li mondjila. Oshikonga shekengho otashi yelekanifwa ashike noshikonga hashi ningwa koshikondo sheameno lomeendjila tashi ti ngee to shingi, limangela mo. Ashike ina ku tiwa ngee owe li mangela mo metuwa, shinga nouhasha. Ngeenge owe li hange moshiponga shekandomo lohauto, ndee owa hangwa we li mangela mo, omhito yoye yokuxupa oili pombada i dulife yaau ine li mangela mo, ashike itaku tiwa ito dulu oku fya moshiponga shohauto ngeenge owe li mangela mo.

Osheli fa ashike nomulumenhu a kenghwa naau inaa kenghwa. Omulumenhu a kenghwa okuna omhito ile okwa amenwa fiyo opeepelesenda 60 opo a ha kwatwe kombuto yoHIV, ngeenge okwa i momilele ina di amenwa, oku yelekanifa naau ina kenghwa. Ashike ina ku tiwa ngee wa kenghwa nai ka we nomulondi. Ina ku tiwa xuli fa po oku longifa ocondoma ile kala una ookaume vomilele vahapu.

Omavalulo oshikonga shouhaku mo2015, otaa ulike nghene oshitukulwa shaMaheke, Kunene noHardap oyo ina ovanhu va nini tava lumbu nombuto yoHIV/AIDS, okuyelakanifa noitukulwa ikwao ngaashi shaZambezi osho sha shiya ko moshilongo ngeenge osheya komwaalu waava va kwatwa koHIV, sha landulwa kOmusati, Kavango, Ohangwena nOshana.

Ngeenge nee shili owa tale koitukulwa ngaashi Omaheke, Kunene noHardap, oko ko ku na ovapopi velaka lOtjiherero. Ovapopi velaka lOtjiherero, ekengho oshinima hashiningwa omunhu a hala ile ina hala, hano hashi ningwa onga oshitukulwa shomufyuululwakalo. Ounona vOvaherero ohava kenghwa omanga vashona, ngaashi naana Ovakriste vahapu hava shashifa ounona vavo omanga va shona. Omanga oiwana yOvawambo, ovaCaprivi nOvakavango, ekengho ka lili oshitukulwa shomufyuululwa kalo davo.

Ashike nonande Ovaherero ovalumenhu aveshe konyala ovakenghwa, ita shi ti ito hange omupopi welaka lOtjiherero ile Otjizemba noshiHimba ile omuTswana a kwatwa kombuto yoHIV. Okutya ashike kava hapu vafa ovapopi vomalaka makwao moshilongo.

Ngeenge owa tale moilongo ngaashi moKenya, Uganda na South Africa, oilongo oyo ya talika ko ya longa noudiinini ngeenge ota shi ya kekondjifo lo HIV/AIDS, ekengho lovalumenhu oli li shimwe shomoilongifo va longifa oku kondjifa ombuto.

Kakele kombuto yoHIV/AIDS ekengho ohali kwafa yoo mokuamena ovalumenhu komikifi dohoni, nokeembuto odo hadi dulu oku kwata okamhunda komaxu mwa kwatelwa okanca haikwata ovalumenhu koilyo yoidalifi.

Omulumenhu a kenghwa ota amene yoo omukainhu waye opo a ha kwatwe ko ‘cervical cancer.”

Hano oshiwana sha Namibia otwa pumbwa atushe oku li tula mo moikonga oyo hai etwa po kepangelo, ngaashi naanaa eshi shokulwifa ombuto yoHIV, nashikwao vali shili ko omafiku aa shoku kondjifa omukifi wokakwenyene (measles) norubella, osho tashi xulu mEtitano tali ya.

Hano efimbo limwe natu dinde ni ngeenge omunhu nande oku kale omunenenhu ta sheke oikonga oyo ilile po oku amena eemwenyo dovanhu. Opena ovakwatelikomesho voshiwana, mwa kwatelwa ovaleli vamwe hava kala tava sheke oinima ina oshilonga.

Oshiholelwa peedula do 1999 no2008, Omupresidende pefimbo olo waSouth Africa Thabo Mbeki a li a lombwela oshiwana shaye kutya ombuto yoHIV hayo hai eta oAIDS. Nonande lwa nima aka aluka atye okwali a puka, ovanhu veli pokati ko343 000 no365 000 ova li va fya komikifi da etifwa kombuto yoHIV/AIDS, pefimbo lomupresidende ou.

Hano valumenhu voshiwana shetu ovo inaamu pita etanda indeni mu ka kenghwe manga kwa talala nawa.

LEAVE A REPLY

Please enter your comment!
Please enter your name here