Kutheni ombinga metoto lyooveta

0
224

 

 

OMUTHIYA  – Sho a tsakanene noshigwana pOmuthiya Etitano lya ziko omunashipundi gwOmutumba omutiyali gwopashigwana Margret Mensah Williams okwa kumike oshigwana opo shi kuthe ombinga metoto lyooveta.

Williams okwa  ti etalelopo lye kiitopolwa ayihe yoshilongo otali  lalakanene oku hiya aakwashigwana ayehe opo ya kuthe ombinga mengongo po lyoompango dhoshilongo ndhoka hadhi shangwa koParliamende. Okwa ti shika otashi ya pe ompito opo ya kale ye shi shoka tashi inyenge momidhingoloko dhawo.

Williams okwa popi ndhika manga ta tsikile etalelopo lye kiitopolwa yoshilongo ndyoka a tamekele pehulilo lyomwedhi gwayi no ta li hulu oshiwike shika.

Ndika olyo etalelo po lyotango lyomunashipundi gwEgumbo Etiyali lyopashigwana, okutsakanena naawiliki miitopolwa osho wo aakwashigwana noku pulakena iiyetwapo nomathaneko gawo ye e ga faalele komutumba.

“ Otuna omalakano ogendji okuyambulapo oshigwana shetu, unene ngele tashiya ketoto lyooveta, otwa hala aakwashigwana nayo ya kuthe ombinga mo shinima shika, yo ya kale ya tseya uuthemba wawo,otwa hala opo omalelo giitopolwa oshowo gomomikunda ga kale taga longele kumwe go ga adhe esindano,” Williams a kumike.

Okwa pandula elelo lyOshikoto sho tali longo nuudhiginini opo li etepo ehumokomeho, nokuwete kutya ekuthombinga lyaakwashigwana momathaneko otali ka eta sha mehumokomeho. Okwa endulula eindilo lye kaaleli ayehe ya longele kumwe naakwashigwana, yo taya kala haya uvu noku pula omayele muyo oshoka oyo ye ya hogolola.

Williams okwa pula aakwashigwana ya kondjithe omashongo ge ya taalela, yo aagundjuka ya totepo oompito dhiilonga yoyene, yo ya yande iimbuluma. Okwa pula wo ku kondjithwe onkalo yoluhepo, yo mboka ye na ya kwathe mboka yaana sha.

“Natu longeni muukumwe opo tu yambulepo oshilongo shetu, tse tu kale tuna ombili nena nehumokomeho otali ende ngaashi shu uthwa, otatu kala tatu ningi omatalelepo tse tu pulakene omakemo nomadhiladhilo gaakwashigwana, tse tu tale kutya omaupyakadhi ngoka yena otatu ga kandulapo ngiini.

Okwa kumagidha aakwashigwana ya yande omahepeko momagumbo oshowo yi iyageke uukwamuhoko, yo ya kale yeshi kutya muukumwe otaya sindana.

Ta ti naya lalakanene aluhe ombili yo ya ninge Namibia limwe nomuntu gumwe, ya kale ya talathana ongomuntu namumwayina. Ta indile aaleli ya simaneke aalelwa yawo. Okwe ya pula ya kale aluhe haya ningi iigongi yo ya pulakene omathaneko ngoka aakwashigwana yena.

 

 

LEAVE A REPLY

Please enter your comment!
Please enter your name here