Omukainhu a tetaula ounona vovamuaina nomakatana

0
315
Okamatyona ka tetwa nekatana ku ina mumwaina waina oshivike eshi , molwashi vati ka nwamo onevilapine yokaana kainagona.

Ongwediva

Okaana kokamati keedula 10 otaka mono epango koshipangelo shaNandjokwe omanga ka kwao kokakadona keedula 11 ka ninga oipute momutwe eshi vati ka tetaulwa nomakatana ku ina, mumwaina waina weedula 35.

Okaana aka kokamati oka tetaulwa momutwe, keenyala, kokwooko, nokokuulu. Okena yoo oipute inini molutu alishe, Aka kokakadona koo vati oka ninga ashike oshipute shimwe, ka xupa meenyala daina oye tuu ou eshi ka hepa eonga olo eka kupula.

Oshiningwanimwa eshi shi kumwifa osha ningilwa, moshitukulwa shaShikoto, momukunda Onyeka mOkatope,  nomukainhu ou ta fekelwa oye Konayena Kambonde (35).

Analisa Kambonde, ina yokaana oko ka tetwa nekatana, ota ti okaana kaye opamwe nakakwao kokamwainagona, oko ka dalwa kumumwaina vali umwe, vati ova dengwa shaashi va nwa mo omuti wokaana ka Konayena, oufiku wEtitatu ladjako.

Otaku hokololwa Konayena a li a ya koundingosho vopomukunda wavo oko a tokelwa fiyo opo 23h00, hano pomulongonaimwe woufiku.

Eshi e uya meumbo oufiku vati okwa tameka ta denge ounona, tati ova nwa po omuti wokaana kaye.

Okaana aka kokakadona oke shi pondola okufaduka po, ashike vati okwe ka umba neonga, omanga kali taka faduka po.

Okamati okwe ka fitikinina mondunda yoshipeleki omo eka tetela nekatana. Onga onghendabala yokuxupifa omwenyo wako, okaana aka oka ya koshi yombete, ashike Konayena okwe shi pondola oku ka tetela ko kokuulu.

“Elao linene monduda oyo yoshipeleki ina mu kolongwa, okaana oka dula oku fa koshi yoshipeleki, omanga keli koshi yombete ndele taka faduka po,” Analisa ta hokolola.

“Onde ka teta shaashi ova nwamo omuti wonevelapine yokaana kange. Eshi nda kala handi va pula ova kala tave li patana, ove ke shi itavela ashike eshi nda tameka oku va denga,” Konayena ta ti.

Omukainhu ou ta ti kali ena ehalo okuteta okaana nekatana, shaashi vati okwa li ta dengifa molupati lekatana, ashike eshi kaya koshi yombete okwa ka haluka ashike eka teta.

“Moshipeleki omwali mwa laula neenghono, ame ondishi ohandi denge nolupati, mboli ondeka teta,” ta ti ngaho.

Eshi a pulwa kutya omolwa shike ena oku kufila ounona omakatana nomaonga, Konayena okwa ti ye okwa kufa ashike keshe osho sha li popepi naye pefimbo opo.

Analisa okwa hokolola kutya halo lwotete mumwaina ou ta hepeke ounona ngaha. Opena vali efimbo limwe kwali eva dengaula shaashi vati va teleka ouvalelo wetete. Omanga okaana kali okahanona lela, Konayena vati okwe ka vakulile okaana oko kokamati opo kali ka nangala, moshipeleki, ndele teka umbile pondje, afa ngeno ta ekele shi etanga.

Konayena oye ashike a kala mo meumbo, nounona vavamwaina –Analisa oha kala koWalvisbay, omanga inakulu younona (ina yooAnalisa naKonayena) eli moshipangelo kOtjiwarongo.

Chief Inspector Edna Nawa wopolifi yaShikoto okwati, opolifi oyali ashike tai kongo omauyelela amwe.

“Ashike ota ka kwatwa po nena (mEtitatu),” ta ti ngaho.

Nawa ta ti ovapolifi ova ile kofikola kOnankali, oko va li va hanga okaana oko kokakadona nako kena oshipute momutwe, ka tetwa nekatana. Ashike okwa pataneka ouyelele wa yandjwa kovakwapata kutya Konayena okwa li a kufila ounona eonga, ta ti opolifi oya hanga ko ashike ekatana.

Child-hacked2

Okamatyona ka tetwa nekatana ku ina mumwaina waina oshivike eshi , molwashi vati ka nwamo onevilapine yokaana kainagona.
Okamatyona ka tetwa nekatana ku ina mumwaina waina oshivike eshi , molwashi vati ka nwamo onevilapine yokaana kainagona.

 

 

LEAVE A REPLY

Please enter your comment!
Please enter your name here