Ongerki yaELCIN moshikogo oshiluudhe

0
307
Omusita Alpo Mauno Enkono, kolumoho, Omwanakadhona gwanakusa Alpo Mauno Hukka, Omumbisofi Veikko Munyika ya thikama konima. Komeho kolumohomo omukulukadhi gwa nakusa Hukka osho wo nakusa Alpo Hukka, ya thanekwa pethimbo lyetalelopo lyambushe nOmumbisofi Munyika koSuomi muApilili nuumvo.

 

ONIIPA – Oshiwike shEtumo oshali oshiwike oshidhigu kongerki yaELCIN sho yali ya kundana onkundana yeso lyomutumwaa Osoomi, gumwe gomwaamboka ye eta evaangeli mOwambo,omusita Alpo Mauno Hukka ngoka a tseyika koyendji molwa iilonga pondoli a longa.

Hukka okwa manene oondjenda dhe momasiku 4 Juli nuumvo mepipi lyoomvula 100 mOsoomi. Osoondaha ya ziko konima yelongeloKalunga sho kwa ningwa etseyitho ndika lyeso okwali kwa ningwa oshituthi dhimbuluko she, mono Omundohotola Tomas Shivute ali emu hokolola nkene ena uukwatya tawu hokitha.

Shivute a ti Hukka okwa longo nuudhiginini nokukwashilipaleka kutya etumo olya longwa nolya uvithilwa aantu komapyatumo moshilongo, yo aantu ya longwe okulesha,okushanga oshowo okuyalula.

Hukka ngoka taku hokololwa a kala ethimbo ele moNamibia okwa kwatha moku uvitha ohapu yomwenyo oshowo oku taandelitha evaangeli koombinga noombinga dhoshilongo. Omusita Alpo Mauno Enkono ngono a lukilwa nakusa Hukka okwa hokolola mbushe ali ependa moku uvithila aantu.

“Otandi lili mbushandje, ihe nande ke mo we muuyuni muka okwetu thigila uuthiga mboka itaawu hulupo, okwa longa sha gwana no tatu pandula Kalunga sho ali etu pe omuntu omwaanawa ngoka etu etela evaangeli nokwetu uvithile pethimbo ali momwenyo” Enkono ati.

Okwa hokolola nkene she ende opo a lukilwe Hukka ta ti molwaasho pethimbo lyonale iipangelo oya li yi li kokule yina sho a adhika koshitheta oya li ya ningi onkambadhala ya tale ngele taya mono ohauto oshoka oohauto odhali nadho dha pumba.

“ Oyali anuwa ihe ya mono ohauto ya Hukka tayi taakana niishana , noye mu ithana opo eye a fale yina koshipangelo anuwa, manga ashike ya adhika yeli mondjila oshitheta anuwa oshali sha geye na ondali nda valelwa mehauto lya Hukka , naakuluntu yandje oya li ye mu lukile ndje po sho osho nee handi ithanwa Alpo Mauno,” Enkono ta popi ngaaka.

Tati sho a koko oya kala nambushe naasho a shuna kOsoomi oya kala haya ningi omakwatathano, okwali a kongo ompito yokutalelapo Osoomi muApilili nuumvo nokwali a adhako etumwalaka kutya anuwa ngele a thiki na ka talele po mbushe ngoka a kulupa nokuli.

“Ondali ndayi pamwe nOmumbiisofi Veikko Munyika na mbushandje moku monandje okwali ta lili omahodhi genyanyu, otwa kala naye ethimbo tatu hokolola ye ta lombwele ndje olweendonkalo lwe, manga ndali mondjila yandje okuya kiilonga ondali nda kundana kutya mbushandje okwa mana oondjenda dhe nonda mono kutya okwa kondjo ekondjo nokwa sindana,” Omusita Enkono ta gwedhapo ngaaka.

Hukka okwa thigiko omukulukadhi gwe oshowo oyana, aakwaLuther oya gandja omahekeleko kaakwanezimo lya Hukka, opo omwenyo gwe gu vululukwe nombili.

 

 

LEAVE A REPLY

Please enter your comment!
Please enter your name here