Oshigwana sha gandja kenongelo lyokuushayi

0
248

OMUPANDA –Ookuume naakalimo moshikandjohogololo Ongwediva oya gandja  oshindji osho wo oya uvaneke eyambidhidho lyawo kosikola yimwe yomoosikola oonkulu momikunda dhomoshikandjo hogololo moka.

Enongelo ndika lya tseyika shito ongo Omupanda Combined School, olya lukululwa noku pewa edhina epe Matheus Mudjanima Combined School mEtitano lyayi, ya lukilwa omukuluntusikola gwayo gotango.

Enongelo ndika Omupanda Combined School olya dhikwa po omumvo 1935 sho aalongwa yotango yali haya longelwa momuti guli lwopopepi naampoka osikola ndjika ya tungilwa ngashingeyi. Pethimbo ndika osikola ndjika oyina oGrade okuza pu yotango sigo ontimulongo. Osikola oyina aanona ye vule omathele 400 naalongisikola omilongo mbali.

Kakele kokulukulula osikola yoyene, ewiliko lyosikola olya lukile omatungo gosikola aalongi aakulu yoposikola ndjika oshowo aalongwa.

Omafamilia nookume kaamboka ya pewa esimaneko ndika oya gandja omagano giikwathitholongo, mbyoka ya kwatela mo ookompiuta, ooprinta, uushina wokuyalula, omambwiitya, oopena, noombapila dhokuprinta mokati komagano ogendji.

Osikola oya pewa wo oongonga dhoondhalate dhoshiyala okuopaleka nawa olugumbo lwayo. Oya taamba wo omagano goshimaliwa koomuma shi vule pooN$ 28 000. Oompumbwe dhosipana yetanga lyokoompadhi adhihe odha kandulwapo wo kaagandji. Omiyalu dhoshimaliwa dha gwedhwapo odha uvanekwa wo pethimbo lyoshiithanene shika.

Mboka ya ningi omauvaneko oya kwatelamo Minista nOmukuluntu Ndjai gOkommissi yOmathaneko gopashigwana oshowo Oshikondo shOmathaneko gomahupilo, Tom Alweendo omushiinda shomukunda ngoka mpoka pena osikola ndjika, omunangeshefa gokuumbangalantu, Isai Nhinda nOmukuluntupitithi gwehangano lyaNored ,Fillemon Nakashole oyo yamwe ya ningi omauvaneko.

Omukuluntusikola Reinhold Iita, okwa pandula ayehe mboka ya gandja , a ti iinima ayihe mbyoka ya gandjwa otayi ka etapo elunduluko melongo nomokwiilonga kwaanasikola.

“Oshiholelwa otwa li neshongo enene kombinga yolugumbo lwosikola yetu, ihe ndika olya monenwa eyamukulo, oshoka otwa pewa oongonga odhindji dholugumbo. Osha faathana nuushina woku yalula, otwa kundathana nkene tatu ka longitha uushina mboka twapewa omagano,” Iita a ti.

Iita okwa ulike kutya kakele kuupyakadhi wu na sha nolugumbo lwosikola, oye na wo ompumbwe yetungo lyewiliko posikola, oshikwawo eindjipalo lyuundingosho popepi nosikola nalyo olili eshongo kiilonga no ke ilongo lyaanona.Omaupyakadhi galwe ngoka itaage ya kothitha oga kwatelamo wo omatungo ga kulupa noonkondo, uusimba mokati kaanasikola, ompumbwe yetungo lyookompiuta oshowo ompumbwe yointaneta.

Ehangano ekwashilipaleki lyoMetropolitan/Swabou olya uvaneke tali ka tunga olabora noku yi tula ookompiuta dhili 35. Aagandji yamwe oya gandja iilongitho yo intaneta mbyoka tayi kala tayi longithwa pakathimbo kosikola opo yi vule okuya mo intaneta.

Mboka ya gandja oya kwatelamo ezimo lyanakusa Matheus Mudjanima, omukuluntusikola moshipundi shevululuko, pOmupanda Johannes Amutenya, ezimo lyomulongi posikola ndjoka nakusa Protosius Tueumuna, Maria Mulongeni, Sylvia Hamukonda, Albertina Uugwanga, aanasikola aakulu poskola  Tuyenikelao Shatona na Matilda Kadhikwa, Shilimela Security nomunangeshefa Willem Haipinge oku tumbula po yamwe.

 

LEAVE A REPLY

Please enter your comment!
Please enter your name here