Otonamende yetanga lyokoompadhi poMatheus Mudjanima

0
290

 

 

Osikola yoMatheus Mudjanima Combined School moshitopolwa shaShana otayi kala noku dhanitha otonamende yuudhano wetanga lyokoompadhi omumvo kehe.

Otonamende ndjika tayi ka tameka nuumvo, oya tseyithwa pethimbo osikola ndjika ya ningile oshituthi shelukululo lyayo pambelewa oshiwike shayi.

Enongelo ndika lili moshikandjolongo Onamutai olya kala li shiwike nawa Omupanda Combined School. Ihe okuza mEtitano oshiwike shayi olya lukululwa pambelewa nongashingeyi otali ithanwa Matheus Mudjanima Combined School.

Pethimbo lyoshiithanene shelukululo, opwa li pwa hiywa aalongwa aakulu yosikola ndjoka oshowo aalongi yopetameko yosikola ndjika. Mbaka oya simanekwa noku zalekwa iinakugwanithwa opo ya kwathele meyokomeho lyenongelo ndika melongo lyayo oshowo mokudheula aanona oku udha.

Gumwe gomaalongwa penongelo mpoka pomimvo dhomilongo 1970 okwa pewa oshinakugwanithwa shokapale kuudhano wetanga lyokoompadhi. Omulongwa nguka Matilda Katoshe Katonyala Kadhikwa moku taambako elukilo ndika okwa pe oshikondo shuudhano posikola ndjoka iilongitho oyindji yuudhano nelalakano oku kumika aanasikola ya kuthe ombinga metanga lyokoompadhi opo mbaka esiku limwe ya ka kale aanamadhina ngele tashiya kuudhano mbuka.

“Aadhani onde ye etela wo omatanga ga kola gongushu naanaa yaa ngoka haga dhanithwa kaadhani yoPremier Liha moshilongo, Uefa,  nenge palwe muuyuni. Ngaka otaga ende wo pamwe noohiya, owili yoku yalula ominute  nuupandela woolinesmen” osho Kadhikwa a tseyitha pethimbo a li ta zaleke mbushe iizalomwa ye.

Okwa gandja omizalo dhokwiidheulitha dhaadhani omilongo 22, oonete dhookoola dhili mbali, omakende gomeya gaadhani, oompunda dhiizalomwa yaadhani. Okwa pe wo oshitopolwa shuudhano oshimaliwa koomuma opo shi ka kongele ospana yaMatheus Mudjanima omuzalo guudhano gopambelewa.

Kakele komagano ngoka, mbushe yokapale kuudhano wetanga lyokoompadhi okwa pe wo oshimpungu shuudhano posikola ndjoka ekopi tali ithanwa Katoshe Kadhikwa Charity Cup  noombandi, opo osikola ndjika yi kale hayi kala notonamente omumvo kehe tayi dhanwa pokati koosipana dhomanongelo gomoshikandjolongo Onamutai. Okwa uvaneke wo ta gandja oshimaliwa shoka tashi kala tashi endele pamwe nekopi ndyoka.

Uudhano mbuka owa uvanekelwa wo ekwashilipaleko lyoshimaliwa oshinene komunangeshefa a tseyika nawa muumbangalantu, Isai ’ Nhinda ngoka a ti ota kala noku gandja omwaalu gwa tameka pooN$2 000 uuna otonamende ndjika tayi dhanwa, na ota kala noku indjipaleka oshimaliwa shoka noodolaN$1 000 omumvo kehe, uule womimvo ndatu.

Ekwashilipaleko ndika olya pandulwa unene kelelonongelo oshowo kosikola yoyene. Omutalelisikola moshikandjolongo Onamutai okwa kumike aadhanitanga poMatheus Mudjanima Combined School opo ya kale aluhe yi ilongekidha yaa yugwe ekopi lyawo niimaliwa koosikola dhomoshikandjolongo shoka.

 

 

 

 

 

 

LEAVE A REPLY

Please enter your comment!
Please enter your name here