Ovakulupe moRosh Pinah noOranjemund vapewa omaano

0
209

Oranjemund – Ovakulupe novanhu ovo vena oulema moshikandjohoololwa sha Oranjemund na Rosh Pinah ova pewa omaano omakumbafa, oikutu, oikulya neefewa kuKansela woshikandjohoololwa shambulavo mehulilo shivike olo twa dja.

Kansela woshikandjohoololwa sha Oranjemund na Rosh Pinah Rasalus Nangolo okwa lombwela Kundana kutya, ovakulupe osho yo ovanhu vena oulema ova pewa omaano okudilila moshikefa shoshikandjo hoololwa shambulavo, pakulongifa eeplesenda dili nhano doshimaliwa, odo da nhuninwa okulongifwa paku yambulapo oshikandjohoololwa shavo odula keshe.

Nangolo okwa fatulula kutya, oshimaliwa shifike N$37 000, osha longifwapo moku landa omakumbafa, eefewa, oikulya noidjalomwa yovanhu ovo vena oulema novakulupe, vomo shikandjohoololwa osho tuu osho.

Kansela okwa tumbula kutya oshimaliwa nande sha longifwa mokulanda oipumbiwa yo vakulupe novanhu ovo vena oulema, ovanangeshefa vanini moshikandjohoololwa navo yoo ova monako okapambu, opo vadule oku yambulapo eengeshefa davo.

Nangolo okwa ti oshimaliwa shifike N$15 000, osha longifwa mokufuta ovahondji moshikandjohoololwa, ovo vali vapewa oshinakuwanifwa vaye peenhele dovakulupe novanhu ovo vena oulema, moshikandjohoololwa sha Oranjemund na Rosh Pinah opo veva mhete kutya ohava ndjalele  mongapi, noku vapula yoo kutya ova hala va hondjelwe oikutu yoludi latya ngahelipi.

“Oikutu oyo ya havalekwa ovakulupe novanhu vena oulema oya hondjwa kovanangeshefa vomoshikandjohoololwa shetu.” Nangolo osho a yelifa.

Kansela okwa pandula unene ehangano laNAMDEB eshi la yandja omakumbafa eli 25 awe dwe pomaano oo taa pewa ovakulupe novanhu ovo vena oulema moshikandjo hoololwa.

Omukwatakanifi wongudu yo SWAPO mo Dristrika ya Oranjemund na Rosh Pinah Maria Ndapuaoudja Aludhilu pefimbo lokuyandja omaano okwa pandula unene ovanhu vena oulema no vakulupe ovo vali va ongala, ta tumbula kutya ovakulupe ovo veli ova yandji mayele kovaleli vavo. Tatu omukumo ovakulupe ovo veli moshikandjohoolwa sha Oranjemund na Rosh Pinah va twikile noku yandja omayele kovaleli vavo naunene tuu ku Kansela woshikandjohoololwa shavo, opo vadule okuhanga omalalakano.

Aludhilu okwa yandja olupandu laye eshi vena Kansela oo eli lela omunyasha, no kwe mu  dimbulukifa  opo alonge noudiinini, adule okuwanifapo oinakuwanifwa aishe opo oshikandjohoolololwa shi dule okuyambukapo. Pefimbo olo tuu olo Aludhilu okwa indila ovakalimo moshikandjohoololwa vakale va manguluka pakuyandja omayele oo taa tungu, kuKansela woshikandjohoolwa shavo.

 

LEAVE A REPLY

Please enter your comment!
Please enter your name here