TUYENI KOLUPALE LA TUYENI: Vati mboli okwafya oshivatu

0
325

Ondi shishi nale kutya vamwe vomunye ava mweya mounyuni wemanguluko, ngeenge taku popiwa oshivatu kunye osha fa okatana komoilya aka haka tongwa, ashike oonakulesha ava muna eedula dihapu fatululileni ovanyasha kutya oshivatu oshike.

Paife natu ye ne manga ku imwe kwali haimonika moshilongo shetu ndele konima eshi ovatilyane veya vaetelela oipangelo. Okwa fa taku tiwa nokuli naapa ngo ya ninginine nga shili tu,  nga ngo nee omaitavelelela molwaashi oilumbu vamwe otui hole ohonde, ngaashi ne oshivatu osho sha popiwa pombada moshipalanyole shetu.

Shiwana, opo ne tu ude nawa kombinga yoshivatu molwaashi naame omashini mokanya okwafa ngo inaapwamo nawa, onda ya meenghudafana pangodi na meekulu Mukwahepo ya Sheetekela kOkalongo ye etu lombwele ombaxu nokavava, kutya oshivatu oshike naanaa hano, meekulu okwa dalelwe 1925 a dalelwa meni la Angola, ashike natango okwafa ngo tati eedula odo daye odavo dOshimbadja mutu hado naanaa.

Haalou halou!!! Mukwahepo opongo uli po ngodi hano ne? Eeheno opo ndili, olye hano  ta dengelenge?  omutekulu woye YA TUYENI, handipopi okudilila komaonda meekulu. Oo opo ne uli mutekulu wange hano owa ninga ombwiti ihoi kOwambo ukatalelepo nyokokulu Mukwanambwa waMutilifa pOhamilema ngo popepi opo?

ahowe meekulu inai ninga ombwiti, opo ngo ne nda hala ndike mu talele po paife, ondaninga ngo eedula 6 inandi yako, ashike oshidu eshi kwali sha kwatange osho ne konyala shatwaalelange mbela oshili ne mumwe noshivatu eshi hashitongwa meekulu.
Kaanave YA TUYENI, hano oto popi oikwashike, owauda oshivatu hashikwata ovalumenhu ou eku lombwele eendaka dapilamenako ngaaho olye oshili mmm oixuna vakwetu Kalunga kange.

Oho, Mukwahepo hano ngeenge taku tongwa oshivatu oshike oshili ame ondishi ngo napamwe omukifi ngo umwe ulipo ngaashi eemalaliya dili mounyuni omu?

YA TUYENI, hamba oshili ino kula ngoo natango mumati wange, ngeenge takupopiwa oshivatu, ombuto yomukifi ya kala haili ovakulukadi una ngeenge veli pefimbo lokumona ounona ndele osha kala ne hashi twalele neemwenyo davo kwa li pehena omashendjo.

Haaiti, meekulu oshivatu oshakala hashi et ifwa koshike meekulu ne hano mboli?
YA TUYENI, oshivatu mumati wange kakwali ashike ha shi li ovakulukadi aveshe ava veli momateelelo, ndele oshivatu okwa li hashikwata nakupewa edimo komulumenhu, ndele manga edimo lili molutu taka yapo vali momilele novalumenhu vamwe, osho oshivatu shakala hashi tongwa.

Aai, meekulu Mukwahepo, paife oshivatu eshi okwali ne hashi twaalele nomulumenhu oo aiwa naye momilele olutivali, ilo okwa li ashike hashili nakupewa edimo hano?

Ahowe YA TUYENI, udako nawa ndele to landula mutekulu wange eshi handi popi apa, oshivatu oha shi li ashike kwali nakupewa edimo molwaashi pefimbo loku kamona okaana, ohanona oyo tai dalwa okwali ashike haikala moshivelo yamwena yo itaipitimo ilo efimbo limwe a kanife ohonde ihapu nokuli  nafiyo ina takanifa eenghono, ilo efimbo limwe idjemo nde eshi yakwena ye okwe lixula okupopya ngaho.

Aaai, mukwahepo nye okwali ne hamu mono ngaipi kutya mboli omunhu ou paife ngaha okukwetiwe koshivatu, ilo oonakumonifa pamwe okwali ashike hava kala vanyengwa peemito dimwe okumonifa ounona, vo tave shi luku neE oshivatu ilo napamwe ovo ngo kwali hava dimiko?

YA TUYENI,  mumwange omadidiliko opo kwali haakala osheshi oonakumonifa ounona vonale nande kwali have shi ningile momaumbo, okwali ngo vena ounongo veu pewa kuKalunga kavo. Paife ne meekulu Mukwahepo, nye oshivatu osho okwali hamukala muna omiti ne dasho doku shi hakula una ngeenge naku ninga edimo umwe mwamona kutya mboli okuna oshivatu?
YA TUYENI, okwali shidjuu okumonika una ngeenge omufimba wonumba taende opo ka kwali naana hapa kala pena eyooloko nande, onghe oonakudala  okwali vehole okuya meengundafana novana vavo manga veli momateelelo noku va pula tava ti, mumwange ndishi konima eshi waninga oufimba wovanhu ino yapo vali nomulumenhu umwe, popya oshili, ashike nande ongaho oonakuninga omapunda kakwali naana hava popi oshili, ashike nande ongaho oonakudala okwali ngo vena eshi hava ningipo opo vaamene ovana vavo.

paife meekulu Mukwahepo, okaana aka kwali haka dalwa okwali haka shaalako ilo nako okwali haka shikula ina, nopoimbodi ne oyo kwali haipewa oonakuninga omapunda ava yokukeelela opo shika ende nawa una takamona okaana, owakonekapo ngo ne nande oimbodi imwe shili eshi hatupopi ngaha?

YA TUYENI, poimbodi onda koneke po imwe ngaashi ELAMBA LAMBODI, olo kwali hali tuwa koshini ndele tava nwefwa omeya, okwali hashi keele shili, ashike mefimbo lopaife ELAMBA LAMBODI, kandiwete vali li na eshi tali vatele osheshi monena  omuna oipangelo oyo twa etelwa kovatilyane, kepulo ne ngeenge okaana okwali haka shikula ina, efimbo limwe okwali haka kala nomwenyo efimbo limwe okwa li hakafi keloloko.

paife meekulu Mukwahepo, nonande mounyuni wopaife kamuna ne vali oshivatu, ashike natango otamu monika ngo oomeme vamwe hava ningi omapunda ashike oshayela kutya ovafa ngo hava kaa yadjapo ku vamwe ovo havo oovene vomapunda, osho tashi ulike nokuli kutya ngeno okwali omefimbo lonale ngeno ava oonakufya vatwaaleelwa koludalo, etumwalaka lashike to va lombwele?

YA TUYENI, mutekulu wange ndishi omukulu wonale okwa tile ina yokaana oye eshi he  ya ko, onghe ne nande ongaho oshiwana shetu shovakainhu nashikale ngo sha nongela oinima ei, to pewa edimo ku Lukas ndele ponhele yoku li mu lombwela, oto ka lombwela Seeboloni, ye ou ta ningi nee omafiku ta kakanya kedimo lafa laye, nande kashina nee mutu oupyakadi washa vali, otashi shundula tu omaludalo etu.

Paife meekulu Mukwahepo, ngeenge onda mono ngo Ndapandula tadi oko ta lombwelenge tati okuna edimo lange, ame ondali ngo ne okutya edimo kali fi lange ndele ye ota kondjifange ngo kutya oove ashike, ame pamwe naame onda popifilepo ngo efiku limwe, ye konima yefimbo ota ka dula nge eenghono ame ohandi itavele osho, kedimo oku, naikale tu hai ka ka kanyako ilo pamwe oshanyika oshiponga ame nde li itavela ne nale?

Mmm, kaanave ka TUYENI hamba oto pu lange noonanghali vokeulu nena, ndishi eshi waitavela oushishi ngo ne kutya oove toningi xe yookaana, kakale ngo ne to tula omufimba woye mekolo nonande unapo ngo omalimbililo kutya na pamwe haave wani, ashike natango omukulu wonale okwa tile vati, omavaya ihaa lundililwa omapunda. meekulu manga inoo dimako kongodi yoye nandi ku pule manga, efimbo lo paife eshi ngo pena ovakainhu vamwe tava lundilile ovanhu omapunda, natango osho ngo pena ovakainhu ovo tava yandjepo omapunda ovanhu, paife ngeenge onda mono kutya okwali handi kala na Salafina ndele nokonima Salafina eshi a ninga edimo onda uda kutya okwe lipapo Paulus, osho ta shu ulike kutya okwa yandjapo edimo lange, meekulu nandi ka pule ngo ilo ndiye nande okoveta haiti onda udifwa nai ondina edimo lange la yandjwapo?

Mmm akutu hewa YA TUYENI  ngeno wa hala ne okudala wani, she mounyuni wonale ovalumenhu ihava ka pula omapunda a yandjwapo, shotete ou e ku lombwela kutya epunda olo oloye olye? Na pamwe eshi kwali hokalapo oove kwali hopewa koxulo yonguto? Ngeenge owe ke lipula mutekulu wange oshili ito yolwa, ashike mounyuni ou weni muna omashina napamwe otokekakufifa nande eehonde.

paife meekulu mukwahepo, she ovalumenhu opo ne tu yande okulonda komapunda ehe shi etu otuna okushi mona ngaipi kutya Ndeshihafela ou ndeya naye monduda yange nena mboli okuna edimo nale, natu longife omukalo ulipipo mupu oshili meekulu wange?

iyaalo YA TUYENI, nde ku kwata ne oinima to popi opo oyoo naana tai ulike kutya nye ovalumenhu vopaife ohamu toola ashike keshe ou to shakene naye mopate kutya ne okuna eedula ngapi, shapo ote ke di popila nale pombete wamana, opo ne toka mona omunhu kutya okuna epunda ngaipi ove owa shakena ashike naye efiku olo, osho ashike muna oku kala tamu deulilwa ku vakweni nye tamu londo ngaho omolwa okutoola kweni oko.

Meekulu pexulilo apa, etumwalaka lashike una ko vaNamibia aveshe, unene tu ovanyasha nonande oshivatu osho twa tetekela noku popya mounyuni kashimo ne vali, ashike natango moshilongo omuna ngo ne omikifi odo daludalala tulipo ngo ne hatulipe noku tambekida twafa hatu ningi dile kende?

Mmm aaye YA TUYENI, ame ohandi indile ashike kOmwene, poovene kapuna oita ihai mono exulilo, moshilongo shetu omu, omwali oita ya Hiitila efimbo she twa li oukadona, ndele tamu ke ya oita yoVandowishi natango, osho ngo yaxulu mo otamu ke ya ne Ooshuumbi sha Haindongo osho, eembulu edi da kala dafa da ninga noihandi moNamibia oita osho  yaxulu, kedimbwe oita yeni ei yomoikumbafa molwaashi inamuhala okulombwelwa.

JOHN YA TUYENI
MRTUYENI76@GMAILA
CELL 0812988549

LEAVE A REPLY

Please enter your comment!
Please enter your name here