Uudhano woRingball moVenduka

0
239

WINDHOEK-Ehuliloshiwike ndika oondjila adhihe odhu uka  koshilandopangelo shaNamibia sho uudhano mboka inaa wu tseyika natango nawa koyendji yomoshitunda Namibia tawu kaya mondambo pokapale ka Khomasdal mOvenduka.

Uudhano mbuka inaa wu tseyika nawa natango moNamibia oha wu ithanwa Ringball, na oha wu dhanwa lela wafa konyala okatanga komokambamba, ashike mbuka owa yooloka kashona oshoka oNetball ohayi dhanwa kaadhani yaheyali kombinga omanga Ringball ha dhanwa kaantu 9 kombinga moka kehe aadhani yatatu ha ya kala ya ngambekelwa muukololo wawo ngaashi aadhani yokonima yatatu ina ya pitikwa ya zemo mokakololo kawo, omanga aadhani yopokati yatatu ina ya pitikwa okutaaguluka omusinda gwo senda oku ya kokakelenga kahugunina moka muna aatulimo yookoola.

Uudhano mbuka owa tegelelwa wu ka tameke ongula potundi ontimugoyi yongula sigo otundi ontine yokomatango.

Omupopiliuko guudhano mbuka Christ Mutota okwa ti pethimbo lyongashiingeyi iitopolwa ashike itatu ha yi dhana uudhano mbuka Khomas,Erongo noMaheke na oyo ta ya kaya mondambo ongula  poKhomasdal.

Okwa ti oshitopolwa sha Khomas oshina oosipana ne, mbali dhaamati nambali dhaakadhona,oshitopolwa shErongo osha tegelelwa shi ka etelele oosipana dhi li mbali, yimwe yaakadhona nayimwe yaamati, oshitopolwa shaMaheke nasho oshina oosipana dhafa dhErongo.

Uudhano mbuka uukulukulu na owa li wa dhanwa tango muSouth Africa mo 1907, ashike pokati mpoka owa li wa kanitha ongushu kashona, nongashiingeyi ohawu dhanwa miilongo ngaashi India, Mauritius, Lesotho, Sir-Lank, South Africa na Namibia. Oshowo miilongo ngaashi Australia, Netherlands, Pakistan, Ghana, na Botswana.

Mutota okwa ti uudhano mbuka owu li oshilyo sho Namibia Sport Commission olutu ha lu lele omaudhano moshilongo.

Okwa indile aanamutimahenda opo ye ya kwathele noshimaliwa oshoka ota ya nana nondatu okuthikitha uudhano mbuka koshigwana

 

LEAVE A REPLY

Please enter your comment!
Please enter your name here