Ashihaya a pewa oosamende a tunge uundjugo

0
248
Nico Kaiyamo ta gandja omagano goosamende 100 kosikola Ashihaya moshitopolwa shaShikoto. Oosamende ndhoka odha taambwa ku Ngoloneya gwa Shikoto Henock Kankoshi notadhi ka longithwa oku tholoma oondhopi ndhoka tadhi ka tunga manga uundjugo wuli uhamano penongelo mpoka, pwa li pwaana nando okandjugo kamwe.

 

ASHIHAYA – Osikola ya Ashihaya oya pewa omagano gooshako dhosamende opo yi tunge uundjugo woku ikwathelela uuna aalongi naalongwa ya pumbwa oku shi ninga.

Omagano goosamende oga gandjwa kaagandji konima sho mbaka ya tseyithilwa onkalo yaanasikola naalongi posikola ndjoka  mboka haya iwatelele miihwa uuna ompumbwe yoku iwatela ya holoka.Shika okwa kundanekelwe haye shi ningi oshoka posikola yawo kapwali uundjugo .

Ngoloneya gwoshitopolwa shaShikoto Henock Kankoshi okwali a talelepo nokupopitha aanona naalongi posikola oyo tuu ndjika mesiku lyomunona omuAfrika. Pethimbo lyetalelopo lye Kankoshi okwa li a tseyithilwa omashongo ngoka ga taalela osikola ndjoka , lyo limwe lyomugo oondyoka lyompumbwe yuundjugo.

Kankoshi moku mona noku uva onkalo ndjoka yoskola yaana uundjugo ye pamwe nombelewa ye oyali ya shangele oombaapila kaanangeshefa yomomudhingoloko opo ye ya kwathele oosamende, ya vule okutunga  uundjugo posikola ya Ashihaya.

Nonande oombaapila dhomahehelo dhali dha tumwa meni lyethimbo efupi aanangeshefa inaya ongaonga okuyamukula, no yali ya gandja omakwatho ngaashi tashi vulika. Ehangano lyoTulimevava Fishing mewiliko lya Nico Kaiyamo olyali lya gandja omagano goosamende 100, omanga Roadhouse a gandja oosamende 10 nOshikango Garage sha gandja natango oosamende 10 , shono she eta Ashihaya a kale a pewa oosamende 120.

Nico Kaiyamo pethimbo ta gandja oosamende ndhoka dhi ka kwathele mokutunga uundjugo okwa ti oyali ya yamukula mbala keindilo lyaNgoloneya, noya mono sho opala ya kwathele osikola ndjoka ngaashi shi li shimwe shomalalakano gawo okuyambidhidha aanona aaNamibia ya vule okunongekwa monkalo yi na uundjolowele.

“Otatu vulu okusindana mwaayihe ngele twi imanga kumwe, nongele tatu gandja omakwatho nomayambidhidho kwaamboka yega pumbwa. Ita shi kwatha sha wu kale wuna omaliko ogendji ngwee itoo gandja omakwatho kwaamba yega pumbwa moshigwana shetu omuna aantu oyendji ya pumbwa omakwatho naantu mboka oya pumbwa okukwathwa ya vule okuhuma komeho noonkalamwenyo dhawo,” Kaiyamo ta ti.

Okwa ti oyali ya yamukula mbala molwaashoka oya mono kutya onkalo ndjoka Ashihaya eli ondhigu. Okwa uvaneke kutya Tulimevava okwi ilongekidha okugandja omayambidhidho ngaashi tashi vulika, noku kwashilipaleka kutya okanona kehe oka mona uuwanawa welongo.

Omukuluntuskola ta kwathele puAshihaya Esther Ezimbi okwa pandula komayambidhidho ngoka ya pewa , tati oya kala monkala tayi nyengathana unene ngele ya pumbwa okuya mepya oshoka oya thiminikwa okulongitha iihwa pamwe naanaskola yawo.

Okwa tseyitha kutya pethimbo ndika otapu ka kala pwa tungwa uundjugo uhamano manga, po tapu talika ishewe kutya oshike tashi vulu okutungwapo noondhopi ndho tadhi hupupo.

Ezimbi ta ti oondhopi otadhi kala dha tholomwa mbala, kwaangoka  iinekelelwa oshilonga shokutholoma.Omutholomi nguka  omukwashigwana gwopomudhingoloko ngoka a pyokoka nawa, tati nonande yeli monkalo ondhigu oyi ilongekidha okugandja elongo komunona omuNamibia.

 

LEAVE A REPLY

Please enter your comment!
Please enter your name here