Katutura otayi uulikwa kiilongo yokondje

0
255
Konima yomalapi mofilima ‘Katutura’. Ofilima ndjika otayi ka ulikwa poshituthi shoofilima shedhina Ecrans Noir Festival mo Cameroon oshowo pwaashoka sho Africa Film Festival moTrinidad & Tobago omwedhi nguka.

Windhoek- Konima sho ofilima Katutura ya monikile kaantu omayovi mosaala yookino yaSter Kinekor moNamibia, ofilima ndjika ngashingeyi otayi ulikwa miilongo nopomahala pondje ya Namibia.

Ofilima Katutura otayi ka ulikwa poshiithanene shoofilima hashi ithanwa Trinidad & Tobago Film Festival moshilongo ntuntu shomefuta lya Caribbean. Ofilima ndjika otayi ka ulikwa poshituthi shoofilima shika okuza omasiku 25 sigo 31 gomwedhi nguka.Ndjika oyo yimwe yomoofilima dha ningwa noku dhanwa muAfrika tayi ka ulikwa poshiindingili shoofilima shoka.

Konyala aatali yoofilima omayovi gatatu oya talele ofilima ndjika pongulu yookino yaSter Kinekor moGrove Mall  pethimbo ndjika opo ya ulikilwe lwotango moshilandopangelo mu Novemba 2015. Yamwe oya li ishewe ya mono ofilima ndjika sho ya li ya ulikwa lumwe poUN Plaza, po Nice Restaurant, Warehouse Theatre nopo Chopsi’s

Ofilima oyo tuu ndjika oya li ya ulikwa uule wiiwike iyali sigo opethimbo lyoKrismesa nomoshiwike okuya mehuliloshiwike lyemanguluko  mOngwediva. Na oya li ya ulikwa esiku kehe  uule wiiwike iyali moShiwakopo.

Ofilima ndjika otayi hokolola nkene aaKatutura taya kondjo nokuhupa esiku kehe molukanda lwawo.Otayi ulike iiningwanima oyindji yelongitho lyiingangamithi, iilonga yomiyonena nelongitho lyoonkondo. Nonando opena okwaathike pamwe kwiiwetikile moshigwana,shomolukanda ndoka ,oshigwana oshina omukumo oshowo osha longo noondunge  oku ya komeho pomathimbo omadhigu. Ofilima oya thanekwa ya landula uukwatya waantu yontumba mboka ya piti momaupyakadhi gonkalamwenyo yomolukanda.

Kakele ko ku ulikwa megumbo ndjika oya ulikilwe wo poshituthi shoofilima dhoPan African Film Festival moLos Angeles moAmerica.

“Iituthi yomauliko goofilima otayi tsikile okupula ofilima ndjika na opwa li omaindilo okuza ko Los Angeles oshowo komauliko go AFI moWashington, onkene otatu tsikile oku taamba omahiyo, naashika otashi vulika shi fale maantu oyendji taya landa ofilima ndjika oshowo aandjaganeki yoofilima tashi vulika yu ulike ohokwe yawo,” osho Omuwiliki gwofilima ndjika Florian Schott a ulike.

Kombinga yoku yi landitha okupitila mwaashoka hashi ithanwa Box office, ndjika oyina nantango uupyakadhi oshoka yo kayi li natango pomuthika gwopaigwana okuyeleka noofilima dhopaigwana ndhoka omahangano hage dhi ningi ge shiwike nawa. Onkene ofilima ndjika oya pumbwa okulonga nuudhiginini opo yi tseyike muuyuni.

“Omahangano goku andjaganeka oofilima ga America nogomoAfrica ngoka ga mwene Katutura mo Los Angeles (moongulu dhokino oshowo mooTV nokointanenta ) otaga kundathana nomukalelipo gwokulanditha gwetu Rushlake Media opamwe nomunduluki gwayo opo mbaka ya lande ofilima opo ye ke yi ulike  miitopolwa yawo moka yo haya longele.

“Oongulu dhookino odha hala oku kwashilipalekwa kutya aatali otaya ka holoka opo yee ya tale ofilima ndjoka, na oye na oku yi kongela olweedhe ndoka olundji lwa kuthwapo nale koofilima dha ningwa mo Hollywood. Onkene oshidhigu koofilima dha longwa megumbo” Schott osho a ulike.

Ofilima ndjika otayi ka ulikwa poshituthi shoofilima sha Ecrans Noir Festival mo Cameroon ehulilo shiwike ndika.

“Oku ulika ofilima ndjika mondhila ya Emirates oyo yimwe yomoonkatu dhoku fala Katutura kaatali yomwaalu omunene okusoshimpwiyu kutya ndjika oya monika kaatali yoofilima muuyuni,”osho ati.

Schott okwa ti oonkundathana na Ster Kinekor kombinga yoku ulika  ofilima ndjika shu udha moNamibia otadhi tsikile  naandhoka wo tadhi ningwa naandjaganeki yoofilima yopaigwana.

“Kandi nontseyo kutya openi muuyuni omuntu ta vulu okumona Katutura  moongulu dhookino sigo oompaka,” osho a ti.

Schott okwa ti okuna etegameno kutya oongulu dho kuulika ookino moNamibia otadhi egulukile oku ulika oofilima dhomoNamibia ngaashi dha li dhe shi ulike naandjika yaKatutura.

 

 

LEAVE A REPLY

Please enter your comment!
Please enter your name here