Nashikaku oye omugandjimayele gwaKankoshi

0
298
Nation Nashikaku mombelewa ye konima yoku taamba oshinakugwanithwa shuugandjimayele kuNgoloneya, Henock Kankoshi gwaShikoto

 

OSHIVELO – Ngoloneya gwaShikoto okwa pewa omugandjimayele omupe omasiku ngaka.

Erwin Nation Nashikaku okwa ulikwa kOmuperesidente Hage Geingob opo a ninge omugandjimayele gwaNgoloneya Henock Kankoshi omwedhi nguka.

Euliko lya Nashikaku olya li lya pumbiwa konima sho ngoka ali nale omugandjimayele gwangoloneya yaShikoto, Omusita Aino Kapewangolo a ningi oshilyo shOmutumba gOpashigwana konima yomahogolololo gomumvo 2014. Kapewangolo okuli ngashingeyi oshilyo shoParliamende oshowo Omupeviminista  moshikondo shOkukuthapo luhepo.Okuza nkene Meme Kapewangolo a thigilepo oshilonga shika, Ngoloneya okwa kala keena omugandjimayele.

Okuya pehulilo lyaJuni nuumvo Omundohotola Geingob okwali ulike  Nashikaku oye a kale omugandjimayele gwaNgoloneya Henock Kankoshi.

Nashikaku ngoka  eli omunafaalama , oye wo mwene gwomukunda Oshivelo, konima yo ku ulikwa kOmukwaniilwa gwaNdonga Immanuel Kauluma Elifas opo a landule nakusa he mewiliko lyomukunda ngoka Oshivelo.

Nashikaku okwi inekelelwa oshilonga shika opo a kale ta gandja omayele nomathaneko kuNgoloneya Kankoshi miipambele yOshikoto. Okwa tamekele iilonga ye poombelewa dhelelo lyOshikoto petameko lyomwedhi nguka.

Elenga Nashikaku olya taambako oshilonga shika nombili lya ti, otaya lalakanene okukondjitha omashongo ngoka geli moshitopolwa. “ Otuna omashongo ogendji getu taalela moshitopolwa shetu, notatu longo ngaashi tatu vulu opo tuga kandulepo, otuna okulonga ngaashi tatu vulu tse tu yambulepo onkalamwenyo yoshigwana, tse tu kwathele moku andjaganeka ehumokomeho komahala nomahala,” Nashikaku a uvaneke.

Okwa ti okwa taambako oshilonga shika nomaako gaali , nokwa nyanyukwa unene sho Omupresidente e mu inekelele oshinakugwanithwa shika shoku ndungika Ngoloneya gwaShikoto. Okwa uvaneke taka gwanithapo iilonga ye ngaashi shu uthwa kekotampango.

“Otandi ka kala tandi gandja omayele kuNgoloneya nokukwashilipaleka kutya otwa landula omathaneko goHarambee  Prosperity Plan ngaashi eigidho lyOmupresidente, ota ka kundana ompumbwe yomeya moosikola odhindji moshitopolwa shetu, otatu kala twa tula uukuni kumwe tse tu kondjithe ayihe mbyoka,” Ta gwedhapo.

Nashikaku okwa ti omolwa iiponga mbyoka hayi holoka unene mondjila onene, ota indile aakwashigwana opo ya kale haya takamitha iimuna yawo nokuyi edhilila oshoka olundji iimuna mbyoka yomooha dhopate oyo hayi etitha iiponga ethimbo lyokwatoka, ko ku shunithwe pevi omwaalu gwiiponga ngoka tagu londo pombanda esiku kehe.

Okwa hala wo opo omahala mpoka hapu kwatele aakulupe openzela ga indjipalekwe opo aakulupe kaaya ende we oondjila oonde ngele taya ka konga oshikwiila shawo. Tati okwa hala woo opo ombelewa yookadhima mulilo yi kale ya dhikwa popepi nenge opOshivelo, opo uuna ndoka koombinga ndhoka kwa holoka oshiponga aantu otaya kwathelwa mbala, noku gamenwa.

 

LEAVE A REPLY

Please enter your comment!
Please enter your name here