Oshimaliwa sheefiye osha ninga omukalo weliyambapaleko

0
284

Oshimaliwa sha tulwa po kepangelo okupitila mOuministeli wOukashiike koOkanhu, osha tali ka ko kuvahapu onga omukalo wokuli monena oyuuyemo, ndele ha onga oshimaliwa shokukwafela eemhumbwe defiku nefiku dounona.

Omapopyo tae li nyenge penya naapenya otaa holola nghene ovadali vamwe novatonateli vamwe vounona tava longifa oshimaliwa eshi, okutota oungeshefa vanini, na vamwe nokuli otave shi longifa melongifo nai loikolwifa noingangamifi.

Molwa onghalo yokuhole oshimaliwa ope na yoo vamwe nokuli va ninga oludalo nekongololo lounona ongeshefa yavo. Tava mono ounona va hapu opo va kale tava mono oshimaliwa, omanga vamwe otava kongolola ko ounona kooina opo ova kale tava mono oshimaliwa sheefiye nounona ovo veli moluhepo, shaashi komuvalu wounona, oko ngaho komuvalu woshimaliwa.

Oshimaliwa eshi paife osha eta nokuli oikolokosha momaumbo. Ovanhu tava kondjele oimaliwa. Ovadali vamwe nokuli ohava katala ko oimaliwa kovafilishisho vounona ngeenge ekwato leya, oshinima osho sha puka neenghono. Ovakulupe paife otava dengwa, vamwe otava tukaelwa kovana medina loimaliwa ei.

Omunhu ngeenge nee ou shi kutya ouna ounona voye, mbela omolwashike iho ka tala ko ounona voye kovakulunhu voye ove uka kale navo oko uli, ove to kala nee to kwata oimaliwa yoye memanguluko?

Paife opena ovafilishisho vamwe vounona nokuli ina va hala vali oku tambula ko oshimaliwa shounona ovo tava file oshisho shaashi va tila oku tukwa kooxe nooina vounona ovo.

Ava nee hava tambula oshimaliwa, oto hange ashike tave li landele oikutu yavo vene, omanga ounona vehena oikulya ile oikutu nande oyofikola.

Natango nomounyuni wounona tava tambula oimaliwa tai di kepangelo, oto hange okaana taka i kofikola eemhadi kombada. Ile okaana taka i kofikola ina kalya nande okatete, omanga epangelo, shotete ohali yandje oufila woshikukuta, lo tali yandje oshimaliwa keefiye, ashike omunhu okwa nyengwa ashike okufila oshisho okaana.

Epangelo le li tula mo ngaho mefiloshisho lokaana okaNamibia ashike ovadali vamwe ponhele yokupandula epangelo nokulongifa osho tava pewa ngaashi sha nuninwa, otave li humbata ashike nai.

Omudali ngeenge kuna oilonga, ka konge oilonga, ile uke li longele ove mwene. Ashike ino longifa okaana ile ounona voye onga eedjo dokuku etela oiyemo. Oshimaliwa hashi pewa ounona kepangelo kashi fi ondjabi yoye yokomwedi.

Okaana koye ngeenge otaka tekulwa oshimaliwa shi efela omutekuli wako opo a dule oku ka landela omboloto yokofikola, neemhumbwe adishe.

Hano paife oshiwana osha pofipalekwa kohole yoshimaliwa, ndele novadali kavena vali nonghalonawa younona vavo. Otava dilaadila ashike kutya mbela eemhumbwe davo vene otave di kandula po ngaipi noshimaliwa osho tashi di kepangelo, omanga havo ve shi nuninwa.

Ile pamwe Ouministeli wOukashike kOokanhu owa pumbwa okulundulula omukalo wokuyandja omakwafo kounona ovo veli moluhepo, ngeenge ovanhu itava lundulula.

Ponhele yokuyandja oshimaliwa keemuma, pamwe ovatekuli vounona nava kale tava pewa oumbapila vouvoucha ovo tava kala tava yandjwa meefitola donhumba, va shangwa kutya oilongomwa ilipipo tai kala tai pewa ounona.

Komukalo uli ngaha oimaliwa younona itai longifwa okutota po oungeshefa ile okunwa omalodu.

Voo naava nee hava lotokele komaumbo pefimbo lekwato vaka nyeke ovatekuli vounona oshimaliwa, tava tale nee kutya otava ningi ngahelipi.

Edilaadilo eli shiimba halo naanaa tali kala omukalo wofaafaa, ashike opa pumbwa okuningwa sha sha kwata moiti opo ku kwashilipalekwe kutya oimaliwa younona oye va longela ngaashi naanaa sha dilaadilwa kepangelo.

 

 

LEAVE A REPLY

Please enter your comment!
Please enter your name here