Shipi FM mOndangwa

0
1058
Martin Shipanga a kutuumba komeho gospana yaaniilonga yomoShipi FM 103,6 ndjoka ngashingeyi hayi pendutha nokutokelitha aaNdangwa okuza oshiwike shika.

 

ONDANGWA –  Osasiona ompe yokutuma omawi mombepo yedhina Shipi FM oya patuluka mOndangwa oshiwike shika.

Ndika ehumokomeho ndyoka aaNdangwa ya nyanyukilwa unene.

Mwene nomutotipo gosasion yOradio ndjika, Martin Shipanga okwa ti okwa li a kwatwa kedhiladhilo opo a ete uuwanawa koshigwana, nokwa dhiladhila okudhikapo osasiona yOradio yoshigwana mondoolopa yaNdangwa opo yi kale tayi pulakenwa ku kehe gumwe.

Okwa ti aapulakeni otaya vulu okupulakena koopolohalama dhoradio ndjika pomakuthikuthi go FM 103.6 esiku kehe. Pethimbo ndika ndjika ohayi uvika mOndangwa nopoondoolopa dhopuushinda, ihe okwa uvaneke kutya ndjika otayi ka uvika wo mbala koombinga adhihe dhoshilongo. Ta ti otaya longo yaana ezimbuko opo ya kwashilipaleke kutya shika osha gwanithwa.

“Elalakano lyetu otwa hala okulonga, okunyanyudha nokutseyithila oshigwana. Omadhiladhilo getu oga kankamekelwa kontseyo kutya oradio ondjila ndjoka hayi gandja  uuyelele tawu uvika kaantu oyendji onkee otwa tokola opo ndjika yi kale yoshigwana, notwa hala tu ka longe pamwe naakwashigwana,” Shipanga a uvaneke.

Okwa ti Oradio yoshigwana ndjika otayi kala yi na oopolohalama dhomaludhi ogendji niiyetwapo yi ili noyi ili. Otayi ka gandja wo ompito kaakwashigwana ya gandje omaiuvo, omathaneko oshowo omadhiladhilo gawo kombinga yiipopiwa oyindji mbyono tayi kala tayi etwapo.

Shipanga okwa gwedha ko a ti oopolohalama ndhoka yena oye dhi nunina aagundjuka , aakuluntu nomupulakeni kehe ngoka ta vulu okupulakena nokuli mpoka puna omakuthikuthi gawo.

Osasiona ndjika otayi kala tayi uvika moShiingilisa oshowo mOshiwambo, nonande ongeyi omudhengi ngoka ta vulu okupopya elaka limwe lyaashi, ngaka gaali naye ota pulakenwa.

“Otwa tegelela aapulakeni pethimbo ndika ye tu dhengele noku tu lombwela kutya oyena omathaneko geni opo osasiona yetu yi koke mbala, yo yi kwathele muuwanawa woshigwana. Otwa thaneka wo tu kuthe ombinga momahumokomeho momikunda, tse tu tseyithile aakwashigwana shoka tashi inyenge momidhingoloko dhawo, yo ya kale yena uuyelele wuli mondjila ethimbo alihe,” Ta tsikileko ngaaka.

Ta ti Shipi FM oya totwapo no tayi wilikwa kaaNamibia yoyene. Pethimbo ndika oradio ndjika oyi na aaniilonga 12, nokwa tegelelwa yi ka patululwe pambelewa mbala. Okwa pula aakwashigwana ya kale taya gandja omathaneko gawo,yo ya kale aapulakeni yayo oshoka ndjika otayi etamo elunduluko enene moshigwana.

 

 

 

LEAVE A REPLY

Please enter your comment!
Please enter your name here