A thigwa pomutenya komulilo

0
455

 

ONYAANYA – Paulus Nashinge momukunda Ondaakula moshikandjohogololo Onyaanya okwa thigwa pomutenya komulilo ngoka gwa hanagula po egumbo lye komatango gOsoondaha ya ziko.

Nashinge okwa hokolola kutya osoondaha ndjoka okwali a meneka taka nwetha iimuna ye. Nomolwaasho oyali yena oshigongi shomeya ina vula we oku galukila kegumbo, okwa kala moshigongi. Sho yeli anuwa moshigongi oya kala ye wete olwithi talu gundumuka ihe inaya mona kutya otalu zi naanaa peni. Aakwashigongi yalwe anuwa oya kala ta yati ngiika opuna yamwe taya fike iiyagaya komagumbo gawo.

Komatango anuwa gOsoondaha ndjoka okwali a lombwelwa manga eli puundunda mpoka kutya egumbo lye olya pyapo thilu no inamu hupa nande osha. Sho eli okuthika anuwa pegumbo okwali a mono kutya shoka a lombwelwa oshili, naampoka pwali egumbo opwa yela owala tapu gundumuka olwithi.

“Megumbo muno omwa pila iinima oyindji. Uuthemba wandje nowuunona owa pyapo thilu molwaashoka egumbo alihe olya pyapo mwa kwatela niigandhi moka hatu pungula iilya yetu, onda thigwa pomutenya lela no kandishi kutya otandi hupu ngiini, oondunda adhihe odha pyamo, no kapuna ngoka eshi kutya osheetithi shomulilo nguka oshike, oshoka megumbo ohandi kalamo owala ongame awike,” Nashinge ta ti.

Nashinge ta ti okwa li a lopota ku mwene gwomukunda gwawo, nokwa pewa ombaapila ndjoka a fala kombelewa yoshikandjohogololo shawo, nokwa holola kutya ina monako omakwatho kombelewa yakansela, anuwa okwa lombwelwa kutya ka puna iikulya manga.

“Otandi indile koshigwana oshiholike shi ya yambidhidhe mompumbwe yandje ndjika oshoka ngaashingeyi ondili monkugo yina onkambe, ohandi lala pongalangala, ngame ka ndina sho tandi lilepo oshoka iikulya yandje oya pyapo thilu, onda kwathelwa okatenda kumushiinda shandje omo ndi kale tandi lala manga, ashike ka ndina omakumbatha, onda thigilwapo owala iikutu mbyoka ndali ndina kolutu esiku ndyoka,” Nashinge tati.

Okwa pandula Kalunga sho inaamu pila omuntu.

Kansela gwoshikandjohogololo Onyaanya Petrus Kambala okwali a holola kutya pombelewa yoshikandjohogololo pethimbo ndika ka puna iikulya no taya kambadhala ya tale kutya taya yamukula ngiini kompumbwe ndjoka yomukwashigwana gwawo.  Ta ti iiponga ohayi etitha omaluhepo, unene ngaa ngaashi mwa pila uuthemba, niinima ayihe mono mwa kwatelwa iipumbiwa yawo. Kambala ta uvaneke taya ka kwathela mbala moshinima shika.

 

 

 

LEAVE A REPLY

Please enter your comment!
Please enter your name here