Amugongo a tidhwa koYoung Chiefs

0
249

OSHAKATI-Osipana yo Young Chiefs mOshakati oya li ya halutha oyendji konima sho ya li ya laleke omudhani gwawo ngoka ali ha zala onomola 10 Edmund Amugongo kaapena omatompelo gayela.

Osipana yoYoung Chiefs ndjoka ya li ya zi koshakapalu okugwamo moliha onene yoshilongo oyi li anuwa yi ipyakidhila okulaleka aadhani na Edmund oye gwotango oku pewa ombaapila kutya ina halika we.

“Eeno onda lalekwa mo mosipana na oshi li sha ehameka omutima gwandje oshoka kandina sho ndeya ninga ,”Eddy ta ti.

Okwa ti kaya li yemu lombwele kokana ihe oye mu shangele ontumwafo ndjoka ya li ya holola kutya ina pumbiwa we koYoung Chiefs onkene nathige po osipana moompadhi oontalala.

Okwa ti omunashipundi gwoYoung Chiefs oku li iipyakidhila oku teya po osipana na ota ku fekelwa kutya yalwe yahamano yomaadhani yoYoung Chiefs oya tegelelwa wo ya kapewe oombapila ndhoka oku ya laleka mosipana ndjika.

Kepulo kutya etidho lye olya guma ngiini Young Chiefs Eddy okwa ti omukumo gwaadhani oyendji ogwa gwa pevi na yamwe yomaadhani oye  shi ulike kutya oya hala wo okuthiga po osipana.

Eddy okwa ti elelo lyoYoung Chiefs otali teyagulapo osipana ndjoka ya li ya longo nuudhiginini oku ya koliha yopombanda moshilongo okuza kevi lyiimpungu noya li shili ye ende ondjila ondhigu okuya koliha ndjika nongele itayi endelele ota shi vulika yi ka gwemo moliha ndjika ombaadhilila.

Okutidhwa kwa Edmund nooyakwawo ka kushi okupe koYoung Chiefs oshoka aamati ngaashi yooDamian Shuumbwa mboka ye li ya kwathela osipana ndjika pethimbo ya li tayi kondjo oku ya koPremier League oya tidhwamo nale molwa omatompelo gaafele.

Edmund omumati omunambili noku na ontseyo yi li pombanda no pethimbo twa li moonkundathana naye okwa li mela lyondjila a thinda koshilandopangelo hoka ta ka ninga omalolelo nosipana yoBlack Africa ndjoka yi li nale ta yi mu tala omeho oshoka onomola 10 oku shi okuyi longitha momutima gwokaple.

Oonkambadhala okumona elelo lyoYoung Chiefs odha li dha ponyo, ashike oyendji yomaayambidhidhi oyu uvite nayi omolwa iiningwanima mbika tayi ningwa mosipana yawo.

Onzo yili popepi na Young Chiefs ota yi ti osipana ndjika kayina omudheuli na anuwa oya nyengwa okulanda omudheuli ngoka ya li yahala gwoko KK FC, Father Elemu.

 

 

LEAVE A REPLY

Please enter your comment!
Please enter your name here