Etulo miilonga lyondungethaneko ontitano yopashigwana

0
209
Minista Gwopevi moshikondo ShOmathaneko geyokomeho  lyopashigwana Lucia Ipumbu pethimbo a tsakanene nAashikoto opo ya popye sho ye wete sha pumbwa okuhumithwa komeho moshitopolwa shawo.

 

OMUTHIYA – Epangelo olya adha omasindano okupitila mOmathaneko gopashigwana geyokomeho omimvo dhapiti okuza tuu kemanguluko.

Omasindano ngaka oga kolekwa noku endululwa kOmupevi Minista mOshikondo shOmathaneko gEhumokomeho gOpashigwana, Lucia Ipumbu pethimbo a talele po Omuthiya moshitopolwa shaShikoto omasiku gaziko.

Ipumbu okwa ti pethimbo ndika Omathaneko Omatine geyokomeho ogeli poku adha ethikilo lyago, nepangelo otali longo ashihe shoka li na okuninga opo iilalakanenwa mbyoka ya tothwamo mwaangaka yi ninge yoshili omanga ngaka inaaga pingenwapo kOmathaneko Omatitano gopashigwana.

Omupevi Minista okwa lombwele oshigwana shoka a li ta popitha kutya  “Omatalelepo getu miitopolwa otwa hala oku uva moshigwana nomadhiladhilo gasho ngoka shina kombinga yoondungethaneko ndhika, otwa hala opo oondjodhi- dhiladhilo ndhoka epangelo li na dhi ninge dhoshili,” Ipumbu ta ti.

Ipumbu okwa endulula kutya etotopo lyoondungethaneko ndhika otali wilike iilonga yepangelo, unene tuu miinima yehumokomeho  ndyoka tali inyenge pehala kehe oshilongo ashihe.

Okwa ti ishewe elalakano lyawo oku kundathana noshigwana opo ya pewe uuyelele kusho, kutya sho osha hala omathaneko geni ga tulwe miilonga opo pomahala gawo pu etwe ehumokomeho ndyoka lyaapo nena.

“Oku tala moomvula  ndhoka dha piti tuli mondungethaneko ontine (NDP4), otwa adha gamwe  gomomasindano, no tatu kambadhala tu adhe woo galwe manga ondungethaneko inaayi  thika pehulilo, tse tu kwashilipaleke kutya ashihe twali tatu lalakanene otwe shi  adha okupitila mondungethaneko ndjika,”  Ipumbu a ti.

Okwa gwedhapo a ti muule woomvula ndhoka eliko lyoshilongo olya lunduluka, nolya koko nawa, a ti epangelo olye shi pondola okutotapo oompito dhiilonga , mono yali taya lalakanene ya etepo oompito ndhoka dhili  90 600, ashike ndika oye li pitilile sho ya etapo oompito dhiilonga dhili lwopo 112 000.

“Omayalulo gopashigwana gomvo 2011 oga ulike kutya mOshikoto omuna aantu yeli 181 973, noopelesenda 42.6 dhaambaka ota ku tiwa odha hepa.Oshikwawo omayalulo oga ti oshikandjohogololo Okankolo osho unene sha tapatekwa koluhepo moshitopolwa ashihe. Noompangela dhetu odhili miilonga opo tu kondjithe onkalo yoluhepo ngaashi osho tatu lalakanene moondungethaneko ndhika,” Ipumbu ta tsikileko.

Ipumbu okwa indile aakwashigwana ya kwathele moondungethaneko ndhika, a ti NDP4 sho ta hulile muMaalitsa 2017 ye NDP5 otayi miilonga muApiilili 2017. A ti omushangwa otagu ka kala gwa tulwa pambapila, go tagu nongononwa kaanongononi manga inaagu pita.

Oshigongi shopOmuthiya oshali sha kalwa kookansela , aaleli ya yooloka, aakalelipo yomahangano , aanangeshefa oshowo aakalelipo yaagundjuka mOshikoto.Ayehe oya kundathana nkene taya humitha Oshikoto noshilongo komeho.

 

 

LEAVE A REPLY

Please enter your comment!
Please enter your name here