Kansela Nambondi a tsakanene nooyene yomikunda

0
220
Kansela gwoshikandjohogololo Okankolo, Hans Nambondi ngoka a gongalele nooyene yomikunda dhomoshikandjohogololo she opo ya kundathane iipambele yaawilikwa yawo.

 

ONYUULAE – Kansela gwoshikandjohogololo Okankolo, Hansa Nambondi a kundathana egandjo lyomayakulo kaakalimo yomoshikandjohogololo she osho wo omashongo ngoka ga taalela aawilikwa ye.

Nambondi shika okwe shi ningi pamwe nooyene yomikunda dhomoshikandjohogololo she poshigongi sha li mongelka yegongalo Onyuulaye Etitatu oshiwike shayi.

Konyala ooyene yomikunda moshikandjohogololo ashihe oyali ya holoka, yo ya kundathane iikundathanwa mbyoka yali ya longekidhilwa esiku ndyoka. Moshikandjohogololo Okankolo omuna omikunda dhi thike po196, nodhindji odhali dha kalelwapo esiku ndyoka.

“Otwali twa longekidha oshigongi shika owina, mono twa li wo pamwe naanambelewa yaza kombelewa ndjoka hayi gandja uuthemba nomikanda dhoshilongo. Shino onde shi ningi oshoka nkene nda yile koshipunda inandi vula okumanako omikunda adhihe moshikandjohogololo, no nande nda kambadhala okutalelapo dhimwe inandi dhimanako, nondali ndi wete sha simana opo ndi tsakanene nooyene yomikunda ayehe ngame ndi ya pe etumwalaka lyawo ndyoka ndeya nunina,” Nambondi ta ti.

Nambondi ta yelitha kutya elalakano lye okwali a hala a uve omashongo ngoka ooyene yomikunda yena momikunda dhawo, ye a tale ngele otaya gandja ngaa omayakulo ngoka aakwashigwana ya pumbwa.

Okwali a kumike ooyene yomikunda ya kale taya gandja omakwatho ngoka aakwashigwana ya pumbwa, nongele omuna omukwashigwana apilwa egumbo lye, mwene gomukunda ogo tuu ngoka na kale a gandja ombaapila ndjoka ya pumbiwa yi falwe kombelewa ya kansela, ye omuntu oye tuu ngoka a kale a monikila omakwatho mbala.

“Omolwa aakalimo yomoshikandjohogololo yamwe yaana uuthemba woshilongo ondali nda kwatathana nombelewa yuuthemba, opo nayo ya gandje uuyelele kooyene yomikunda, okwa konekiwa ooyene yomikunda taya nyengwa okugandja oombaapila dhomapopilo opo aantu mboka yaana uuthemba ya kale ya mona uuthemba. Otwa hala  opo mwene gomukunda kehe a kale a tseya aakwashigwana ye, nongele oya pumbwa omapopilo ota vulu okugandja ombapila ndjoka yepopilo inaa ongaonga,” ta gwedhako ngaaka.

Kansela Nambondi okwa ti oshigongi osha endele nawa lela oshoka ekuthombinga lyooyene yomikunda olyali olindji, yamwe yomooyene yomikunda oyali ya popi gamwe gomomashongo ngoka yena. Kansela teya yelithile kutya oyi ipyakidhila nokukondjitha omashongo ngoka, yo ya kwashilipaleke kutya oya sindana.

 

LEAVE A REPLY

Please enter your comment!
Please enter your name here