MoRosh Pinah otamu tungwa oshipangelo shepangelo

0
302
Mefano omuna osheendo shovanambelewa okudilila kOuministeli wOuhaku nonghalo nawa oshoyo Kansela woshikandjohoololwa sha Oranjemund na Rosh Pinah vafikama ponhele opo pafanekwa tapa ka tungwa oshipangelo shepangelo modula 2018.

Rosh Pinah –  Modoolopa yaRosh Pinah moshitopolwa sha//Karas omwafanekwa tamu ka tungwa oshipangelo shepangelo meni lefimbo lixupi.

Eshi osha tumbulwa kuKansela woshikandjohoololwa sha Oranjemund naRosh Pinah Rasalus Nangolo, a ti oku niwe omafaneko opo mo Rosh Pinah muka tungwe oshipangelo she pangelo modula yo2018.

Mo Rosh Pinah omuna ashike okapangelona nongeenge omunaudu okwa pumbwa okumona ndokotola, oha tumwa koshipangelo shepangelo koLüderitz.

Oondokotola ovo hava longo moshipangelo shepangelo mo Lüderitz ohava talelepo yoo okapangelona aka ka Rosh Pinah oshoyo okapangelona ka Oranjemund omwedi keshe.

Ovanambelewa voundjolowele moshikandjo, oshivike shaya ovali vakufa olweendo opo va ka tale ponhele opo pafanekwa tapa tungwa oshipangelo shepangelo, mo Rosh Pinah, modula 2018.

Kansela Nangolo okwa pandula unene Ouministeli wOuhaku nOnghalo nawa eshi wa faneka opo uka tunge oshipangelo shepangelo mo Rosh Pinah. Ta ti eshi osho shi li omalalakano epangelo, oku twala omayakulo popepi noshiwana.

Oshipangelo shepangelo ngee sha tungwa mo Rosh Pinah, nena ota shika kala ekwafo linene, opo ovanaudu va ha ende vali oshinhano tashi li shilile peekilometa 300, okuya opo vaka mone ndokotola koshipangelo shepangelo ko Lüderitz.

 

.

LEAVE A REPLY

Please enter your comment!
Please enter your name here