Nakuteta ounona nomakatana a holoka momhangu

0
615
Omutamanekwa Konayena Kambonde

Ongwediva

Omukainhu ta tamanekeelwa eehameko nenyenyepeko kolutu eshi a tetaula ounona vavamwaina nomakatana osho a holoka momhangu.

Omunamido 35 Konayena Kambonde okwa li a kwatwa po oivike ivali ya pita po eshi vati a tetaula ounona, kamwe kena eedula 11 nakakwao kena eedula hetatu nomakatana, noku umba kamwe neonga.

Okaana kokamati keedula 11 okali ka tetaulwa momutwe, keenyala, kokwooko, nokokuulu. Okena yoo oipute inini molutu alishe. Ka kwao kokakadona keedula hetatu koo vati oka xupa meenyala dainagona oye tuu ou eshi ka hepa eonga olo eka kupula. Ashike nako okwe ka teta, nonande ine ka ehamekwa neenghono.

Eshi a holoka momhangululilo, Konayena vati omhangulilo oye mu efa shaashi vati okuna okaana kokahanana taka nyamu. Okwa lomwelwa ashike opo a kale teke li lopota komhangulilo yaMangestalata kOndangwa, manga fiyo omefiku omo mwa undulilwa oshibofa shaye, opo a ka pangulwe.

Otaku hokololwa omukainhu ou a ninga oshinima eshi shi kumwaifa, eshi ningila momukunda Onyeka mOkatope.

Analisa Kambonde, ina yokaana aka kokamati okwa hokolola kutya ye okaana kaye okwe ka kufa mo metonatelo laKonayena, nopaife okuli nako Walvisbay oko keli taka tipo xwepo.

Analisa ta ti, okaana kaye opamwe nakakwao kokamwainagona, ovali va dengwa nokutetwa nekatana shaashi vati va nwa mo omuti wokaana ka Konayena.

Otaku hokololwa Konayena a li a ya koundingosho vopomukunda wavo oko a tokelwa fiyo opo 23h00, hano pomulongonaimwe woufiku.

Eshi e uya meumbo oufiku vati okwa tameka ta denge ounona, ta ti ova nwa po omuti wokaana kaye.

Okaana aka kokakadona oke shi pondola okufaduka po, ashike vati okwe ka umba neonga, omanga kali taka faduka po.

Okamati okwe ka fitikinina mondunda yoshipeleki omo eka tetela nekatana. Onga onghendabala yokuxupifa omwenyo wako, okaana aka oka ya koshi yombete, ashike Konayena okwe shi pondola oku ka tetela ko kokuulu.

“Elao linene monduda oyo yoshipeleki ina mu kolongwa, okaana oka dula oku fa koshi yoshipeleki, omanga keli koshi yombete ndele taka faduka po,” Analisa osho a hokolelele Kundana.

Analisa okwa hokolola kutya halo lwotete mumwaina ou ta hepeke ounona ngaha. Opena vali efimbo limwe kwali eva dengaula shaashi vati va teleka ouvalelo wetete. Omanga okaana kali okahanona lela, Konayena vati okwe ka vakulile okaana oko kokamati opo kali ka nangala, moshipeleki, ndele teka umbile pondje, afa ngeno ta ekele shi etanga.

Konayena oye ashike a li mo nounona meumbo eshi a hepeka ngaho, ounona vavamwaina –Analisa oha kala koWalvisbay, omanga inakulu younona (ina yooAnalisa naKonayena) ali moshipangelo kOtjiwarongo.

 

 

LEAVE A REPLY

Please enter your comment!
Please enter your name here