TUYENI KOLUPALE LATUYENI: Onda lilwa

0
380

Ovalumenhu ova Namibia, m’tima utye omuyelike apa wati pamwe ovafingwa ilo napamwe ounyuni ngoo wafika kexulilo, shaashi otonyengwa nee okwa tya ngoo kouninginino ku linyenge ovalumenhu ngo, koushilo ku tope oshitopifa ovalumenhu ngo tamu popiwa, mbela ihamu tumbu noinyenhu keemwenyo ngeenge tamu popiwa, utya vamwe ohamu ti otamu djalekwa omapapa ngaho.

Alikasha alikatoka ame ondina okumu lombwela, nafiyo osheshi handi hange exulilo lokupopya, ndele eshi itashi ka ninga exulilo lounyuni, molwaashi ngeenge taku popiwa exulilo lounyuni omwenyo woye efiku tau fiyepo olutu kombada yedu oku.
Ehokololo la tatekulu Sakeus ya Shangheta, aaayeee, oshili ame eli ondeli itulila penya, ovashamane ngeenge osho ngo tavai ngaha, teeleleni Namibia lika kale li yadi oitiwa walya sho va shamane utale.

Pwilikineni manga nye tamu lesha nawa, inamu tameka nande tamu yolo manga inaa mu mana okulesha, ovakulunhu navo ihava yolwa ngoo veuditeko.

YA TUYENI, onda hala u pukulule nge apa ndapuka wani, edina lange oSakeus ya Shangheta nda dalwa mo 1955  pOhaingu yaKamhulu mOukwanyama. Onda hombolele omukulukadi wa nge Mukwaudimbe wa Shangheta ilo Meme Eva.

Naimboli, mounyuni omu omuna ounona voufuko vapwiilila, vo velilonga ne nokulila ovanhu, okafuko oshili takali oimaliwa yange ndele okafa takali eenyadi, oshili onda udifwa nai kaume molwaashi kapenasha vali oimaliwa yange aishe ei ndadja nayo komaonda.
Onda longela mOshiwalongo, ndele odula yadjako pu Januali ondawanifa eedula 60, po opo nda shakena nokafuko kedina Isabele ya Lubeni, woKeyangwa la Shikongo mo Angola.  Isabele ou okwa lila nge molwaashi hasho kwali nda teelela, ndi ningwe ngaha.

Omolwa ovashamane tu hole okukoyakoya noufuko vasona, onghalamwenyo ya nge oya ka fininika nge ndiholepo Isabele ya Lubeni,oo meedula kwali ta monika efike pu Helvi wonghelo yange. Ame kakwali naana ndatala keedula, molwaashi monghalamwenyo yange ame inandi mona omufuko muwa afa Isabele oo nda shakena naye omwedi oo nda pendjelwa.

Tate YA TUYENI, eshi handipopi apa, onda hala shi udikeko kovashamane aveshe moshilongo napamwe navo otave ke li haluka veli monghalo yafa ei nda tulwa ku Isabele. Pu Januali opo, ngoo nda tameka okunangala nokafuko aka kwali taka monika kena omikalo nongeenge taka ufa na nge ohaka ti, tatekulu Shangheta hole yange!

Pwilikina utale eshi nda ningwa ku Isabele wOkeyangwa la Shikongo, kopendjela yange ondapewelweko omayovi omafele avali. Isabele pu Febuali ota lombwele nge, vati okwa lombwelwa kondokotola  kutya okuna edimo, ndele vati  olilimo  la kambakana lo noxo olaya mombuda. Ndokotola vati okwa ti oshaetifwa molwaashi kaimba olomulumenhu a wanifa eedula 60, molwohonde yae ya kulupa.

Oshinima eshi oshatilifange unene molwaashi okwali handi lipula, pamwe Isabele wovanhu ota twaalelwa nande okedimo eli.Ye okwa lombwelange ta ti, vati dokotola ota ti, otashi pula oshimaliwa shifike po mayovi efele nomilongo nano, opo edimo lidjemo mombuda lo li ukilile nawa ngaashi omapunda haakala.

Oshitivali dokotola vati okwa shangela Isabele kutya, nalye oinima ya kangwa. Ombelela yoshikombo ya kangwa, omai a kangwa, ombelela yoxuxwa yakangwa, no juisa inya  yoMonis yo 100%,ei oyo oinima vati ya pewa Isabele wange kuNdokotola a kale tali noshimaliwa ne eshi shatulwapo shokuukilifa edimo lo lidjemo mombuda ye ta kala ne vati alushe haka fulwa keumbo la dokotola konguloshi keshe fiku.

YA TUYENI, oshili ame mwene inandi kwata kwata molwaashi omwenyo wange inau kala vali uli ponhele, shaashi kasha lidule oha nangala ashike ta keme natango, onde ke li pula nee kutya naikufe oshimaliwa eshi tashi pulwa opo kafuko a mone ngo epango li li mondjila.

Kakadona ou oshiponga wani, oimaliwa ondeitula ne kokambo kaye omayovi efele nomilongo nano, ame noxo paife ondinapo vali omafele 700, keshe fiku oo handi ka konga nayo oikulya oyo yakangwa modoolopa,eemwedi onda ka mona ne tadii, lo edimo la  Isabele itali uya kondjila.

Odula yadjako Isabele onde mu ningila edalo pu Maalitya, andi longifa oshimaliwa 7000, eshi twekeya pu Anguste ye ota lombwelenge vali kutya ota dalwa metitano. Ngheengo wa dalelwe u mone omunhu ta ningi edalo laye modula luvali.

YA TUYENI, oimaliwa paife otainingi ne ipwepo, nomukulukadi wange ou nda hombola eli kOwambo meme Eva ya Shangheta, ngheengo nde va tuminine ooN$150-00, ve livatele nayo manga haitale kutya oufimba wa Isabele otawii naana fiyo openi, eshi ne handi m’tale  ondiwete ne oondoka shidulife nale ye okwa tilyana, onde li pula nee kutya napamwe okaana kovanhu okafula nande okouvela.

Oinima aishe ei mboli handi ningwa ku Isabele kaina oukwashili, okafuko kange kawa ndele ngeenge taka popi, ondaka yako eshi taidi mokanya otai linyenge yafa oshiketala, omesho ako ngeenge take ku tale ohaati keni keni shafa oshinima sha tulwa odjove inaipya, ndele mboli okamona ka Lubeni okangangala.

Eshi nda ka vakelwako, handi lombwelwa  kutya ondili moshiponga mokaana omo ndili, eshi ndaka tala kombaanga yange neudo ngaha ,okuna ashike 350,noufimba ngo inaudalwa fiyo opapa. Oshili oshinona oshalyapo oimaliwa yange ngeno nda tuminine nande omukulukadi wange kOwambo meme wa Shangheta.

Isabele ou mboli kena edimo eli tapopi shili, eshi ha ti ohakafulwa keumbo la dokotola alushe komatango, mboli oha kalya okahauxungili kuxe yokaana ouvakala naye nale, ovanhu otava lombwelenge kutya oimaliwa ei nde mupa vati oyepango ledimo, mboli okwa kalanda vati outuwa vae voutaxi veli vatatu, noikulya ei ta lombwelenge a shangelwa ku dokotola oyo a kale tali ya kangwa, mboli okwa hala ashike okwoodokela pwaame. Oshili Isabele okwa lilange nai ngeno okwali ngo handi shuna moilonga, ame ngeno nghina vali fiku naika nangale nokanona kefike ponghelo yange.

ENYAMUKULO LA TATEKULU SHANGHETA, OHOLE YA ISABELE.
Mmm, omwati ngo ne ovakulunhu ihava yolwa, aayeee ondali ngo ne okufitikinina oindjola ndele oshili kashi lidule nande shixwepo ashike ndiyole opo omwenyo wange ufululuke koindjola.

Sakeus ya Shangheta, ngheengo weya mounyuni nale nale ndele oshili oto lombwele  ovanhu kutya inomona omufuko muwa monghalamwenyo yoye afa Isabele ou wa shakeneka omwedi wa mona opendjela, ove osha hala okutya, oulumenhu woye owe ke ku shitukila ouvaya medina la Isabele.

Ngeno okwali ngo ndina ongodi ya Isabele, oshili ngeno ohandi mu dengele opo ekweendulule vali molwaashi otashi ulike kutya ino lilwa nawa, ndele naave inotila nokuli oto shi popi nawa kutya Isabele okufike meedula pu Helvi wonghelo yoye. Owa pumbwa okulilwa nawa opo uyandje oshiholelwa kovashamane vakweni aveshe moshilongo.Ndele inotila nokuli, to tumine omukulukadi woye ou wa hombola eli kOwambo ooN$150 omanga oimaliwa toilile koshi yoikumbafa uli mekolo lokaana kefike ponghelo yoye, paife oto ti okafuko ohakalile ovanhu ou eku tumako olye, ohole ei wa yandja ku Isabele ove to dengwa mombwa, ngheengo wa dalelwe uuipe nomukulukadi woye, oshili Isabele kena nande opapa apuka osheshi okwelitwapo ashike ondobe ya ye ndele  ta pindi omeya a twale keumbo lavo.

Tatekulu Shangheta ove ombudi naana idule eembudi adishe dovashamane, oto ningile Isabele edalo modula luvali ove wanyengwa okuli ningila edalo loye kwoove mwene eshi wa wanifa eedula 60,naashi ne to ti paife otoi komukukulukadi woye kOwambo oto ka talako shike? Opo nee wa dimbuluka kutya ouna omukulukadi kOwambo eshi wa dedaulwa ku Isabele?Meme Eva,  owa pelwe omaano omushamane woye, ashike ou evaya eli lashiya komavaya aeshe, molwaashi okwa hanga ashike oinyafa tailandwa mOshiwalongo ye okwa tameka tafutu afa ta lande eengombe ndiye kohambo.

JOHN YA TUYENI
MRTUYENI76@GMAILA
CELL 0812988549

LEAVE A REPLY

Please enter your comment!
Please enter your name here