Eenhana odoolopa iwa nomatalele po monakwiiwa

0
295
Endimbuluko nhele pEenhana olo onhele imwe tai ka shila ovatalelipo koshilandopangelo shOhangwena monakuiwa.

Eenhana – Eenhana, oshilandopangelo shoshitukulwa shaHangwena monakwiiwa otai ka ninga onhele iwa nomatalelepo. Edi, oda kolekwa kOmunambelewa omukulunhu modoolopa yaEenhana ,Walde Ndevashiya meenghundafana noshifo eshi.

Omunambelewa omukwateli komesho wodoolopa ota ti, manga inaku fikwa komudo woimaliwa 2018/2019, elelo lodoolopa ola faneka okufufila oifilambo aishe iyadi modoolopa ya felwe po kovakwaita vepangelo loukoloni la South Africa ovo va li nokamba yakula mEenhana.

Kakele ketale lakula li li ponhofi yodoolopa la fufala po, elelo otali kwatakanifa oilambo ei pamukalo woshinanena nokwoongela omeva meendama peenhele domalihafifo da fanekwa  okutungwa modoolopa. Omalambo otaa ningwa nawa tamu tulwa ominino dokuwatakanifa omeva a ninge eendama dokuyowela pomatungo eenhele domalihafifo da fanekwa tadi tungwa modoolopa.

Ndevashiya ota ti, elelo ola faneka modoolopa mu tungwe eenhele domalihafifo dovakulunhu nounona. Paife modoolopa omu na ashike onhele imwe yomatalelepo mwa pakwa oonakufila moita yekondjelomanguluko Eenhana Shrine, nelelo ola faneka popepi nedimbuluko nhele apa pa tungwe onhele tamu ongelwa oilongomwa yopamufyuululwakalo tai longwa kovanhu vomomudingonoko i shiivike kovatalelipo. Oshiwana  osha pulwa shi li longikidile okulonga oilongomwa neenyala ya fanekwa i tungilwe onhele poupepi naapo pa pakwa oipongo yoonakufila moita vehe shiivike.

Omunambelewa omukulunhu modoolopa Eenhana ta shiivifile ovakalimo ve lilongikidile omaxumokomesho, nokufya oshisho opo ovo ve na omaumbo pomukunghulo wondjila ve a tule  pomufika muwa nokuyakula ovaenda eshi oshitukulwa tashi ulike ehapupalo lovatalelipo. Omhumbwe yeenhele dokukala oya holoka po pefimbo lomauliko oipindi mEenhana  oneudo, oo a liko ohani ya djako.

Odoolopa ya totelwe nomaumbo manini, paife omuna omaumbo a koya 3000. Pamafaneko elelo lodoolopa otali longikida edu pa tungwe omaumbo 10 500. Opo exumokomesho leendelele modoolopa yaEenhana mwa enda ondjila yoTrans-Zambezi ya pita moshitukulwa shaKavango outokelo, Kavango oushilo, Zambezi nokuya poushiinda Botswana osho yo Zambia, ondjila ei oya nana ovatalelipo vahapu sha etifa omhumbwe yeenhele dokunangala nokuyakulila ovaenda.

 

 

LEAVE A REPLY

Please enter your comment!
Please enter your name here