Ovanafaalama va yandja ombedi kelelo la Aus

0
179

Aus – Ovanafaalama mo Aus  moshitopolwa sha //Karas ota va yandje ombedi kelelo lomukunda o Aus, eshi lapa omunafaalama wopaipindi onhele a life oimuna yae mofaalama yepangelo.

Omunafaalama Willem Swiegers oo vewete kutya okuna eefaalama dae dopaumwene, noku li omunafaalama wopaipindi, elelo lomukunda o Aus ole mu pitikia atule eengobe dae dimwe mofaalama yepangelo yedina Ganus ili mo Aus

Swiegers otaku hokololwa a tembulila eengobe dae di dulife po 200 mofaalama oyo konima yeehanhi nhatu daka pita..

Omunashipundi wovanafaalama mo Aus Petrus Shiimbashike okwa lombwele Kundana kutya, ovanafaalama ka ve wete shili mondjila opo omunafaalama wopaipindi, oo ena nokuli eefalama dopaumwene a  tule eengobe daye odo dakonda pomafele avali, mofaalama yepangelo.

Ovanafaalama ota va popi kutya, oshilongo oshina oshikukuta, onghene paife omunafaalama ou okweya okulifamo omwiidi ou uli mofaalama yepangelo, yee okuna nale eefalama daye dopaumwene, ndele paife okwa pewa oufemba aka life oimuna yaye monhele yepangelo.

Ovanafaalama otava tumbula kutya ove udite unene oudjuu moshinima eshi, “Oshinima eshi otashi tu ye hameke neenghono, shaashi ava tuli mofaalama yepangelo,okwali twa tungila ondinga kofaalama oyo oko tu twale oimuna yetu pefimbo eli omwiidi tau nyangwaanyangwa, ndele paife ovanambelewa ovatulamo omunafaalama oo eena eefalama daye dopaumwe, kashili mondjila.” Shiimbashike osho a tumbula.

Ovanafaalama ota va tumbula kutya ngee tava pula kombelewa yelelo lomo Aus kutya omunafaalama oo monhele okweya mo ngahelipi, otava ti ihava mono enyamukulo lofaafa, omunambelewa alushe ohati ashike okwe li py akidila.

Omunambelewa omukulunhu melelo la Aus Elizabeth Koopman, eshi a pulwa kuKundana, kutya omunafaalama okwa enda ngahelipi opo a mone oulifilo mofaalama yedina Ganus, Koopman okwa tumbula kutya Swiegers okwa ningile  nale endilo modula.Opo a life mofaalama oyo ndele ina mona enyamukulo.

Odula yoneudo taningi natango eindilo opo a tule oimuna yaye mofaalama tuu oyo, neindilo laye ola nyamukulwa kombelewa yomunambelewa omukulunhu melelo la//Karas.

Koopman ta tumbula kutya, ofaalama Ganus kaina omeva, yoo vali oyaama kombinga oko kuna onhele oyo hai ekelwa oimbodi. Oimbodi oyo taipepwa komhepo ohaiyi noupu mofaalamo omo, notaidulu oku etela oinamwenyo oupyakadi oyo ili mofaalama, omo.

Mofaalama omo omwakala ashike muna eenghambe, odo nado da kala moupyakadi woimbodi oyo haidi ponhele opo hapu ekelwa oimbodi.

Koopman okwa fatulula kutya Swiegers okwa udaneka taka  longondifa oshimaliwa shaye opo adule okukaleka omeva mofaalama oyo, yee okwa udaneka yoo oku tula odalate oyo tai dulu okukeelela oimbodi kombinga oko hakutilwa oimbodi, opo ihadule vali okupepelwa mofaalama oyo tuu oyo.

 

 

 

LEAVE A REPLY

Please enter your comment!
Please enter your name here