TUYENI KOLUPALE LA TUYENI: Ota mu tu yolo nomushamane wange, ashike epuko ola meme

0
375

Omwati ngoo, ondi na oku mu nyanganyangela noonanghali vokeulu neudo. Apa ngoo ta mu mono kutya Namibia ola tamekela peni naapa la ka xulila. Ounyuni owadja nale mboli, ei yaliko fimbo lonale oya tanauninwa mefimbo lopaife.

Ndishi ohaku tiwa ovamati vonale ngeenge vakawila koukadona okwali hava ka wila pokwooko fiyo otaku shi. Halala, haaveshe kwali have shi ningi. Mboli va ti opena noukadona vonale kwa li hava tulikwa kooinakulu ilo kooina opo va ha ninge omapunda ngeenge tavai momilele. Ngaashi ngoo hamu uhala ta mu ngongola mefimbo lopaife tamu ka vendifa ounona veni voukadona opo vaha ninge omapunda.

Ngeenge ohaku tiwa vati oukadona vonale ka kwali hava yi momilele manga inava fukala, mbela hano ovanhu okwa li ne hava ka tulikilwa shike vali mouyongoti mboli?

Opo tu ude shihapu koukadona eshi kwali hava tulikwa mouyongoti nale, kutya okwa li hashi ningwa koolye, onda kundafana pangodi nomushangi womambo tate Filipus Tuhafeni ya Nghidengwa, a putukila pEembidi nda Kapula mOukwanyama. Ye iha tulike  oukadona nande nande.

YA TUYENI: Tate Nghidengwa ame onda lulilwa kaume, molwaashi paife eshi handi popi ngaha ondina ounona veli vahetatu, novakainhu  vatatu ovena omateelelo, ashike ame ondi udite inandi hala vali okudala. Ohandi lipula nokuli haiti pamwe, ngeenge otashi shiva, ndi tulikwe nande omokayongoti aka haka tongwa hamu tulikwa oukadona opo va ha mone ounonona manga.

TATE NGHIDENGWA: Kaume ove oshili efimbo limwe oho yolifa nge, noikando imwe nokuli ohandi kala nde kweetela onghenda. Oshalongo nokuli uhole okupula ngeno oho ke li haluka to ningi oinima yii pokati kovanhu. Eshi wa hala oku tulikwa mokayongoti, ou eku lombwela kutya ovalumenhu ohava tulikwa olye?

YA TUYENI: Oo tate Ya Nhidengwa, hano mboli ovanhu ava hava tulikwa ovava vaninga ngaipi? Naashi ne kwali hava tulikwa, ookadenga kwali vena eshiivo moku tulika ovanhu monale oolye, nokwali have shi ningile shike?

TATE NGHIDENGWA: Ya Tuyeni, mumati wange, ndishi natango opo ngo toya mounyuni ino kula. Oonakudala ilo oonaku tekula oomeekulu okwali hava tulike ounona vavo mouyongoti opo vaha fimbapale vo va ulwe omahengu molwaashi ka kwali naana nakudala ha kala eudite nawa ngeenge ena okaana kaye konhumba keli meumbo ndele otaka ulwa ehengu molwaashi kamita inaaka fukala.

YA TUYENI: Uuhu! Tate popya utale nawa fye  otwa hala okuuda nghe mokayongoti kwa li hamu fininikwa oukadona, hamba kounyuni okwakala oipwe noidila, indamo vali utale?

TATE NGHIDENGWA: Eheno, paife owa kula ohandiku lombwele ashike oshili mumati wange, nakudala mefimbo lonale ngeenge ina hala omonakakadona a fimbapale omanga inaakafukala okwa li ha teelele okakadona aka keli mone, ndele ta kongo okayongoti naashi kwali hashidi pukaakadona ou, okwa li nee he shi tula mokayongoti ndele nokonima kombada yokayongoti ta tulako edu ye ota mangele mokaima ta tulike mondjuuwo. Nande ngeno ounangale ngo to longo oshili kemanya kudja ngo nodwi nakudala afilako shapo ongeenge aka filulako yeemwene una efimbo la kaadona lokukahombolwa lafika.

YA TUYENI: Paife oukadona okwa li hava tulikilwa shike ngeenge ohamu lombwele ovanhu mefimbo lopaife kutya oukadona vonale ka kwali hava iwa momaulu kovamati omanga inava fukala, noshitivali oshayela ovanhu vonale navo okwa li ashike hava hombolifa oukadona vamanako ounyuni nokonima ko takutiwa Ya Tuyeni okwa hombola okakadona kanakatyepa, kaushi ngo oukengeleli waliko monale oo?

TATE NGHIDENGWA: Kaume oufifiti owadja nale, do neembudi domoikumbafa oko ngo dakala, itashiti eshi taku ti oukadona vonale okwali hava wilwa pomaoko fiyo otakushi, haaveshe kwali hava wanifapo osho kwali shi holike kovakulunhu,  vo noukadona haaveshe kwali hava tulikwa luhapu ngeenge wahange okakadona katulikwa ongeenge ngo ovakulunhu hava mono kutya mbwaduli ou oku hole okufikama novamati momilaulu, nefimbo limwe nokuli ngeenge otaende kashona otashishiva akwatelwe meengoma afukale omanga inaamita.

YA TUYENI: Aai! Paife okayongoti aka naku ka tulika ne, konima eshi a ninga nawa kakadona ou okwali ngo ne he mu lombwele kutya mukwetu onde ku ninga nawa nde nokaaima koye onde ka tulika mondjuuo, mounyuni omuna nomafyo ngo ilo oiponga ei ngo yakalako yomindilo ngeenge ne nande okapilemo naku tulikwa ou okwali ngo haka mona vali ounona?

TATE NGHIDENGWA: Epulo oliwa kaume, mefimbo lonale ngeenge owa hange ngo eumbo talipi, ndele meumbo omo omuna okakadona katulikwa na ko vene ke shishi, oshili ovanhu eshi tava dimi omundilo oto hange ashike kakadona ou takwena ye okwelipyakidila nokudima ondjuuo, nefimbo limwe nokuli ota ingida ovanhu kutya vakwetu ileni tudimeni ondjuuo omolwa okaaima kaye oko a koneka nokwa lombwelwa kutya omo ke li.
Efimbo limwe noxo ovakulunhu ihava popi sha ohava teelele ashike a fukale opo ne temu ufana nawa temu lombwele ta ti kala utale nawa ndiku ninge nawa molwaashi paife otoi kohombo opo uka mone oludalo, natango ne ngeenge owa hange ngo kakadona a filwa ina ilo inakulu ombaadilila ye napamwe inemulombwela okaima apa kaama, oto hange kaadona ou eli meenghali takwena ta ingida ta ti, wooo meekulu afya ina lombwelange nawa! Ashike ihe shi popi ne pauyelele kutya oshike naana a fiwa ina lombwelwa ku inakulu ilo ku ina.

YA TUYENI: Paife okayongoti aka okafa naana ovenda yo family pulaninga ei ili mounyuni wopaife, ashike opena omahokololo amwe nomitoto takuti vamwe vomovakainhu konima ngeenge vavendwa ovenda ei ihava ka mona vali oludalo, ko ne okayongoti  aka kakwali haka kanifile ovanhu, kadipaye mo ngo nande omai ovanhu oludalo?

TATE NGHIDENGWA: Pwoovene kapena oshinima shihena oupyakadi ngaashi naana toshipopi ngaho, ouwa ou wali mokayongoti, okwali ashike haukala ku nakudala molwaashi okuudite kutya ekadona laye ka li na efiku lininge edimo manga inali fukala, ashike ne okwali hava kala vadimbwa kutya ekadona olo tu eli, okwali hali yi momilele novamati vomomukunda omo.
Ongaashi naana mefimbo eli oonakudala ngeenge tava twala ounona vavo voukadona koipangelo vaka vendwe opo va ha ninge omapunda,  naashi ohashi yandje omhito koukadona va longife omilele da pitilila pehena oumbada washa wokuninga oufimba, kakele komikifi.Ponhele ovakulunhu va lombwele oukadona kutya omilele oda nyika oshiponga, oteke ka vendifa opo ka kale ka manguluka oku ya momilele ko ko taka dimbwa omukifi.

YA TUYENI: Paife ovashamane oovene vomaumbo navo okwali tu hava i meengudafana novakulukadi ngeenge pe wetike efamba limwe lawana okutulikwa, ilo ooina oinima ei okwali ashike have iningi monanguwi ovo aveke komapata avo oko?

TATE NGHIDENGWA: Mumati wange, monale okaana koye ka keshi okakweni, ngeenge okamati nde taka yandje oshikolo kepata, ohakuti naku ka lombwelwe ooxekulu vamwaina naina vokedimo lavo, natango okaana kokakadona ngeenge taka fukala ndele ta koondwa ongobe, okwali haaii natango nokwi ilwapo kooxekulu ilo kooinakulu, molwaashi okwali hakuti okaana okakwao naina, peenghudafana dokayongoti doinima yokomapata ovanhu opo ngo tokaufanwa, nye aashamane ngenge ina mu hala vali ovakulukadi haku yambulula omadimo ovanhu, hapo to ka tya nye haku tulikwa mwafa eemhido.

YA TUYENI: Onde ku pandula eshi wa kufilako ova Namibia nghe Ovawambo va kala hava dana onghadangala kombinga yokayongoti omu mwa kala hamu tulwa oukadona opo uha tokolife mo eendjeva kovalumenhu.

*John ya Tuyeni otamonika ko mrtuyeni76@gmail.com  ile kongodi 0812988549. Omadilaadilo aa oomunyoli yee mwene ndele kaeshi aKundana.

LEAVE A REPLY

Please enter your comment!
Please enter your name here