Uudhano oshikandjolongo Oshigambo owe enda nawa

0
184

 

OSHIGAMBO– Omolwa omaudhano taga ende taga humu komeho oshikandjolongo Oshigambo nonuumvo oshali sha unganeka uudhano, mbono hawu dhanwa omumvo kehe pOshigambo.

Uudhano mbuka owali wa dhanwa lwotango mo 2000, mono oosikola dhomoshikandjolongo odho owala dha li hadhi kutha ombinga.  Omukwashilipaleki guudhano moshikandjolongo Oshigambo, Temus Shingwadja okwa ti sho ya mono oosikola dhokiikandjolongo yilwe dha hala oku kutha ombinga oyali ya tokola opo iikandjolongo mbyoka yi na ehalo okuya wayimina nayo yi kuthe ombinga.

“Muudhano wetu nuumvo omwali mwa kuthwa ombinga koosikola 39 ndhono dhaza kiikandjolongo Onathinge, Onamutayi, Eenhana, Oshigambo shoshene,  Ongha, nOndobe, uudhano owali wa ningwa ehuliloshiwike lya ziko,” Shingwadja ta ti.

Okwa ti oosikola odhindji odha gandja etsomukumo muudhano, nodha ulike kutya odha hala okukala tadhi kuthombinga aluhe. Shingwadja ta ti puudhano mbuka ohapu kala aasindani haya pewa omakopi osho wo oshimaliwa.

Shingwadja nofamili ye oye a kala omukwashilipaleki omunene nkene tuu uudhano mbuka wa tamekele. Okwa landa omakopi noombandi oshowo oha gandja oshimaliwa koosipana ndhoka dha sindana muudhano mbuka.

“ Nuumvo uudhano mbuka otwa li twewu kwashilipaleke notwa longitha konyala oo$25 000, mono twa gandja omagano koosipana adhihe dha sindana. Muudhano wetu ohamu kuthwa ombinga koosipana dhetanga lyokoompadhi oshowo etanga lyomokambamba lyaakadhona,” a ti ngaaka.

Etanga lyokoompadhi oshowo ndyoka lyomokambamba ogali ga topolwa moongundu mbali, mono oosikola dhopevi dhi idhane, naandhoka dhooCombined nadho dhi idhanene.

Koosikola dhopevi metanga lyokoompadhi Oniipa oyali ya sindana ekopi noshimaliwa shooN$1 100. Onamupalula oye ya puutiyali noya pewa  N$900-00 omanga Onamambo ya sindana N$750. Moosikola dhooCombined,  Ozizi oye ya yotango noya sindana ekopi nooN$1350, Eloolo olyeya puutiyali nolya mono N$1150 omanga Onamutene ye etelele okano noya mono N$850.

Ketanga lyomokambamba poosikola dhopevi Etanga olya sindana ekopi noshimaliwa shooN$950,Okalunga okeya puutiyali noka mono N$750 omanga Amupapala a pewa N$600. Koosikola dhooCombined muudhano mbuka Otunganga oya dhengemo adhihe noya sindana ekopi nooN$1150, Onamutene oye ya puutiyali noya pewa N$850.

Shingwadja okwa holola kutya uudhano owe enda nawa noyena omathaneko omanene opo ya tale kutya uudhano otaye wu yambulapo ngiini, wo uunona wu dheulilwe omaudhano ga yooloka manga wuli moongundu dhopetameko lela.

Okwa indile oosikola dhi kuthe ombinga momaudhano goludhi nduka, yo ya kale taya unganeke uudhano nga mbuka moosikola dhawo yo taya hiya oosikola dhopuushinda dho dhi thigathanepo. Okwa ti shino otashi tungu omalutu guunona go ga kale gena oonkondo noga kola.

Puudhano opwali woo pwa kuthwa ombinga kongundu yuudhano wopamuthigululwakalo Mwaalwa Gwaamalwa ndjono hayi kala nokumwenyeka omumvo kehe.

LEAVE A REPLY

Please enter your comment!
Please enter your name here