Aakwashigwana lopoteni kehe ngoka ta ningi omatilitho

0
196

TSUMEB – Opolisi moshitopolwa shaShikoto oya indile aakwashigwana ya kale ya lopota mbala kehe ngoka ta ningi omatilitho gwiilwitho unene nondjembo. Etseyitho ndika olya ningwa kuyele oshiwike shika sho taku lopotwa elongitho nayi lyoondjembo moshitopolwa.

Omukuluntu gosasiona yopolisi poTsumeb  Bernard Nghuulivali moonkundathana naKundana okwa ti  opuna unene iiningwanima oyindji tayi holoka unene yokuumba oondjembo shaali paveta, nolundji aakwashigwana ihaya lopota omatilitho ngoka taya ningilwa kooyene yoondjembo.

“ Otuna iiningwanima mbyoka tayi holoka ihe omolwuumbanda aakwashigwana ihaya lopota mbala, ashike ngele oshinima shomatilitho osha lopotwa mbala kopolisi, iiningwanima mbyoka otayi vulu okuyandwa.Yamwe mboka yena oondjembo ohaya kala anuwa taya ningi omatilitho gokuyaha aantu, ashike aakwashigwana ohaye shi mwenene owala ihe ngele pwa holoka sha opo taya popi kutya oya kala haya ningilwa omatilitho,” Nguulivali ta ti.

Nghuulivali ta gwedhapo kutya okwa konekiwa yamwe mboka yena oondjembo haya kala taya popi moshigwana kutya anuwa otaye kiiyaha nenge ya yahe aakwashigwana, oyendji ohaye shi talako shafa omashendjo, ihe ngele pwa ka holoka sha opo ta ye ya puuyelele yo taya popi kutya omuntu ngoka okwa kala heya ningile omatilitho.

Ta indile mboka yeli momakwatathano gopahole ngele ya kala yaa iyuvite ya kale ya lopota kopolisi manga inaaya longelathana iinima iiwinayi, ta ti ethimbo limwe omahepekathano ohaga ka hulila momaso aantu ya dhipagathana, ta ti omaiyaho noondjembo oga londa unene  moshitopolwa.

“Iiningwanima mbika yomatilitho goondjembo oya londa unene pombanda, oyendji ohaya kala ngaa taya popi pomahala kutya otaye kiiyaha nenge ya yahe aakwanegumbo yawo, ihe aakwashigwana ohaya kala owala ya mwenena iinima mbyoka. Otatu indile aakwashigwana ya kale haya lopota mbala iinima mbyoka unene ngele ya mona omuntu ta ningi omatilitho goludhi ndoka, kaleni hamu lopota kutse tse tu kuthe onkatu mbala manga inaapu holoka sha,” Ta gwedhapo ngaaka.

Ta ti itashi kwatha sha okupopya konima sho pwa holoka sha kutya omufekelwa gontumba okwa kala ha ningi omatilitho manga inaa ka eta oshiponga. Ta ti opolisi itayi tseya kutya oshike tashi inyenge moshigwana omanga inaaya lopotelwa yo ya ninge omakonakono.

Okwa pula mboka yena oondjembo ye dhi kwate noku dhi longitha nawa, yo ya kale yena omikanda dhoondjembo dhawo.  Nghuulivali ta ti oondjembo nadhi kale momahala ngoka ga gamenwa opo ku yandwe omaiyaho. Ta tsikileko ta ti kehe ngoka taka lopotwa ta ningile aantu omatilitho, ondjembo ndjoka oteyi kuthwa no iteyi pewa we.

 

LEAVE A REPLY

Please enter your comment!
Please enter your name here