Ehokololo lya Petrus lya hokiwa kuuyuni

0
376
Simon Petrus omweetipo gwongodhi yo otivii hayi longo ashike nomakuthikuthi goradio okukwatakanitha aantu. Mpaka ota ulike oshilongomwa she a thanekwa naalongi ye poseko ya Abraham Iyambo moshitopolwa Ohangwena.

 

ONGWEDIVA

Ehokololo lyomumati omunasikola ngoka a totopo ongodhi ihaayi futilwa sha olya yi nuuyuni. Nomahangano  gopaigwana otaga dhenge ga hala okuhumitha komeho oshilongomwa shika.

Omwedhi gwayi oshifo New Era osha eta hokolola kutya omunamimvo 19 Simon Petrus, omulongwa poseko ya Abraham Iyambo Senior Secondary School mOshikunde, moshitopolwa  Ohangwena  okwa shitapo oshilongomwa  shoka shina ongodhi inaayi pumbwa okufutilwa ethimbo lyokongodhi.

Ehokololo ndika olya andjaganekwa nokushangwa miikundaneki yopaigwana mwa kwatelwa mbyoka yomo South Africa, Nigeria, Britania oshowo China. Ehokololo ndika otali inyenge wo mointaneta.

Omahangano gomoshilongo naangoka gopaigwana  oga ulike ehalo okuhumitha komeho osheetwapo shika , omanga gamwe otaga dhiladhila okupa omumati nguka iimaliwa yoku ki ilongitha.

Petrus okwa shitipo oshilongitho shika sha thikama mongodhi tayi dhengwa omuntu inoo pumbwa okuyi futila ethimbo lyomombepo  oshowo otelevisi ndjoka pahokololo lye hayi longitha ashike omakuthikuthi goradio.Nongodhi ndjika ota vulu okudhengela shaampoka nopwaana epiyaganeko lyasha shampa ashike pehala mpoka eli pena omakuthikuthi goradio. Oha vulu wo okutala oTiivii yo NBC 1 koshilongomwa she shika.

Oshilongomwa shika hashi vulu oku udhithwa nolusheno oshina wo okabulba koku tema, omupepo gwombepo, oshowo ehala lyoku udhitha oongodhi niikwamalusheno  yilwe. Oshikwamalusheno shika ohashi longo kobatery ndjoka Petrus a shiti ye mwene. No pahapu dhe ongodhi ndjika ohayi longo ashike komakuthi goRadio opamwe nokakalata kocellophone kakusha.

Omwiilongi nguka okwa kala ta longo kombinga yosheetwapo she shika uule womimvo mbali, naakuluntu ye oya longitha konyala ooN$2 000 okulanda iipumbiwa opo a vule okutula kumwe oshilongomwa she shika.

Omvogu Petrus okwa sindanene ombandi yoshingoli pethigathano lyopashigwana lyoosikola lyakwashilipalekwa kuNampower sho a totelepo eshina lyoku kukutika oombuto oshowo okudhikaleka dha talala.

Omwedhi gwayi oprojeka ya Petrus ndjika oya sindana methigathano lyopashitopolwa nongashingeyi ota ka kuthombinga methigathano lyopomuthika gwopashigwana.

Pahapu dha Taimi Vataleni omulongi gwe gwoPhysical Science poAbraham Iyambo, sho Petrus a sindanene omvogu aagandji yiitsa oya li ya pula ngele maandjawo omuna oinginia ndjoka ya li tayi mu kwathele.

“Ihe ekwatho ndyoka ye a li a pewa olya zi kutse aalongi posikola. Oha dhiladhila po oopoloyeka dhe mwene” osho Vataleni a hokololele New Era.

Petrus ngoka ena ondjodhi yoku ninga omuinginia miikwamalusheno, okwa hala okuhumitha komeho osheetwapo she shika, shi ninge ongodhi yopeke ndjoka tayi vulika ku kehe omuntu unene tuu kaakalimo yokomahala gokomikunda hoka  kwa hepa.

 

LEAVE A REPLY

Please enter your comment!
Please enter your name here