Mushelenga a kumike oshigwana shi holoke komambo

0
389
Aakwanegongalo yaNayena aanene naashona yeli momukweyo okuya mongelki Osoondaha ya yi pethimbo pwa li elongelokalunga lyowina okutamekitha etungo lyongelki ompe megongalo ndyoka.

 

ONAYENA – Omupevi Minista gwIipambele yOpaigwana nElongelokumwe Omundohotola Peya Mushelenga okwa kumike oshigwana shikale hashi holoka komalongelokalunga.

Mushelenga ekumiko ndika okwe li ningi pegongalo Onayena moshitopolwa Oshikoto, Osoondaha ya yi a ti ngele aantu ya holoka komalongelokalunga ohaya gandja wo omagano opo omagongalo ge ga longithe okutunga oongelki.

Pegongalo ndika limwe lyomomagongalo gotango gaELCIN opwa li pwa longekidhwa oshinyangadhalwa showina, okugongela oshimaliwa opo egongalo ndika li vule okutunga ongeleka ompe.

“Manga tuli mongeleka tatu nyangadhala aantu yamwe oyeli owala pomaundingosho, yo yamwe otaya longitha iimaliwa yawo momalovu shi vulithe ya gandje komagongalo go ga tunge oongeleka mu kale tamu gwanene aakwanegongalo ayehe,” Mushelenga ta kumagidha.

Okwa ti okwa uvithwa unene nayi ku yamwe mboka inaaya hala ya kuthe ombinga miinima mbyoka ya pamba oongeleka, nonande ya pulwe omakwatho ihaya yamukula.  “Oyendji yomaanangeshefa otaya kambadhala no taya gandja oshindji shoka yenapo komagongalo, ihe opuna yamwe inaaya hala okugandja oshitimulongo shawo kOmuwa, oshinima shika otwa hala shi kale sha thika pehulilo, ne mu kwathe omagongalo naashoka mwa yambekwa nasho,” Mushelenga ta gwedhapo ngaaka.

Aakwanegongalo, aanangeshefa oshowo dhimwe dhomOominista odha li dha gongala nelalakano lyokugongelela etungo lyongeleka ompe yegongalo Onayena. Egongalo Onayena pethimbo ndika otali yakulwa komusita Selma Kagola.

Omukwanegongalo Abisai Nendongo oye gumwe eli mokangundu kegongelelo lyoshimaliwa shoka opo aakwanegongalo ya vule okutunga ongeleka yawo ompe. “ Otwa longekidha oshinyangadhalwa shika owina opo tu  gongelele etungo lyongeleka yetu, otwa thaneka tayi pula oshimaliwa tashi ihilile poomiliona ndatu lwaampoka,” Nendongo ta ti.

Osoondaha ndjoka okwali kwa gongelwa oshimaliwa shi thike pooN$208 222,35, oosamende 50, oongombe 5 na yilwe. Nendongo okwa ti oya thaneka opo ya tameke mbala etungo lyongeleka yawo uuna ya gwanithapo oshimaliwa shoka. Okwa uvaneke ta kala ta kwatha , ye a kwashilipaleke kutya oshimaliwa shoka osha gwana mbala.

ElongeloKalunga olyali lya ningwa komusita gwegongalo, omanga euvitho lyesiku lya ningwa ku Tomas Iindji. Iindji okwa pula aantu ayehe yi itedhilule  yo ya longele Omuwa nenyanyu. Aakwanegongalo oyali ya gongala momwaalu omunene. Shino osha ningwa omolwa etuleko lyondhopi, yo iilonga yetungo yi tameke.

Oongundu lwiimbo dhali tadhi mwenyeke esiku ongaashi, Tungila kEmanya , Ondangwa Youth choir,  Imba Tanga Omuwa, Faleniko,Tusilohenda, oku tumbula po owala dhimwe.

 Ground-breaking Ground-braking3

LEAVE A REPLY

Please enter your comment!
Please enter your name here