Okutunga kombada yomaendo osha puka

0
241

Oiningwanima ya holoka moikundaneki oshivike eshi yovanhu tava tungu noku dengela eembashu davo momaendo otai holola kutya oshiwana ota shi kanifa oukwatya wefimaneko lounhu.

Oikundaneki oya holola nghee vamwe mOshakati va hanauna nokulalakanifa eembila pomaendo opOmahenene ndele tava dengele po eebashu davo. Ota ku hokololwa yoo nokuli vamwe vali va tameka oku dika eepala opo va tende ko eehofa davo momaendo. Oshinima tashi kumwifa neenghono.

Monakudiwa efyo ola kala hali tilika neenghono, na luhapu ovanhu ohava kendabala ngaashi ta shi dulika va yande oku kunghula pomaendo oufiku. Nande ondjila yokeumbo oikale ya enda pomaendo, oto hange omunhu ta ngwengwe kokule, ta kendabala opo a henuke ondjila oyo ya enda popepi nomaendo, shaashi efyo, ombila, omufi, meumbo muna eefya na keshe tuu osho sha nyika efyo, oshali hashi tilika neenghono.

Ovakulunhu vamwe otava ti nokuli nale nale ngeenge pomukunda pa fiwa nomeumbo leni owa tila mo.

Kakele nee koumbada, oiwana ihapu mounyuni, mwa kwatelwa ovaNamibia otwa fimaneka ovafi. Omolwaasho to hange omunhu ngee a fi, oonakufiwapo ohava kendabala vemu landele oshikefa shiwa, tashi tulwa eenghala diwa, paife nokuli omaendo mahapu ohaatungwa noku tulwa emanya, efiku ashike lepako. Naavo nee va dopa oku shininga efiku lepako, ohava ka tula ko ngaho omadimbulukifo omamanya keembila doo nakufya vavo konima.

Ashike ngeenge ohatu halakanifa po oitutumbo yeembila, tu tunge po omaumbo etu, otwa fimaneka ngaho ovafi? Naashi nee omunhu ta dengele eepala momaendo a tende ko ohofa yaye, okwa teelela ovakwapata voonakufya va kale tave ya meumbo laye ngee tave ya keembila doo nakufya vavo?

Mbela osheshi nee ovakwamhungu veheko vali. Shikwao oto udu ngahelipi okaana koye taka dana kombada yeendo?

Oshinima eshi sha ningwa mOshakati oshi udifa nai neenghono. Oshayela kutya omolwa oitutumbo oyo ya halakanifwa po, ovakwapata vamwe ova kanifa ngaho eembila dova fi vavo. Oonakufya ovo va pakwa momaendo omomalukanda kave fi ovaNamibia. Oonakuhanauna po eembila dovanhu ova ninga ashike onghalo i djuu unene kovakwapata voonakufya ava tava ka kala nande ova hala oku ila ko ipongolo yovafi vavo ashike paife ota va pula vali lyee?

Oonakuninga oshinima eshi ova li va pumbwa okuli tula meenghaku dovakwapata voonakufya ava ndele tave li pula kutya, ombila ei ngheno okwali yatate, ile yameme ile yamumwameme mbela ohandii halakanifa po ngaho ndele handi tungu eumbo lange kombada?

Oshoshili kutya edu ola pumba, naapa pamwe pena edu tali dulu okuyandjwa, eeplota pamwe odi na ondilo, ashike nande ongaha, okutunga momaendo ngheno ota ku kala onghendabala ya xuuninwa.

Kombinga imwe oshinima eshi nashi kale oshileshwa kovaleli naavo va tulwa meembelewa domapangelo opaitopolwa nomalelo eedoolopa opo ku talike kutya mbela onomukalo uli pi po oshiwana tashi monenwa eenhele odo tadi dulika nokwaavo vena oiyemo yopeduelela.

Okuyandja omayakulo edu, hano oku sevesa edu oku na ondilo shili, nomalelo eedoolopa luhapu itaa dulu naanaa okusevesa onhele inene. Mbela oshike ita ku talika vali omukalo umwe wokuyandja omayakulo koshiwana, pamwe opena ngoo umwe una ombilixa, nande osha nakulya oshanakulonga, ngeenge tashi ya poku fa omikangha. Ile keshe vamwe va fe omukangha womepandaanda lavo, lo epangelo tali yambidida nominino.

Oshinima shikwao, oshiwana osha pumbwa ezulonghalo opo shi dule oku shuna konghalo yokulifimaneka, nokufimaneka omunhu mukwao –nande na kale a fya.

LEAVE A REPLY

Please enter your comment!
Please enter your name here