Ovakainhu ve dule 200 va tunhilwa nocervarix

0
201

EENHANA – Ovakainhu ve dule 200 va tunhilwa keliameno lokanker koshivelo shoshidalelo moshipangelo shopaumwene, Green Light mEenhana. Ouyelele ou, owa yadjwa kuRebbeca Netope, omuhakuli moshipangelo shopaumwene modoolopa yaEenhana moshitukulwa shaHangwena.

Netope ta weda po kutya, okudja muMaalisa 2015 eshi oshipangelo sha tameka neyakulo eli, ope ya elunduluko linene. Kakele komayakulo ouhaku wakeshe kovanaudu va yooloka, Netope okwa weda po kutya, eshi oshipangelo sha tameka netunhilo kovakainhu okudja peedula 11 fiyo 45, vahapu ova tunhiulwa kelaameno komukifi wokankera. Kakele ovakainhu okudja peedula 60 va ka nale, pamulandu woshikondo shoundjolowele voo itava dulu ku tunhilwa etunhilo loludi eli pamatomheno ouhaku, oikondjifa yavo molutu kai na vali eenghono ngaashi ovanyasha.

Netope, otati etunhilo eli, ohaku longifwa omuti woCervarix. Konima yeehani hamano naku tunhilwa oha shuna ketunhilo fiyo oikando ya ninga itatu nokwa amwenwa onghalamwenyo yaye aishe kokankera koshivelo shoshidalelo. Omuhakuli moshipangelo Green Side okwa holola vali kutya, omunhu oha konaakonwa tete ekonaakono lopapsmeer. Ngee okwa monika ombakiteli, nena oha hakulwa tete opo a dule okutameka etunhilo locervical cancer oikando itatu monghalamwenyo.

Omunambelewa woundjolowele ta fatulula kutya, etunhilo la ufilwa ashike ovakainhu ovanyasha ovo oilyo yavo yopaidalifi i na omahalo e nomwenyo, inali tameka moihakulilo ihapu. Ashike, ovalumenhu navo ova tameka kukonaakonwa oprostate cancer, kutakike omadidliko oprostate grant nongee oya monika mo nena, ohai kufwa mo ngee om’kifi inau tandavela nolutu. Pexulilo lodula ya dja ko 2015, ovalumenhu ve dule 300 moshitukulwa shaHangwena ova konaakonwa oprostate cancer poxungi yavo, efiku ola longikidwa pamwe noMedipark Ongwediva.

Okudja petameko loilonga  yoshipangelo 2014, ovakainhu novalumenhu ve dule 200 vomomudingononoko va kala nomaupyakadi mahapu oilyo yoidalifi ova mona ouhaku moshipangelo eshi. Netope ta yelifa vali kutya, oshipangelo osha kwafela yo vali ounona vahapu ve li koshi yeedula ve na oshimhela nonghungo  noupyu wa londa pefimbo eli. Onghee okwa kunghilila ovafilishisho vounona va diinine oukoshoki pefimbo eli, ku henukiwe oyoombo yoludi eli. Ota ti, ovanaudu va ombokelwa momikunda va pumbwa kwi ilwa ko, otava dulu ku kwatafana noambulansa yoshipangelo opo va fikifwe diva koshipangelo eshi hashi yakula ashike pakafimbo.

 

 

LEAVE A REPLY

Please enter your comment!
Please enter your name here